Dong Kit Mabeco, Wek Inong Mot Madwong
1. Pingo bedo ber me ngiyo kit ma ikwo kwede i yo me cwiny?
1 I kare ma onongo pud idoko Lakricitayo adoka, iyelle matek me dongo kit mogo mabeco me cwiny ma i kingi tye kwano Baibul, wot i cokke pa Lukricitayo, tic me pwony, ki lega. Macalo adwogi me mot pa Jehovah pi yelleni, in idongo i yo me cwiny. Oromo bedo ni mwaka mapol dong okato nicakke ma inongo kwede batija. Tika pud itye ka gwoko kit mabeco ma yam idongogi i kare ma onongo pud idoko Lakricitayo adoka-ni?
2. Adwogi mabeco ango ma wanongo ki i kwano Baibul nino ducu?
2 Ngi Kit ma Ikwo Kwede: Mono tye macalo kiti me kwano Lok pa Lubanga nino ducu? Man keliwa adwogi mabeco atika! (Yoc. 1:8; Jab. 1:2, 3) I kare pa jo Icrael macon, onongo cik tye ni kabaka acel acel omyero okwan buk ma mege me Cik, “pi kare me kwone ducu.” Man onongo kelo adwogi mabeco ango? Onongo konye me bedo ki cwiny mamwol dok pwonye me lworo Jehovah kun lubo Cikke. (Nwo. 17:18-20) Rom aroma bene i kare-ni, kwano Baibul nino ducu konyowa me bedo ma pe kikok i komwa i lobo man ma opong ki bal kacel ki tim bwami keken-ni. Konyowa bene me bedo ma nongo waromo tiyo tic me pwony.—Pil. 2:15; 2 Tem. 3:17.
3. Adwogi mabeco ango ma wanongo ki i bino i cokke kare ducu?
3 Yecu onongo oloko odoko macalo kite me cito i kacokke ka ma onongo kinyamo iye Ginacoya. (Luka 4:16) Man ojingo en me cung matek i kom atematema ma onongo obibino i kome. Pwony ma wan wanongo ki i cokke kacel ki ‘i cuko cwiny ma a ki i kinwa kekenwa,’ bene jingowa. (Rom. 1:12) Cokke kacel ki omegiwa konyowa me ciro pekki me kare man me agikki-ni. (Ibru 10:24, 25) Mono pud tye macalo kiti me bino i cokke ducu?
4. I yo ango ma nywako tic me pwony i cabit ducu keliwa adwogi mabeco?
4 Baibul tittiwa ni lukwena gubedo ka tito lok me kwena maber ‘nino ducu i ot pa Lubanga ki i ot ki ot.’ (Tic 5:42) Kadi bed ni pe watwero tito lok me kwena maber-ri nino ducu, ento mono watwero wekone bedo macalo kitwa me tiyo tic madok i kom pwony i cabit ki cabit? Timo meno bimiyo wadoko ludiro i tic ki Lok pa Lubanga dok bene weko wanongo cuko cwiny madwong ki i nywako lok ada me Baibul ki jo mukene.
5. Pingo pire tek ni omyero waleg bot Jehovah kare ducu?
5 Lanebi Daniel onongo mot madwong ki i tic pi Jehovah ‘jwijwi’ pi kare me kwone ducu. Man onongo tye iye lega bot Jehovah kare ducu. (Dan. 6:10, 16, 20) I kit yo acel-lu, ka wan bene walego bot Jehovah ki cwinywa ducu ci en bimiyowa cwiny mere maleng. (Luka 11:9-13) Medo i kom meno, Jehovah bene romo dok i legawa ki nyiko cok botwa, kun nongo miyo wabedo ki wat macok kwede. (Jab. 25:14; Yak. 4:8) Man pud dong obedo twon mot madit atika ya! Pi meno, watiyu matek me bedo ki kit mabeco me cwiny wek wanongu mot madwong ki bot Jehovah.