Lub Lanen pa Lapwony Madit ka Itye ka Tic ki Buk me Baibul Pwonyo
1. Yecu onongo pwonyo pwonye nining?
1 Lapwony Madit, Yecu, kare ducu obedo ka pwony i yo mayot dok ma niange maber. I kare mukene en kong penyo tam pa jo ma winye, ma man miyo gicako tamo tam. (Mat. 17:24-27) En otero tamgi i Lok pa Lubanga. (Mat. 26:31; Mar. 7:6) En onongo pe miyo ngec mapol ma okato kare woko bot lupwonnyene, pien onongo ngeyo ni gin pud gibimedde ki pwonye. (Jon 16:12) Miti pa Yecu bene onongo tye me neno ka lupwonnyene guye dok giniang ngo ma en epwonyogi kwede. (Mat. 13:51) Kiyubo buk me Baibul Pwonyo me konyowa wek wapwony i yo acel-lu.
2. Watwero tic ki lapeny ma kiketogi i acakki me dul acel acel nining?
2 Lapeny me Cako Lok: Ka wubicako kwano dul moni, ber kong wukwan lapeny ma gukwongo ma tye i te wi lok madit. Kwan lapeny meno i yo ma twero tugo miti pa latin kwanni. Nyo iromo weko en miyo lok mogo manok nok i kom lapeny magi. Pe bimitte ni omyero wunyam lagamme-ni matut nyo ni imiye lagam matir ka ducu ma nongo en ogamo marac. Iromo pwoyo tamme moni-ni ci dong wucak kwanwu. Lagam ma en miyo ikom lapeny me acakki-ni bikonyi me niang ka ma mitte ni omyero wuket cwinywu i kabedo mogo i dul meno.
3. Waromo weko kwanwa bedo mayot nining?
3 Ginacoya: Kwanwu omyero ojenge i Ginacoya. (Ibru 4:12) Ento pe dong tye ni omyero wukwan ginacoya ducu ma kicimo. Lok i kom ginacoya ma ginyuto tyen lok me niyewa. Wuromo weko ginacoya mogo ma tye me medo niango keken woko. Buk me Baibul Pwonyo tito lok me ada i yo ma niange oyot. Wek kwanwu obed mayot. Ket cwinyi i lok ma pigi tego, pe ilok mapol kun idonyo matut ki kelo jami ma nongo pe i pwony meno labongo tyene.
4. Ka watye ka kwan ki lutino kwanwa, ngo ma bipoko ka omyero wakwany kare me nyamo jami ma tye i lamed ngec nyo pe?
4 Lamed Ngec: Lamed ngec tye ki pwony 14 ma medo kor kom dul kikome-ni. Ka wutye ka kwan, nyamo pwony ma tye i lamed ngec magi cung i wiwu. Iromo cuko cwiny latin kwanni me kwano pwony mukene pire kene ki i lamed ngec magi, tutwalle ka en dong niang dok ye ngec ma tye i kom pwony me dul kikome-ni. Me lapore ka latin kwanni dong ye ni Yecu aye Meciya, ci pe bimitte ni dok wunyam wi lok ma tye ni “Yecu Kricito—Meciya ma Kiciko Pire,” ka wutye ka kwano dul me 4 ma wiye tye ni, “Yecu Kricito En Aye Anga?” I kare mukene, twero bedo ber me nyamo jami mogo ma tye i lamed ngec nyo bute mogo i cawa me kwan.
5. Ka wayero me nyamo jami ma i lamed ngec, ci waromo timone nining?
5 Ka imito nyamo jami ma tye i lamed ngec, ci iromo yubo lapeny ma ibitic kwede con dok wunyam paragraf ducu i kit ma wukwano kwede dul kikome-ni. Nyo ma lubbe ki niang pa latin kwanni, iromo tic ki dakika mo manok i kare me kwanwu me wot wiye wiye i pwony moni-ni. Man bimiyi kare me neno ni latin kwanni oniang jami ma en okwano pire kene-ni maber.
6. Kitwero tic ki Bok me nyamo lok ma tye i agikki me dul acel acel-li nining?
6 Bok me Nyamo Lok: Bok ma tye i agikki me dul acel acel tye ki lok ma miyo lagam i kom lapeny ma nongo gukwongo ca. Iromo tic ki lok magi me nyamo wi lok madongo me dul meno. Lutit kwena mukene gunongo ni konyo mada me kwano lok acel acel ma tye ki nyo ginacoya ma nongo kicimo, kacel ki latin kwan. Ka dong gipenyo latin kwan me tito kit ma ginacoya moni-ni cwako kwede lok meno. Man konyo lapwony me niang ka ce latin kwanne oniang wi lok madongo me pwony meno ki dok kit ma Baibul cwako kwede lok meno, ki dong ka en bene ye iye. Pwonyo bene latin kwan me tic ki Baibul me tito lok me ada bot jo mukene.
7. Waromo tic ki buk me Baibul Pwonyo me cobo ticwa nining?
7 Yo ma tiyo tutwal me cobo ticwa me pwonyo dano kacel ki lokogi wek gudok jo muye aye obedo lubo kit me pwony pa Yecu. (Mat. 28:19, 20) Buk me Baibul Pwonyo twero konyowa me timo meno. Ti kwede maber me pwonyo jo mukene ki lok me ada i yo mayot, ma niange maber, dok mamit.