Kony Jo Mukene Wek Gunong Ber pa Ginkok
Kwero Nipo me To pa Kricito Bibedo i April 12
1. Yo acel mene ma jo pa Lubanga ginyuto kwede pwocgi pi ginkok?
1 “Gipwo Lubanga pi motte maber ma pe wacce.” (2 Kor. 9:15) Lok magi nyuto kit ma wan wawinyo kwede pi ber kit kacel ki kica ma Lubanga onyuto bot jone kun tiyo ki Wode Yecu Kricito. Wabinyuto pwoc ma kit man ki gure kacel me kwero Nipo me to pa Kricito i April 12.
2. Angagi ma giribbe ki lutic pa Jehovah i kwero nino me Nipo, dok omyero gin gutim ngo wek gunong ber pa ginkok-ki?
2 Mwaka ki mwaka dano ma romo milion apar kulu giribbe kacel ki lutic pa Jehovah i kwero nino me Nipo. Pi timo man, gin ginyuto pwocgi pi gityer pa Kricito. Ento, wek gunong ber pa ginkok, omyero gin kong guket niyegi iye. (Jon 3:16, 36) Dong wan watwero konyogi nining wek gubed ki kit niye man? Watwero cuko cwinygi i kare man me Nipo-ni me cako kwano Baibul ki dok me bino i cokke i cabit ducu. Tem kong tam ma kimiyogi eni.
3. Watwero cako kwano Baibul ki dano ka watye ka lwongogi i kwero nino me Nipo nining?
3 Kwano Baibul: Ka ilwongo jo mo ma gitye ki miti wek gubin i nino me Nipo, pingo pe icak kwano Baibul kwedgi kun itiyo ki buk me Baibul Pwonyo? Tit bot ngat meno kit ma kikwero kwede nino me Nipo, yab pot karatac 206-8 ci wunyam wi lok ma tye ni, “Cam pa Rwot me Otyeno—Kwer ma Miyo Deyo ki Lubanga.” Iromo dok cen ka limme wek wunyam kwede pwony man kicel nyo kiryo, itwero weko bedo macalo kwano Baibul i nyim doggola. Ka wutyeko neno ngec man, ngat eno-ni oromo bedo ki miti me kwano dul me 5 ma wi lokke tye ni, “Ginkok—Mic Madit Loyo Ducu pa Lubanga.” Ka ce wumoko woko me kwano Baibul kare ki kare, ci dok cen wukwan cura angwen ma okwongo me buk man.
4. Jo mene ma watwero cako kwano kwedgi Baibul i kare me kwero Nipo man?
4 Watwero tic ki yo man me cako kwano Baibul ki angagi? Romo bedo ni lutic luwotwa, lutino kwan luwotwa, nyo jiraniwa guromo ye nyamo lok ma kit man. Omego giromo lok ki cog lumegiwa ma pe gitye i niye. Pe iwek wi owil i kom wadini ma pe gubedo Lucaden. Medo i kom meno, omyero waketu tek me lwongo wa jo ma onongo kong con gibino i cokke kare ki kare. (Luka 15:3-7) Watute wunu matek me konyo jo ma kit magi wek gin bene gunong kony ki i ginkok.
5. Watwero cuko cwiny lutino kwan me Baibul kacel ki jo mukene ma gitye ki miti me cako bino i cokkewa ma bedo cabit ki cabit nining?
5 Cokke: Nino me Nipo aye obedo cokke me acel ma pol pa lutino kwanwa me Baibul kacel ki jo ma gitye ki miti gicako bino iye. Dong, wan watwero cuko cwiny jo magi wek gucak bino i cokkewa mukene-ni nining? Ticwa me Ker me April mwaka 2005, i pot karatac 8 miyo tam man: “Tittigi pi cokke abic ma bedo tye cabit ki cabit kun ikwanyo acel nino acel. Nyut wi pwony ma kiyubo pi lwak ma bedo i ceng cabit. Nyut botgi bene Watchtower kacel ki buk ma kibikwano i Cokke me Kwano Buk. Lok i kom cokke me Tiokraci ki cokke me ticwa. Ka kimiyo boti pwony mo i Cukul meno, itwero kong poro kit ma ibipwonyone kwede botgi. Tit botgi lok mogo ma pigi tego ma kipwonyogi i kacokke magi. Ti ki cal ma tye i bukkewa wek okony lutino kwan me niang jami ma tye. Lwonggi me bino i kacokke cut ma nongo pud icako kwan kwedgi acaka.”
6. I yo aryo ango ma watwero konyo kwede jo ma tye ki miti me nongo ber pa ginkok?
6 Ka ce inen jo ma cwinygi tye atir gucako kwano Baibul kacel ki bino i cokke kare ki kare, ci pol kare gidongo oyotoyot i yo me cwiny. Pi meno, wacuku cwiny jo mukene wek gunong ber i mic me cwiny magi kacel ki mic madit pa Lubanga ma en aye obedo ginkok.