Mi Gen bot Lucan
1 Yecu onyutu miti mo madok pat i kom jo ma onongo gitye lucan. I kare mogo en otiyo ki tango me minigi jami me kom dok ocango wa lutwo-gu, ento gin ma en oketo iye cwinye matek obedo tito ‘lok me kwena maber-ri’ bot lucan. (Mat. 11:5) Tic me pwony pa Lukricitayo i kare-ni bene pud tye ka konyo lucan ki jo mukene-ni bene.—Mat. 24:14; 28:19, 20.
2 Gen me Ada: Lupwonye pa Lukricitayo ata-ni pol kare gimiyo cikke bot lucan ni gibidoko lulonyo ka gimiyo mic madwong i kanica. Ento, Baibul pwonyo ni Ker pa Lubanga keken aye bigiko can dok cobo peko ducu ma dano tye kwede. (Jab. 9:18; 145:16; Ic. 65:21-23) Ka wanyutu bot lucan gin ma Baibul ada pwonyo, ci wamiyo botgi gen dok man konyogi me bedo ki yengo i yo me cwiny.—Mat. 5:3.
3 Luparicayo me kare pa Yecu gubedo ki cac i kom lucan, kun onongo gilwongogi ki leb mo me yet ni ‘am-ha·’aʹrets, nyo “dano me lobo.” Ento Yecu onongo neno “kwogi” calo gin ma “pire tek.” (Jab. 72:13, 14) Waromo poro Yecu kun ‘wanyutu kica’ i kom lucan ma kit meno ki nyutu mitiwa i komgi kacel ki pekogi. (Car. 14:31) Pe wamito ni walok leb marac i kom jo ma gibedo i kabedo ma lucan aye tye iye nyo komwa odok nyap me miyo caden botgi. Pol pa jo ma tye ka jolo lok me kwena me Ker-ri gubedo jo ma lucan.
4 Kony Lucan Kombeddi: Pwonyo lucan ma gitye i wang ticwa ki cik me Baibul bene konyogi me dwoko piny adwogi me can i kare-ni. Me labolle, Baibul kwero mero kongo, tuko calo goyo cente-gu, wac kom, mato taa, kacel ki tic mogo ma weko dano doko lucan. (Car. 6:10, 11; 23:21; 2 Kor. 7:1; Ep. 5:5) Ginacoya cuko cwiny dano me bedo jo ma loko lok ada dok gitiyo tic ki ‘cwinygi ducu,’ meno aye kodi kit ma ludito tic mito ki bot luticgi. (Kol. 3:22, 23; Ibru 13:18) Ki lok ada, i kare ma kipenyo ludito tic mogo, polgi guwacci gimito jo ma loko lok ada ki jo ma gene ka gitye ka yenyo lutic.
5 Jehovah paro mada pi peko ma lucan gitye kwede. Cokcok-ki Yecu Kricito bilaro ‘jo ma piny obwoyogi ma gikok bote pi kony.’ (Jab. 72:12) Ma nongo peya kare meno oromo, watye ki mot me kweyo cwiny jo mukene, ma i kine tye iye lucan, ki kwena me gen ma tye i Baibul.