‘Mi Kwon-ni’ pi Konyo Lutino Kwan-ni
1. Gin ango ma mitte wek wakony latin kwanwa me Baibul?
1 Ka wamito konyo latin kwanwa me Baibul me o wa i dyere, pe myero watam ni kwano Baibul kwede kare ducu keken aye pire tek. Lakwena Paulo oporo wat ma tye i kin en ki jo ma en opwonyogi ki wat ma tye i kin mego ki lutino ma en gwokogi maber. Wan bene watye ki yomcwiny matek mada me miyo “kwowa ducu” pi konyo lutino kwanwa.—1 Tec. 2:7-9, Baibol pa Katoli.
2. Pingo myero wanyut miti, dok wan watwero nyutone nining?
2 Nyut Miti i Kome: Ka latin kwan me Baibul ocako keto jami ma pwonyo i tic, cwiny ma ngolle kop twero cako juko bedone kacel ki jo ma pe gilubu cik me Baibul. (1 Pet. 4:4) Lupacone guromo kwere woko. (Mat. 10:34-36) Wan watwero culo bur ma odong-ngi ki nyuto miti i komgi. Lamiconari mo mucwiny omiyo tamme kit man ni: “Pe irune me a woko oyotoyot i nge kwanwu. Ka twere, bed ibok lok pi kare mo kong.” Bed ma iyubbe me miyo kony bot latin kwan-ni. Me labolle, ka kom latin kwanni-ni lit, iromo limo en nyo goyo bote cim? Ka twere, iromo bedo kacel kwede i kare me cokke kun ikonye ka tye ki lutino.
3. Watwero konyo latin kwanwa wek ocak nongo cuko cwiny ma a ki i kacokke nining?
3 Kony ma a ki i Kacokke: Ka itye i tic me pwony cok ki ka ma latin kwanni bedo iye, pingo pe icito ka limme kong pi cawa mo manok kun inyutu bote dano ma itye ka tic kwede i nino meno? Ka twere, ter lutit kwena mapat pat wa ki luelda ka icito ka kwan kwede. Dok bene, ka icako kwan ki latin kwan mo, cuk cwinye cut cut wek ocak wire i cokke i Ot me Ker. Man twero konyo en me mako lirem mabeco i kin jo me kacokke ma giromo doko lupacone i yo me cwiny.—Mar. 10:29, 30; Ibru 10:24, 25.
4. Adwogi ango ma watwero nongone ka watute matek?
4 Lanyodo ma pe ol ki konyo lutinone i yo me cwiny bedo ki yomcwiny madit ka guyero me cung tung bot Jehovah kun giwoto i ada. (3 Jon 4) Wan bene watwero winyo yomcwiny ma kit meno ka wamiyo kwowa me konyo lutino kwanwa me Baibul.