Bok Me Lapeny

◼ Kit ruk ango ma opore pi cito ka limo kabedo ma kitiyo kwedgi i tic pa Jehovah?

I twok lobo ducu, Odi me Ker, Odi me Gure, gangi me Betel, ki gedo me jang gang kal-gu ducu gubedo kabedo ma kidyerogi me tiyo tic pa Jehovah. Odi magi pe dok gubedo odi ma welgi tego mukato kare woko, odi ma gileng dok kigwokogi maber atika, pi meno kit ma ginen kwede kelo deyo. Man pokke mabor adada ka iporo ki jami ma tye i te yub pa Catan-ni. Ka walimo kabedo ma kitiyo kwedgi i tic pa Jehovah, omyero kinenwa macalo jo pa Jehovah, jo ma gitye ka timo mitine.

Macalo Lukricitayo, “wanyuto berwa kenwa macalo wan lutic pa Lubanga” i yo ducu, ma man tye iye ruk maber ki kit ma wanen kwede. (2 Kor. 6:3, 4) Dok mitte bene ni omyero wabed ki kit maber. Kare ducu rukwa ki kit ma wanen kwede omyero onyut woro ki deyo mupore pi lutic pa Lubanga Jehovah. Man mitte tutwal ka ce wabicito ka limo gang kal madit ma tye i New York kacel ki jang gang kalwa ma tye i twok lobo ducu.

I nyamo kit ma pire tek kwede ni rukwa kacel ki kit ma wanen kwede omyero obed i yo mupore, Organized to Do Jehovah’s Will tito ni omyero wabed leng i komwa, rukwa myero obed mupore, dok wanen maber ka watye i tic me pwony kacel ki cokke pa Lukricitayo. Ka dong pot karatac 138, paragraf 3 waco ni: “Wi myero opo ni nying man ni Betel-li te lokke ni ‘Ot pa Lubanga.’ Pi meno, rukwa, kit ma wanen kwede, ki kitwa myero obed ma rom aromo calo ka watye i cokkewa i Ot me Ker.” Lutit kwena me Ker-ri ma gibedo cok ki Betel nyo ma gia ki ka ma boco omyero gulub lok man ka gicito ka limone. I yo ma kit meno, nongo gitye ka nyutu pwoc ki woro ma rwatte kwede.—Jab. 29:2.

Rukwa omyero omi wanen calo jo ma “gilwonge kengi ni gin jo ma woro Lubanga.” (1 Tem. 2:10) Kit ma wanen kwede kacel ki rukwa weko jo mukene gineno woro pa Jehovah i yo maber. Ento dong otyeko nen ni omego ki lumego mogo girukke ki bongi macal ki me luriyo, ma pe ber, nyo ma nyutu dul komgi ma pe myero onen, ka gicito ka limo kabedo ma kitiyo kwedgi i tic pa Jehovah. Kodi ruk ma kit meno pe opore pi Lukricitayo i cawa mo keken. Pi meno, i kwowa mukene ducu macalo Lukricitayo, wamito ni wabed ki rwom ma poko jo pa Lubanga ki jo me lobo-ni, kun watimo jami ducu pi miyo deyo bot Lubanga.—Rom. 12:2; 1 Kor. 10:31.

Dong ka icito ka limo gang kal madit ki jang gang kal ma i New York State nyo jang gang mukene-ni, kadi bed onongo iyubo pire ayuba nyo itye ka limo piny i kare me yweyoni, penye kong kekeni ni: ‘Mono rukka kacel ki kit ma anen kwede tye mupore, maleng, dok ma rwatte ki kabedo ma abicito ka limone-ni? Tika kelo deyo i kom Lubanga ma aworo-ni? Mono kit ma anen kwede twero balo cwiny jo mukene?’ Omyero kare ducu ‘wami pwony pa Lubanga Lalarwa onen ma mwonya i jami ducu,’ ma man tye iye rukwa ki kit ma wanen kwede!—Tito 2:10.