Kit ma Iromo Cobbo Kwede Yubbi me Cwiny
1. Yub me cwiny ango ma Lukricitayo matino mapol gitye kwede?
1 Macalo Lakricitayo ma pud tidi, yub ma itye kwede i kwoni jenge i kom marri pi Jehovah ki dok i kom lok ma Yecu oloko bot Lukricitayo ducu me ‘kwongo keto cwinygi i kom ker-ri.’ (Mat. 6:33) Oromo bedo ni yubbi tye me medo kare me ticci me pwony kun itiyo calo painia, nyo cito ka tic ka ma lutit kwena me Ker mitte iye matek. Jo mukene guromo mine me konyo tic me gedo ma mako wi lobo kulu, tic i jang gang kal, nyo me tic calo miconari. Magi gubedo yub ma kelo yengo kacel ki pwoc mapol atika!
2. Gin ango ma romo konyi me cobo yubbi me cwiny?
2 Gin ma twero konyi me cobo yubbi me cwiny obedo coyogi piny. Watchtower me Julai 15, mwaka 2004 owacci: “Tam ma pud igoyo agoya i wi doko ber ka dong iloko woko odoko lok. Pi meno in iromo coyo yub ma igoyo-ni ki kit ma ibicobogi kwede i karatac.” Medo i kom meno, yub mogo ma cobbe pi oyot romo konyi me neno kit ma nongo itye ka dongo kwede dok weko iketo cwinyi me cobo yubbi ma nongo mito kare malac me cobone.
3. Tit kong yub mogo ma cobbe oyot ma romo konyo dano me nongo batija.
3 Yub ma Cobbe Oyot: Ka peya inongo batija, nen gin ma iromo timone wek icob yub meno. Oromo bedo ni omyero kong iniang pwony mukwongo ma pigi tego me Baibul. Pi meno, ket yub me kwano buk me Baibul Pwonyo maber, kun ingiyo ginacoya ma kicimogi ducu. (1 Tem. 4:15) Ket bene yub me kwano Baibul cakke ki i Acakki nio wa i Niyabo kit macalo jo me Betel ki lutino kwan me Gilead gitimo kwede. I nge meno, medde ki kwano Baibul nino ki nino. (Jab. 1:2, 3) Tam kong kit ma man biweko idongo kwede i yo me cwiny! Cak dok igik kwano Baibul-li ki lega, dok iyelle me keto gin ma ikwano-ni i tic.—Yak. 1:25.
4. Lakricitayo ma tye ki yub me tic i Betel nyo calo miconari ma man mito kare malac romo keto yub ma cobbe oyot ango?
4 Ka dong ityeko nongo batija, yub ango mukene ma dok iromo ketone? Nyo imito dongo dironi me pwony ba? Me laporre, pingo pe iwek obed mitini me dongo dironi me tic ki Lok pa Lubanga i tic me pwony? (2 Tem. 2:15) Iromo medo ticci me pwony nining? Ket yub ma romo cobbe oyot ma nongo rwatte ki mwakani nyo kit me kwoni dok ma nongo romo konyi me cobo yubbi ma mito kare malac.
5. Keto yub ma cobbe oyot okonyo omego mo nining me cobo yubbe me tic i Betel?
5 Yub mo ma Ocobbe Maber: I kare ma Tony ma onongo tye ki mwaka 19 olimo jang kal pa Lucaden pa Jehovah, mitine otugi bino me tic i Betel. Ento yo me kwone onongo rac dok en onongo pud peya odyero kwone bot Lubanga. Tony omoko tamme me cako kwo i yo ma Jehovah mito dok oketo yubbe me nongo batija. I yo nge cobo yub meno, en oketo yub me doko painia pi tutunu ka dok painia marii kun coyo nino me cako ticce woko i kalendane. Tam kong yomcwiny ma en obedo kwede i nge tic macalo painia pi kare mo ci kilwonge ka tic i Betel!
6. Gin ango ma romo konyi me cobo yubbi me cwiny?
6 In bene iromo cobo yubbi me cwiny ka iketo pi Ker-ri bedo me acel. Ket “ticci” i lega bot Jehovah kun iyelle matek me cobogi.—Car. 16:3; 21:5.