Kony ma Twero Nonge Oyot i Kare me Can
1. Niye pa ngati moni twero kwe woko nining?
1 Anna ma obedo lamego mo ma onongo cware pe obedo ngat muye dok onongo tye ki dog tic mo ma pe mine kare, onongo nongo ni tek mada bote me wot i cokke pa Lukricitayo kare ducu, nyo wot i tic me pwony, kadi wa kwano Lok pa Lubanga. Kadi bed ni en onongo pud maro Jehovah, ento niyene okwe woko. Gin maber ma otimme aye ni en onongo kony me cwiny ki bot luelda.
2. I yo ango ma Lukricitayo ducu gitwero bedo me kony i kare ma nongo mitte kikome?
2 Lubo tam me cwiny ma a ki i kacokke pa Lukricitayo nyuto atir ni wan wajenge i kom Jehovah. Luelda me kacokke gilubo lanen pa Yecu Kricito me gwoko jone i yo me mar ki yenyo yo me cuko cwiny kacel ki miyo kony ma nongo mitte bot jo ma gitye ka limo peko i yo me cwiny. (1 Tec. 5:14) Pol kare, lok me mar ma cuko cwiny ma nongo a i Ginacoya aye oromo bedo gin ma nongo mitte. Kwanyo kare me konyo jo ma goro obedo gin ma Lukricitayo ducu omyero gutim, pe luelda keken. Wan ducu wanongo teko ma a i lok ma maber ‘ma giloko i kare ma nongo mitte kikome.’—Car. 25:11; Ic. 35:3, 4.
3, 4. Konyo jo mukene kwako timo gin ango, dok wan watwero timo man nining?
3 In Aye Icaki: Nyuto mar bot jo ma nongo gimito kony mito ni wan aye omyero wacaku, wabed lukica dok waket cwinywa iye. I kare ma Yonacan oniang ni Daudi tye ki cwercwiny, ‘Yonacan ocito wa i Korec ka jingo cwiny Daudi.’ (1 Cam. 23:15, 16) Bed mwol ka imito konyo dano moni. Lok ma iloko i yo ma nyuto ni iparo pi ngat moni kelo adwogi maber. Medo i kom meno, Yecu onyuto ni tute matek mitte me jingo omegiwa nyo lumegiwa ma gigoro i yo me cwiny. (Luka 15:4) Ka cwinywa mito konyo dano moni ci wamedde ki miye kony kadi bed ni dongone pe tye ka wot oyot.
4 Bedo me cuko cwiny mada ka ce wan aye wacako lwongo jo mukene, calo jo ma watye kwedgi i cokkewa me kwano buk me wot kacel kwedwa i tic me pwony! Ka watye ka konyo lawor Jehovah lawotwa mo i tic me pwony, waromo bene tic ki kare meno me jingo cwinye me medde anyim. Kare ma wucwalo kacel me tiyo tic pi Jehovah calo meno pol kare cuko cwiny jo ma nongo pud gitye ka cang i yo me cwiny wek gucung matek.
5. Kit kony ango ma luelda giromo miyone i kare mukene?
5 Yub me Mar: Jo ma pe gubedo ka wire i tic me pwony nyo pe gubedo ka bino i kacokke pi kare malac guromo mito kony mukene mapat wek niyegi ojing. Kwano Baibul kun nongo kitiyo ki bukke mogo calo Wor Lubanga Acel me Ada, Draw Close to Jehovah, nyo Baibul Mono Ada Pwonyo Gin Ango? aye oromo bedo kony ma nongo gimito. Kit macalo meno nongo obedo dano ma dong otyeko nongo batija-ni pe dok bimitte ni omyero giter kwanne pi kare malac. Komitti ma Neno wi Tic omyero gubed atera me ngeyo anga ma nongo mito kony macalo man.—Nen ngec ma tye i Our Kingdom Ministry me Novemba mwaka 1998 ki me Novemba mwaka 2000 i Bok me Lapeny.
6. Lamego mo acel onongo teko odoco i yo me cwiny nining?
6 Anna, ma kong giloko i kome malo-ni, ojolo tam ma luelda gumiye oweko en oye tam me kwano Baibul ki lamego mo acel ma otegi i yo me cwiny. Kikwano kwede wang angwen keken ci okonye me nyiko cok ki Jehovah doki. En otugi cako wire i cokke ducu, kwan meno bene oroco marre dok ocako pako Lubanga Jehovah i kin lwak. Lamego ma okwano kwede-ni bene obedo ka wot kacel kwede ka kwano Baibul ki jo mukene nio ka cwinye ojing ma onongo en dong twero wot pire kene ka tito kwena i dog ot ki dog ot. Kony macalo meno keken aye gin ma en obedo ka mitone me medo kero me medde anyim!
7. Adwogi maber ango ma bino pi cuko cwiny dano i yo me cwiny?
7 Cuko cwiny jo ma mito kony kelo mot maber bot dano ducu. Jo ma ginongo kony ma kit meno gibedo ki yomcwiny me nyiko cok bot Jehovah ki me dok cen ka tic kacel ki Dulle. Cwiny luelda bedo yom mada ka gineno dongo i yo me cwiny ma kit man. (Luka 15:5, 6) Miyo kacokke ribbe kacel dok ginyuto mar pi ngat acel acel. (Kol. 3:12-14) Watye ki tyen lok maber adada me poro kit Jehovah, ma obedo ngat ma miyo kony oyot i kare me can!—Ep. 5:1.