Lega ki Lwodo Lok Mitte Bot Lutit Kwena ma Lumit Kom
1. Ngo ma okonyo Yecu pe me wiro tamme ki i ticce ma pire tek-ki?
1 Yecu onongo obedo ka cango dano i wi otyeno. I kare ma lupwonnyene gunongo en orwone, guwacce ni: “Dano ducu gitye ka yenyi,” kun gicuko cwinye me medde ki timo tango. Ento, Yecu pe oye ni gin mo owir tamme ki i ticce ma pire tek me tito kwena maber-ri. En ogamo ni: “Dok wakobu woko i gang mukene ma tye cok ki kany, wek acitit lok kunnu bene; pien meno en aye gin mumiyo abino.” Ngo ma okonyo Yecu me ciko wange i kom tic-ci? En oa odiko con ka lega ki dok lwodo lok. (Mar. 1:32-39) I yo ango ma lega kun walwodo lok bene twero konyowa me bedo lutit kwena ma lumit kom?
2. Ngo ma watwero lwodo lok i komgi pi konyowa me bedo ki mit kom i tic me pwony?
2 Lwodo Lok i Kom Ngo? Yecu onongo oneno ni dano gitye “calo romi ma lakwatgi pe.” (Mat. 9:36) I yo acel-lu, watwero tam i kom kit ma kwena maber-ri mitte kweda bot dano. Waromo tam i kom kit ma kare dong odic kwede woko. (1 Kor. 7:29) Watwero tam matut i kom tic kacel ki kit pa Jehovah, mot madit ma watye kwede me bedo Lucaden pa Jehovah, ki lonyo madit ma watye kwede me nongo pwony i kom lok pa Lubanga ma dano me wang ticwa pe gingeyo.—Jab. 77:11-13; Ic. 43:10-12; Mat. 13:52.
3. Watwero lwodo lok i kare mene?
3 Lwodo Lok i Cawa Mene? Jo mogo gia con ma nongo piny oling mot, calo Yecu. Jo mukene ginongo ni ber ma loyo me lwodo lok i otyeno ma nongo peya gicito ka buto. (Acak. 24:63) Kadi bed tic makowa adada, pud watwero nongo kare me lwodo lok. Jo mogo ginongo kare ka gitye ka wot ki giwot ma lwak tiyo kwede. Mukene gitiyo ki but cawa me yweyo pi cam me dye ceng pi tamo tam matut labongo ayela. Jo mukene ginongo ni lwodo lok kadi pi dakika manok ma nongo peya gicito i tic me pwony, konyogi me tito kwena ki mit kom dok ki tekcwiny.
4. Pingo omyero walwod lok?
4 Lwodo lok kun walego medo mitiwa me tic pi Jehovah, miyo waneno worowa calo gin ma pire tek loyo i kwowa, kun jingo moko tamwa me medde ki tito kwena. Yecu ma obedo Lapwony Madit ma Lubanga ocwalo onongo adwogi maber ki i lwodo lok, wan bene wabinongone.