Bedo ki Pwoc Madit i Kwero Nipo me Ginkok
1, 2. Pingo omyero wabed ki pwoc madit i kwero nipo me ginkok?
1 Pi lubu cik pa Yecu, Lukricitayo ma i but lobo ducu gibiribbe kacel ma nongo peya ceng opoto i Ceng Abicel Marci 22, 2008 pi kwero nipo me to pa Yecu Kricito. (Luka 22:19; 1 Kor. 11:23-26) Watimo man pi pwoc madit ma watye kwede pi gin ma otimme i nino meno mwaki 1,975 mukato angec. Yecu olonyo nying Wonne ki gwoko genene labongo roc mo kun wok ki i arem me to malit i kom yat, ma man omiyo lagam ma pud dong ber loyo i kom yet pa Catan.—Yubu 1:11; Car. 27:11.
2 Remo pa Yecu ma oony-nyi omoko gicikke manyen, kun yabo yo ki dano ma gitye ki roc me doko lutino pa Lubanga ma man miyogi gen me loc kacel ki Kricito i Kerre me polo. (Jer. 31:31-34; Mar. 14:24) Medo i kom meno, mar matut pa Lubanga pi dano bene onyutte ka maleng i kare ma en omiyo Wode ma en maro mada calo gitum, kit ma Yecu otito kwede bot Nikodemo.—Jon 3:16.
3. Jo ma bibedo i kwer me Nipo-ni gibinongo gin maber ango?
3 Lwong Jo Mukene: Ticwa Me Ker me Januari omiyo tam ni omyero waco nying dano kun wacwalo lwongo bot ngat acel acel. In dong icako lwongo jo ma i coyo nyinggi? Tika itye ka yubbe wek ibed ki kare muromo pi tic ma bicakke i Marci 1, me lwongo dano me bino i kwero Nipo? Jo ma bibedo tye gibiwinyo pwony ma a ki i Ginacoya ma romo dongo niyegi i kom ginkok, ka dok terogi i kwo ma pe tum.—Rom. 10:17.
4. Pingo omyero wao con i nino me kwero Nipo?
4 Jo ducu ma gitwero yubbe con omyero gubin ka jolo jo ma nongo gibino ma lubbe ki lwongo ma gunongo. Kit ma dano bedo pol i kare me kwero Nipo-ni, pire tek ni omyero wapar pi jo manyen kacel ki jo ma bino i cokke kicel kicel.
5. In iromo yubo cwinyi nining pi kwer man?
5 Yub Cwinyi: Buk me Examining the Scriptures Daily—2008 ki Kalenda me mwaka 2008 tye ki yub me kwano Baibul pi kare me Nipo kun cakke i Marci 17. Neno jami ma pigi tego ma obedo ka timme i kare me agikki me kwo pa Yecu i lobo-ni bikonyi me yubo cwinyi pi kwero Nipo. (Ejira 7:10) Lwodo lok me Baibul-li bimedo pwocci pi mar pa Jehovah ki pa Wode pi miyo ginkok.—Jab. 143:5.
6. Medo pwocwa pi ginkok-ki bikonyowa nining?
6 Ka nino me Nipo dong tye ka nyiko cok, wayubbe wunu maber dok wakony jo mukene bene me yubbe pi nino man ma pire tek-ki. Bedo ki pwoc madit i kwero nipo me ginkok bijingo wat i kinwa ki Jehovah gin ki Wode. (2 Kor. 5:14, 15) Dok bicwalowa bene me lubu lanengi i nyutu mar ki dyere pi konyo jo mukene.—1 Jon 4:11.