In Tika Iromo Medo Ticci?
1. Ngo ma mitte pi oyot i tic me pwony, dok pingo?
1 Inge neno kit ma dano mapol gitye kwede ki miti i kwena maber me Ker-ri, Yecu ociko lupwonyene ni “wuleg won poto wek ocwal lutic ka kayo kacce.” (Mat. 9:37, 38) Kit ma dong watye i cawa me agikki me kare me kac-ci, ticwa man mitte pi oyot ma kato kare mo keken. Man te lokke ni omyero watam kit ma waromo timo kwede tic mapol i tic me pwony.—Jon 14:13, 14.
2. Jo mukene gujolo lwongo pi mitte pa lutic madwong i tic me pwony nining?
2 Medo Ticwa me Pwony: Ki kony kacel ki tira pa Jehovah, jo mapol gunongo yot tutwal me cako tic macalo painia. (Jab. 26:2, 3; Pil. 4:6) Jo mukene gutute matek wek giti macalo painia pi tutunu pi dwe acel nyo aryo i mwaka acel. Man obedo yo acel maber me medo ticgi. Yomcwiny ma gunongo pi tic macalo painia pi tutunu omiyo jo mukene gutamo me tic macalo painia marii.—Tic 20:35.
3. Ka itiyo calo painia i kare mukato angec, ngo ma myero itam pire kombeddi?
3 Iromo Tic Macalo Painia Doki?: Ka ce ibedo ka tic macalo painia i kare mukato angec, ci wi nongo pud po i kom jami mabeco ma obedo ka timme i kare meno. Tika itamo matut me neno ka ce pud dok iromo tic macalo painia? Romo bedo ni gin ma omiyo iweko tic macalo painia-ni dong peke. Oromo bedo ni kombeddi dong itwero tic macalo painia doki.—1 Jon 5:14, 15.
4. Doggola me timo ngo ma tye ayaba pi wan ducu?
4 Tic me kac-ci tye ka medde anyim dok bene dong cok tum. (Jon 4:35, 36) Dong wan ducu omyero wanen kit ma watye kwede wek wange ka waromo nongo kare me medo ticwa me pwony. Ka ada wanongo ni pe waromo medo ticwa, waromo yenyo yo mapat pat wek pwonywa ogud cwiny dano. (Mar. 12:41-44) Man obedo twon mot madit atika pi jo ducu ma Jehovah twero tic kwedgi i tute man!—Jab. 110:3.