Wupak Jehovah Nino Ducu
1. Kicuko cwiny lutic pa Lubanga me timo gin ango, dok pingo?
1 Kabaka Daudi omoko tamme me pako Jehovah “nino ducu,” dok pi naka. (Jab. 145:2, 7, 21) Wan bene watye ki tyen lok ma pire tek me pako Jehovah nino ducu.—Jab. 37:10; 145:14, 18; 2 Pet. 3:13.
2. Jo me odi giromo pako Jehovah nining?
2 Pako Jehovah i Paciwa: Watye ki bukke mabeco ma konyowa me nyamo lok pa Lubanga kun nongo watiyo ki Baibul ka watye ka nyamo ginacoya me nino ducu, i Woro pi Jo me Ot, ki ka wayubbe pi cokke. Pol pa jo me odi gibedo kacel i cawa me cam nino ducu. Man obedo kare me boko lok mot labongo rune, man miyo kare maber me pako Jehovah. Lok ma kit meno ma lunyodo loko bot lutinogi romo bedo gin me kony me ‘pwonyogi ki dok nyebogi ki kit mabeco ma Jehovah pwoyo.’—Ep. 6:4; Nwo. 6:5-7.
3. Ngo ma waromo timone ka watye kacel ki omegiwa?
3 Kacel ki Omegiwa: Ka watye i tic me pwony nyo i cokke, nongo watye ki kare maber mada me pako Jehovah kacel ki luye luwotwa. (Car. 15:30; Pil. 4:8; Ibru 13:15) Kit macalo wan ducu wamaro Jehovah-ni, bedo yot botwa me nyutu pwoc ma a ki i cwinywa pi ber pa Jehovah ka watye ka boko lok i kinwa.—Jab. 106:1.
4. Mapat ki cito i tic me pwony, in iromo pako Jehovah nining?
4 Ka Watye ka Lok Bot Jo ma Pe Gin Luye: Kadi bed pe watwero nywako i tic me pwony nino ducu, tito pi Jehovah kacel ki yubbe pi dakika mo manok bot lutic luwotwa, lutino kwan luwotwa, ki jo ma wabedo cok kwedgi, romo miyo gen bot jo ma cwinygi atir. (Jab. 27:14; 1 Pet. 3:15) I wotte ki dege, lamego mo omiyo caden bot lawot lawote, man okweyo dok ocuko cwinye mada ma oweko en omiyo adrec ki namba cimme bot lamego-ni wek gimedde ki lok i kingi. Lutic pa Jehovah gitye ka “kelo lok maber me gin maber” bot jo ma gitye ki miti me winyone kadi bed jami maraco tye ka medde ameda i lobo-ni. Man miyo jo mukene gibedo ki gen dok gipako Jehovah.—Ic. 52:7; Rom. 15:11.
5. Pingo obedo mitiwa me pako Jehovah, dok man twero cobo gin ango?
5 Pud dong yomocwiny Jehovah ya ka luticce gipake nino ducu! Kit macalo cwec pa Jehovah murumowa gipake-ni, wan bene waromo miyo pak nino ducu ki i paci-wa, i cokke, ki ka watye ka lok ki jo ma peya guribbe kwedwa i pako Jehovah.—Jab. 19:1-4.