Kit ma Yub me Cokke me Kwano Buk Konyowa Kwede
1. Cokke abic ma bedo cabit ki cabit-ti konyowa nining?
1 Cokkewa abic ma bedo cabit ki cabit-ti kidorogi i yo mapat pat dok konygi tye mapat pat bene. Ento gin ducu pigi tego pien gikonyowa me ‘tugo cwinywa kekenwa i mar ki i tiyo tic mabeco.’ (Ibru 10:24, 25) Jami mabeco ango ma dok gipat ento pigi tego i yub me Cokke me Kwano Buk?
2. Adwogi mabeco ango ma bino ki i cokke me kwano buk ma guruppe tidi-ni?
2 Konyo me Dongo i Yo me Cwiny: Wel dano ma gibedo i cokke me kwano buk pol kare bedo nok loyo wel dano ma gibedo i cokke mukene-ni. Man miyo bedo yot me mako larem ma meno romo konyowa i yo me cwiny. (Car. 18:24) Tika itute me ngeyo dano ducu ma tye i gurupwu me cokke me kwano buk, gwok nyo ki penyogi me wot kacel kwedi i tic me pwony? Yub me cokke me kwano buk bene konyo lanen wi cokke me kwano buk me ngeyo peko pa ngat acel acel ma tye i gurup ma en doro ma man miyo en cuko cwinygi.—Car. 27:23.
3. Cokke me kwano buk weko miyo lagam ki dok bino pa lutino kwanwa me Baibul i cokke bedo yot nining?
3 In mono dong ilwongo lutino kwanni me Baibul me bino kwedi i cokke me kwano buk? Jo mukene ma gitye ki miti ento pe gimito bedo i cokkewa madito guromo bedo labongo lworo me bino i cokke matidi, tutwalle mogo ma nongo timme i gangi pa dano. Mer ma tye i kin dano miyo bedo yot bot jo matino ki manyen me miyo lagam. Kit macalo gurup man nongo tye ki wel dano manok-ki, watwero bedo ki kare mapol me miyo lagam kun wapako Jehovah.—Jab. 111:1.
4. Yub me cokke me kwano buk twero bedo kabedo ma rwatte i yo ma nining?
4 Cokke me kwano buk pol kare bedo i kabedo mapat pat ma nongo tye cok bot lutit kwena moni i wang ticgi. Kadi bed ni pe kiromo cimo dano ducu me cito i kabedo ma tye cok kwedgi, ento cokke me kwano buk ka ma kicimo piwa twero bedo cok makato cito i cokke mukene-ni. Ka ma cokke me kwano buk timme iye-ni romo bedo kabedo maber pi cokke me cito i tic me pwony.
5. Waromo nongo kony i tic me pwony ki bot lanen wi cokke me kwano buk nining?
5 Kony pi Tic me Pwony: Lanen wi cokke me kwano buk myero obed ki miti me konyo ngat acel acel me nywako i tic me pwony ki yomcwiny kare ki kare. Pi meno, en omyero otute me tic ki dano ducu ma gitye i gurup meno, kun konyogi i yo mapat pat i tic me pwony. Ka inongo ni yo me tic me pwony moni nyo calo dok cen ka limgi-ni pe yot, wek lanen wi cokkewu me kwano buk onge. Gwok nyo en oromo yubone ni wuti ki latit kwena mo ma tye ki ngec mapol i gurup meno. Ngecci me pwonyo lutino kwan me Baibul bimedde ka iketo cwinyi ka lubu yo maber me pwony pa lanen wi cokke me kwano buk ka en tye ka doro cokke me kwano buk.—1 Kor. 4:17.
6. Pingo omyero watute me nongo kony ki i yub me kwano buk?
6 Cokke me Kwano Buk pud dong obedo mic me mar ya! Yub man me mar ma oa ki bot Jehovah-ni konyo me gwokowa wek pe wapot woko ki i yo me cwiny i kare man ma kwo tek-ki.—Jab. 26:12.