Lub Lanen pa Kricito i Ticci me Pwony
1 Yecu oweko botwa lanen me aluba i ticwa me pwony. En onyuto mar matut pi Lubanga ki pi dano tyen mapol dok i yo mapat pat. En opwonyo jo ma mwol ki lok me ada dok otimo tic me mar bot jo ma gitye i peko ma piny odiyogi.—Mat. 9:35.
2 Pwony Kacel ki Lanen pa Yecu: Tic me wibye nyo yelle me konyo lupeko pe odwoyo tam pa Yecu woko. Dok en pe oweko mitine odwoyo nyo oumo tamme i kom ticce ma pire tek-ki. (Luka 8:1) En oketo cwinye i tito lok me kwena maber me Ker pa Lubanga macalo gin acel keken ma bicobo peko pa dano. Yecu onongo tye ki tic madit me atima dok kare me timone onongo tye manok. I kare ma jo me Kapernaum onongo dong gimito ni Yecu obed kunnu, en owaco bot lupwonnyene ni: “Dok wakobu woko i gang mukene . . . wek acitit lok kunnu bene, pien meno en aye gin mumiyo abino.”—Mar. 1:38.
3 I yo nge pwonyo lupwonnyene, Yecu ocwalogi kun cikogi ni: “Wutit lok kun wuwaco ni, ‘Ker me polo dong onyiko cok.’” (Mat. 10:7) En opwonyo jo ma lubbe ni omyero guket pi Ker meno obed gin mukwongo i kwogi. (Mat. 6:33) Lok pa Yecu me agikki bot lupwonnyene ma en peya odok i polo onyuto kamaleng ngo ma myero gin gutim. En owacci: “Pi meno dong wuciti wucilok jo me rok ducu gudok jo ma luba.”—Mat. 28:19.
4 Gin Mumiyo pi Ker-ri Tek: Gin ma onongo Yecu maro lok pire mada obedo Ker pa Lubanga, dok en ocuko cwiny lupwonnyene me lubo lanenne. Tute pa dano me cobo pekkigi dong oloyogi woko. (Jer. 10:23) Ker pa Lubanga keken aye bilonyo nying Lubanga dok bikwanyo peko pa dano matwal. (Mat. 6:9, 10) Pwonyo lok ada i kom Ker-ri bot jo ma “tye ki cwercwiny me can kun gicur pi gin me kwer ducu ma gitye ka timone,” konyogi me bedo ki yomcwiny kacel ki kwo maber i kare-ni ki dok me moko matek i gen ma pe tur pi anyim.—Ejek. 9:4.
5 Yecu pud tye i tic me tito kwena maber me Ker pa Lubanga, dok en oniangowa ni ebiminiwa kony. (Mat. 28:20) Ticwa me pwony mono tye ma lubbe ki lanen ma Yecu oweko botwa? (1 Pet. 2:21) I kare man me agikki ma alokaloka mapol tye ka timme-ni, watemme wunu ki tekwa ducu me lubo lanen me tic me pwony ma Yecu oweko-ni macok mada!