Ti ki Jami Anena me Pwony
1. Jehovah otiyo nining ki jami anena me pwonyo jone me kare macon, dok man okelo adwogi ango?
1 Jehovah kare mukene otiyo ki ginanyuta kacel ki lek me miyo ngec ma pigi tego bot jone me kare macon. Tam kong ginanyuta me gadigadi ma Jehovah onyuto bot Ejekiel. (Ejek. 1:1-28) Tam bene kit ma Daniel owinyo kwede i nge leko lek ma nyuto kit ma loc mogo onongo gibiloyo kwede lobo i kare mapat pat. (Dan. 7:1-15, 28) Nyo niyabo me jami me aura ma onongo gibitimme “i nino pa Rwot” ma kimiyo macalo ‘lanyut’ bot lakwena Jon-ni kono? (Yabo. 1:1, 10) Jehovah opwonyogi kun tiyo ki ginanyuta ma gineno jami ma tye ka timme ki wangi ma omiyo wigi pe owil iye matwal.
2. Jami anena ango ma waromo tic kwede me pwonyo dano i kom lok ada me Baibul?
2 Wan bene ka wamito pwonyo dano me niang lok ada ma tye i Baibul wek wigi pe owil iye oyot oyot, waromo tic ki vidio. Vidiowa kwako jami mapol mapat pat dok jingo genwa i kom Baibul, i kom dul pa Jehovah, ki cik ma miyo wabedo Lukricitayo mabeco. Kong dong wanenu yo mapat pat ma waromo tic kwede ki vidio magi i pwonywa. Magi aye obedo vidio ma waromo tic kwedgi.
3. Ngo ma iromo timone me wek latin kwanni me Baibul onge dulwa-ni?
3 I Tic me Pwony: Onongo dong iloko pi Utmegiwa me wi lobo-ni ducu bot latin kwanni me Baibul? Nyut bote vidio me Our Whole Association of Brothers. Iromo miyone bote pi tutunu wek en onen ma peya wurwatte kwede me kwano Baibul doki nyo wunen kacel. Ci penye ki lapeny ma tye i Our Kingdom Ministry me Juni 2002.
4. Jami ango ma lutino kwan ma gubedo Lucaden gitwero tic kwede me pwony i cukul?
4 Bulu, wuromo lok ki lupwonyewu wek ka twere wunyut vidio me Jehovah’s Witnesses Stand Firm Against Nazi Assault nyo Faithful Under Trials—Jehovah’s Witnesses in the Soviet Union i kilaciwu. Wac botgi ni imito yubo lapeny me anyama, ci ti ki lapeny ma gitye i Our Kingdom Ministry me Juni 2001 nyo me Febuari 2003.
5. Gin ango ma tye ma lunyodo giromo tic kwede me kwan calo luot?
5 Bot Luodi ki Luremi: Lunyodo, kong wutam twon kony ma lutinowu dong gunongo cakke ma kicwal kwede vidio me Young People Ask—How Can I Make Real Friends? Pingo pe wunen doki odoco i kare me kwanwu macalo luot? Our Kingdom Ministry me April 2002 miyo lapeny mogo mabeco ma konyo tutwal me nyamo lok i iye.
6. Itwero yubo yub ma romo dongo in kacel ki luremi nining?
6 Itye ki tam me lwongo luremi ma i kacokke i paconi? Neno vidio me Respect Jehovah’s Authority kwedgi kacel twero weko otyenowu bedo maber adada, tutwalle ka wuloko i kom pwony ma kimiyo kun wutiyo ki lapeny ma tye i Our Kingdom Ministry me Sektemba 2004 i nge nenone.
7. Yo mukene ango ma itamo ni iromo tic kwede ki vidio magi?
7 Yo Mukene ma Iromo Tic Kwede: Yo ango mukene ma iromo tic kwede ki vidiowa 20 mapat pat ma tye-ni? Nyuto vidio acel nyo aryo mo bot jo ma ilimogi kare ki kare mono romo konyogi me dongo i yo me cwiny? Twere me nyuto vidio man i ot yat matino tino nyo ka ma kigwoko iye jo muti? Itamo ni vidio man nyo romo ywayo tam pa wadini ma pe gubedo Lucaden, jiranini, nyo lutic luwoti? Vidiowa gibeco adada, dok obedo yo me pwony ma kineno anena ma tiyo tutwal. Ti kwedgi me pwony.