Miyo Caden i Ot ki Ot
1. Lapeny ango ma bino ma lubbe ki tic me pwony i ot ki ot, dok pingo?
1 “Jo ma gitye ki ngec matut i kit yo mapat pat me tito lok me Ada, giye ni tito pi kwena i ot ki ot kun kitiyo ki buk ma kilwongo ni MILLENNIAL DAWN en aye i kare-ni obedo yo maber loyo me tito lok me Ada.” Lok meno ma kicoyo i Zion’s Watch Tower me Julai 1, 1893, onyuto kit ma tito lok me kwena maber-ri i ot ki ot pire tek kwede. Dano i wi lobo-ni ducu dong gitero tic man calo lanyut me ngeyo Lucaden pa Jehovah. Dong yo me pwony man mono pud tiyo, kit macalo nongo dano i pacigi dong tye ka doko tek woko i lobe mukene-ni?
2. Ngo ma nyuto ni lwit miyo caden i ot ki ot a ki i Ginacoya?
2 Lwite a ki i Ginacoya dok Pire Tek: Tic me miyo caden i ot ki ot-ti lwite a ki i Ginacoya. Yecu ociko lupwonnye 70 me cito i odi pa dano ki aryo aryo. (Luka 10:5-7) Cutcut i nge to pa Yecu, Baibul oloko i kom lupwonnyene ni: ‘Nino ducu pe guweko pwonyo dano ki tito lok me kwena maber i ot pa Lubanga ki i paci pa dano.’ (Tic 5:42) Lakwena Paulo bene opwonyo kun woto ki i ot ki ot ki mit kom.—Tic 20:20.
3. Miyo caden i ot ki ot tye ki adwogi mabeco ango?
3 Miyo caden i ot ki ot pud obedo yo ma pire tek me yaro kwena maber-ri wa i kare-ni bene. Miyowa kare me ‘yenyo’ jo ma gimyero kun nongo wawoto kore ki kore dok i yo ma pwot. (Mat. 10:11) Dano gimaro bedo agonya ka gitye i pacogi. Loko lok kwedgi wang ki wang—winyo dwangi, neno lok ma wanggi nyuto, ki neno jami ma nongo tye i ngetgi—weko waniang mitigi kacel ki pargi. Man pol kare miniwa kare me nyamo lok kwedgi pi cawa malac.
4. Wan watwero weko miyo caden i ot ki ot nyako nyige madwong nining?
4 Lok yubbi: Lakwena Paulo onongo tye atera me loko kit me bedone “pi lok me kwena maber.” (1 Kor. 9:23) Gwok nyo wan bene watwero loko yubwa me cito ka pwony i cawa ma dano twero nonge gang, calo i otyenogi, i Ceng Abicel ki Ceng Cabit, nyo i nino madongo-gu. Gwok rekod me paci ma onongo dano gipe iye gang ci itemme me dok cen kunnu i cawa nyo nino mukene.
5. Kitwero weko jo ma gitye ki peko me yot yotkom gibedo i tic me ot ki ot nining?
5 Kadi wa jo ma gitye ki peko me yotkom bene giromo nywako i tic me pwony i ot ki ot. Nyo waromo goyo pulan me wot kacel ki jo macalo magi i gangi mogo ma nongo gitye macok kun waweko gitiyo i cipid ma nongo rwatte ki kerogi. Peko me yweyo ma lamego mo acel onongo tye kwede onongo miyo en twero lok i paco acel keken i nucu cawa. Ento cwinye obedo yom adada i kare ma kimiyo en ocito ka pwony kacel ki lwak!
6. Pingo omyero wawek tic me miyo caden i ot ki ot-ti obed i kin ticwa me pwony kare ducu?
6 Dano ma gitye calo romi pud ginonge mapol i tic me ot ki ot. I kare ma Latit kwena mo acel odwongo doggola, kiwacce ni: “Dony i ot. An angeyo nga ma in ibedo. An onongo abedo ka lega bot Lubanga wek ocwal ngat mo wek okonya, ci i ngeye awinyo ka kidwongo doggola. En owinyo legana ci ocwalo in bota.” Gin mutimme-ni nyuto ni Jehovah tye ka goyo laane i kom yo man me tito kwena maber-ri. (Mat. 11:19) Mok tammi wek tic me miyo caden i ot ki ot-ti obed i kin ticci me pwony kare ducu.