Lunyodo—Wupwony Kit Mabeco i Cwiny Lutinowu
1 Pe ni dong kinywalo dano anywala ki kit mabeco cut nyo ni wanongo kit man atura. Pwonyo lutino ki kit mabeco tero kare. “Pwony” te lokke ni “bedo ka miyo ngec mot mot pi kare malac” nyo “weko ngec odony mot mot i wi ngat moni.” Bedo ka nwoyo pwony moni kare ki kare mitte ka lunyodo mito ‘pwonyo dok nyebo kit mabeco ma Rwot [Jehovah] pwoyo’ i cwiny lutinogi.—Ep. 6:4.
2 Cak ma Latin Pud Tidi: Kit ma lutino matino twero pwonyo ki dok timo kwede jami manyen kelo ur bot dano. Kadi bed ni jo madito ginongo ni pwonyo leb manyen tek adada, lutino ma peya gucako wot i cukul giromo pwonyo leb aryo nyo adek lawang acel. Pe itam ni latinni tidi tutwal ma pe romo dongo kit mabeco. Ka kicako pwoyogi lok ada me Baibul con kun kimedde ki pwony man, kare ma latin tye ki mwaka manok, adamme bipong ki ngec ma miye ‘ryeko ma tere i larre.’—2 Tem. 3:15.
3 Wek Wot i Tic me Pwony Odok Kiti: Kit acel ma pire tek me pwonyo latin i mwaki ma en tye ka dongo aye tito kwena me Ker pa Lubanga kare ducu. Lunyodo mapol gicako tero lutinogi i tic me pwony i ot ki ot ma nongo gin pud tino. Ka lunyodo nywako i tic me miyo caden kare ducu ci man konyo lutinogi me dongo pwoc ki mit kom pi tic man. Lunyodo giromo nyutu ki lutinogi kit me miyo caden i yo mapat pat ma watiyo kwedgi i tic me pwony.
4 Donyo i Cukul me Tiokraci bene konyo lutino. Timo man weko gipwonyo kit me kwan maber dok konyogi me niang gin ma gikwano. Gin pwonyo kit me lok i kom Baibul, dok cen ka lim, ki bene kit me kwano Baibul ki dano. Pwony ma kit meno romo cuko cwinygi me doko painia ki bene me mine pi ticwa mukene ma kite dok pat. Dano mapol ma gitiyo i Betel ki dok lumiconari wigi po kom kit ma gudonyo kwede i Cukul me Tiokraci ma pud gitino dok gineno ni cukul man okonyogi me dongo kit mabeco.
5 Wan ducu watye calo lobo agulu i cing Lacwec Madit, Jehovah. (Ic. 64:8) Lobo agulu ma pud dyak aye cweyone bedo yot. Ka omedde ki two, ci medde ki doko tek. Tye ma rom aroma ki dano bene. Ka pud gitino, nongo giyom adada—dok pwonyo latin ma tidi adada aye kelo adwogi maber loyo. Mwaki ma nongo pud giyom-mi aye kare ma gicako dongo iye, kare ma iromo cweyo kitgi wek gibed maber nyo marac. Macalo lanyodo ma lamar, cak pwonyo lutinoni con kit mabeco i tic me pwony pa Lukricitayo.