Kony Rwod Ot Wek Onyam Lok Matut
1. Yo me pwony mene maber loyo i ticwa pwony-nyi?
1 Yo me pwony mene maber loyo i ticwa me pwony, ma tugo pyem, nyo ma konyo rwod ot me nyamo lok matut dok me moko tamme i kom niango matir? Lakwena Paulo otiyo ki yo me aryone-ni i kare ma tye ka lok ki Lujudaya i Tecalonika, “ci jo mukene i kingi lok ocobo cwinygi.” (Tic 17:2-4) Nyamo lok matut ki dano kwako gin ango?
2. Waromo lubu lanen pa Paulo ka watye ka nywako lok me kwena maber-ri nining?
2 Par pi Tamgi ki Kit me Kwogi: Ka waniang maber tam pa jo ma gitye i wang ticwa, ci bikonyowa ki nyamo lok kwedgi i yo matut. Paulo ocako lok bot Lugrik ma pe guye i Areopago, ki lok i kom jami ma nen calo onongo gingeyo dok gijolo. (Tic 17:22-31) Pi meno, ka wutye ka yubbe me cako lok, wutam i kom jami mogo ma pol pa dano me wang ticwu giye ki ma gidag. (1 Kor. 9:19-22) Ka rwod ot ocako pyem, tem nongo ka ma wun ducu wuye iye, ci icak lok kakenyu.
3. Yo ango maber ma waromo tic ki lapeny me nyamo lok matut ki dano?
3 Ti ki Diro i Penyo Lapeny: Pe waromo konyo lawot ma orwenyo me o ka ma cito iye ka pe wangeyo nying kabedo ma en tye iye-ni. I yo acel-lu, pe waromo konyo rwod ot me moko tam matir nikwanyo ka wangeyo tamme wiati. Yecu pol kare kong openyo lapeny wek enge tam pa ngat ma winye, ci i ngeye dong onyamo lok matut kwede. Me laporre, i kare ma ngati moni openyo Yecu ni, “Atim ango wek alim kwo ma pe tum?,” Yecu kong openyo tam pa laco meno, ma peya omiyo lagam. (Luka 10:25-28) I nino mukene, i kare ma Petero omiyo lagam ma pe tye atir, Yecu otiyo ki diro i penyo lapeny ma okonyo me tiro tamme. (Mat. 17:24-26) Dong, ka rwod ot openyo lapeny nyo omiyo tam ma pe tye atir, waromo tic ki lapeny me konyo en ki nyamo lok matut i kom gin moni.
4. Pingo myero wakony rwod ot me nyamo lok matut?
4 Ka wakonyo rwod ot me nyamo lok matut, ci walubo lanen pa Yecu, Lapwony Madit, kacel ki lupwonye mukene ma ludiro me cencwari me acel. Waketo deyo i kom rwod ot dok wanyutu woro bote. (1 Pet. 3:15) Adwogine twero bedo ni en bijolowa me lime doki.