Cuko Cwiny ma Bedo i Kinwa Kekenwa
1. Kare ango ma lim pa luneno ma giwoto awota miniwa?
1 Lakwena Paulo ocoyo bot kacokke ma i Roma ni: ‘Atye ka paro me nenowu mada, wek apok botwu mot mogo me cwiny me jingowu wek wubed matek, nyo ni wek cuko cwiny obed i kinwa kekenwa, kun nongo niyena bikonyowu, ki niyewu bene bikonya.’ (Rom. 1:11, 12) Lim pa luneno ma giwoto awota i kare-ni miniwa kare, weko ngat man cuko cwiny lawote.
2. Pingo kimiyo ngec pi lim pa laneno me adwol woko con?
2 Kacokke: Pol kare kimiyo ngec pi lim pa laneno me adwol bot kacokke ma nongo pud odong cabit adek anyim. Man miniwa kare me yubbe con wek wanong adwogi maber ki i limme. (Ep. 5:15, 16) Ka ibedo latic, iromo penyo ladit ticci me mini kare wek ibed ki kare me wot i tic me pwony i cabit meno. Jo mukene giyubbe me tic calo painia pi tutunu i dwe me lim meno. Ka onongo itye ki yub me cito ka mo, pe iromo loko yubbi wek ibed tye i cabit meno?
3. Ngo ma wan ki acel acel waromo timone i kare me lim-mi wek wanong cuko cwiny?
3 Gin mukwongo ma pire tek i lim pa laneno me adwol aye me miyo cuko cwiny ki dok miyo pwonnye i tic me pwony. Tika iromo penyo wek wuti kacel kwede nyo ki dakone ka en obedo ngat munyomme? Laneno me adwol pol kare maro tic ki lutit kwena mapat pat, ma tye iye jo ma pe tye ki ngec nyo diro i tic me pwony. Wan ducu waromo nongo pwony i kit me lok ki dano ki bote dok waromo tic ki tam mo keken ma en miniwa. (1 Kor. 4:16, 17) Ka ilwonge me nywako i cam kwedi ci bimiyi kare mukene me nongo cuko cwiny. (Ibru 13:2) Kit macalo pwonye ducu nongo tye lubbe ki kop ma mako kacokke-ni, ter iti iwiny maber.
4. Waromo cuko cwiny laneno me adwolwa nining?
4 Laneno me Adwol: Lakwena Paulo bene onongo rom aroma ki utmego mukene ma i kacokke ma en obedo ka limogi-ni. En bene obedo ki peko kacel ki par, pi meno en opwoyo cuko cwiny ma gumine. (2 Kor. 11:26-28) I kare ma kacokke ma i Roma guwinyo ni Paulo ma onongo tye lamabuc-ci obilimogi, jo mogo guwoto ka rwatte kwede wa i Cuk pa Appio, ma tye bor piny ma romo mairo 46 kulu! “Ka Paulo onenogi, opwoyo Lubanga ci cwinye odoko tek.” (Tic 28:15) In bene iromo cuko cwiny laneno me adwolwu. Nyutte ‘woro’ ki bedo ki mit kom i cwako kor yub me limme. (1 Tem. 5:17) Mi kun inyutu pwoc ma a ki i cwinyi pi tutene piri. En gin ki dakone gibibedo ki yomcwiny me neno niye, mar, kacel ki diyo cwinyi.—2 Tec. 1:3, 4.
5. Pingo wan ducu wamito cuko cwiny i kare ni?
5 I kare man ma ‘piny tye marac-ni’ anga ki i kinwa ma pe mito cuko cwiny? (2 Tem. 3:1) Mok tammi kombeddi me nywako i cabit me tic meno ki laneno me adwol. Wan ducu, luneno ma giwoto awota kacel ki lutit kwena, waromo cuko cwinywa kekenwa ki yomcwiny. I yo ma kit man wabimedde ki ‘cuko cwinywa kekenwa dok wakonnye kekenwa.’—1 Tec. 5:11.