‘Wuwek Derowu Omeny Piny’
1. Watye ki mot me nywako gin ango?
1 Cakke i rupiny nio wa i potoceng, mwonya pa dero ceng ma ryeny kelo pak bot Lubanga Jehovah. Ento, onongo tye dero mapat ma Yecu okwayo lupwonnyene me nongone—‘dero me kwo.’ (Jon 8:12) Bedo ma waniang jami me cwiny tye mot ma kite dok pat ma kwako tic ma pigi tego. Yecu ociko ni: ‘Wun bene wuwek derowu omeny piny bot dano’ wek gunong adwogi mabeco. (Mat. 5:16) I kare man me col piny me cwiny-nyi, dero man myero oryeny, dok pud dong mitte loyo! Macalo Yecu, wan kono watwero menyo derowa nining?
2. Yecu onyuto ni pire tek me nywako lok me ada nining?
2 Ki Tito Lok me Kwena: Yecu otiyo ki cawa, kero, ki jami ma onongo tye kwede me menyo dero me lok ada bot dano i pacigi, ka ma dano mapol gigure iye, ki i wi godi—ka ma ginonge iye. En oniang adwogi maber ma bino ki i menyo dero me cwiny. (Jon 12:46) Wek guo bot dano mapol, Yecu oyubo lupwonyene me bedo macalo ‘dero me lobo.’ (Mat. 5:14) Gin guweko derogi omeny i kare ma gutimo jami mabeco bot jiranigi ki dok ma gunywako lok me ada.
3. I yo ango ma waromo nyuto pwoc ma a ki i cwinywa pi dero me ada?
3 Jo pa Lubanga gitero kop man me ‘kwo calo lutino me dero,’ calo gin ma pire tek mada dok gitito lok me kwena man ka mo keken ma dano tye iye. (Ep. 5:8) Kadi kwano Baibul nyo bukkewa ka ma dano nenowa iye, i kare me yweyo manok ki i dog tic nyo i cukul, romo yabo yo me nyamo lok i kom Ginacoya ki ngat mo. I yo acel-lu, lamego mo ma pud tidi ocako kwano Baibul ki ngat mo, dok opoko bukkewa bot lutino kwan luwote 12 kulu!
4. Pingo ‘weko ni derowa omeny’ kwako lanen me kit maber?
4 Ki Tiyo Tic Mabeco: Weko ni derowa omeny bene kwako kitwa me nino ducu. (Ep. 5:9) I dog tic, cukul ki kabedo mukene ma guro wi dano mapol, kit pa Lakricitayo nen ka maleng dok yabo yo me nywako lok ada me Baibul ki dano. (1 Pet. 2:12) Me labolle, ber kit pa latin awobi mo me mwaka abic omiyo lapwonnye ogoyo cim bot lunyodone. En owacci, “I kwona, pud pe anongo latin macalo man, ma niang maber apokapoka i kin kit matir ki kit ma pe atir!” Adada, ticwa me pwony ki ber kitwa romo ywayo tam pa dano me neno ‘dero me kwo’ dok miyo giketo deyo i kom Lubangawa.