Branch Letter

Bot Lutit Kwena me Ker Ducu:

Obedo me cuko cwiny tutwal me niang ni i kare ma rucurucu ma lubbe ki tim me wibye obedo i Kenya, omege me kaki mapat pat gunyutu mar me omego ma bene i kine mogo omego mukene gugwoko omegigi me kaki mukene. Pe tye omego mo ma orwenyo kwone, kadi bed ripot ma kinongo nyutu ni omego mogo gunongo awano i kare me rucurucu man. Kitute me miyogi kony me jami ma mitte ducu. Kombeddi-ni pol pa omego ma onongo guringo guweko pacigi dong gutyeko dok woko cen. Wapwoyo Jehovah pi konyowa me cung matek ma pe wacwako tung ka mo, kun wamedde ki nywako i tic me pwony kit me nino ducu ki dok wot i cokke kacel ki gure-gu.—Jon 15:19; Ic. 48:17, 18.

Ripot ma a ki i Burundi nyutu ni tic me pwony owoto maber adada i mwaka me ticwa mukato-ni. Pi dwe abongwen mukwongo me mwaka me ticwa mukato-ni, wel lutit kwena omedde ki pacen 9 kulu. I April, pacen 22 pa lutit kwena gutiyo i kit mapat pat me painia. Odi me Ker ma kiromo laco igi me 3 ki me 4 kigerogi i Rushubi ki Kinyinya. Tic mapol kono pud tye me atima i tic pa Jehovah.

I Sudan, tic me gero ot pi lumiconari i Juba tye ka wot maber. Omego mapol ma onongo gubedo luring ayela dong gutyeko dok woko cen Sudan kun ginongo jol maber atika ki bot kacokke. Wapwoyo Jehovah mada ni i Sudan watye labongo kigeng mo i lok me miyo worowa bote.

Utmego ma gitye i Tanzania gubedo ki yomcwiny mada me kobo i jang gang kalgi mamwonya manyen tung i agikki me mwaka me ticwa man. Man biweko tic medde i lobo man labongo akalakala mo.

I Uganda, Watchtower ma kiyubo pi lwak ma bino kingwen i mwaka acel i leb Luganda kijolo ki twon yomcwiny atika dok tye ka miyo caden maber adada i tic me pwony. Gangi aryo me gonyo leb pi leb Acholi ki Runyankore tye ka nyako nyige bot lugony leb wa ki kacokke ma giloko leb magi.

Cwinywa yom mada me nywako kwedwu ngec man. Wacwalo botwu mot me mar pa Lukricitayo kun walegiwu winyo maber.

Wan utmegiwu,

Jang gang kal me Burundi, Kenya, Tanzania ki Uganda