“Wuting Yatta”
1 Wan watye ka bedo ma wanongo yweyo i lobo man ma keto lyeto i kom dano dok miyo gibedo ki par mapol-li, pi ye lwongo pa Yecu me bino ka nongo yweyo ki bote. (Mat. 11:29, 30) Ye tingo yat me bedo lapwonnye kwako nywako i tic mo ma pe yot ento keliwa yweyo. Man kwako tito pi kwena maber me Ker-ri ki konyo jo mukene me nongo yweyo kacel kwedwa i tingo yat pa Yecu ma yot-ti.—Mat. 24:14; 28:19, 20.
2 Yweyo ma Bino pi Tic me Pwony: Yecu pe olwongo lulub kore wek emed yecce i kom yecgi ma nongo gin gutingo con. Ento en olwongogi me loko yecgi ma pek-ki ki mege ma yot-ti. Par kacel ki kwo ma gen mo pe iye me lobo man pe dong diyowa; dok wan bene pe watiyo pi lonyo ma pe genne-gu. (Luka 21:34; 1 Tem. 6:17) Kadi bed ni omyero wati matek me nongo jami ma mitte pi kwowa me nino ducu, ento wan waketo woro Lubanga bedo gin mukwongo i kwowa. (Mat. 6:33) Kare ducu wabibedo ka nongo ni tic me pwonyi keliwa yweyo, dok pe nurowa, ka ce watero calo gin ma pire tek.—Pil. 1:10.
3 Pol kare, wan wamaro lok i kom gin mo keken ma nongo pire mit i cwinywa. (Luka 6:45) Lukricitayo ducu gitamo mada pi Jehovah kacel ki mot me Ker ma en ocikke pire. Pi meno, tito pi ‘kwena maber-ri’ labongo bedo ki par mapol pi kwowa me nino ducu ka watye ka nywako i ticwa me pwony, kweyo cwinywa mada! (Rom. 10:15) Ki lok ada, timo gin moni tyen mapol, miyo ngecwa me timone medde dok weko wacako nongo iye yomcwiny. Pi meno, tic ki kare malac me timo tic me pwony ka watwero, medo yomcwiny. Cwinywa bedo yom adada ka dano gijolo lok ma wapwonyogi kwede! (Tic 15:3) Kadi bed warwatte ki jo ma cwinygi nok nyo gitye ki adegadega i komwa, tic me pwony-nyi biminiwa yweyo i yo me cwiny ka ce waniang ni tutewa-ni yomo cwiny Jehovah dok ni adwogi mo keken maber bino pi motte.—Tic 5:41; 1 Kor. 3:9.
4 Ka waye lwongo pa Yecu-ni, ci wabibedo ki mot me tic kacel kwede calo Lucaden pa Jehovah. (Ic. 43:10; Yabo. 1:5) Pe tye gin mo ma romo keliwa yweyo makato meno!