Tika Itye ka Pwonye i Yo Ducu ki Bot Jehovah?

1. Jehovah tero lok me pwonye nining?

¹ Jehovah ‘Lapwonywa Madit,’ mito ni wabed ma wapwonnye. (Ic. 30:20) En ocako pwony i nge cweyo Latin kayone. (Jon 8:28) I nge jemo pa Adam, Jehovah pe ojuko ticce me pwony, ento ki mar madit en omiyo cik me aluba bot dano ma gitye ki roc-ci.—Ic. 48:17, 18; 2 Tem. 3:14, 15.

2. Yub me pwonye ango ma tye ka wot anyim i kareni?

² I kareni Jehovah tye ka miyo pwonye mo ma pud dong dit loyo kit pwonye mo keken i tekwaro pa dano. Kit macalo lanebi Icaya otito kwede, dano milion mapol ma i twok lobo ducu gitye ka mol gicito i wi “got me ot pa [Jehovah].” (Ic. 2:2) Pingo gicito kunu? Wek kipwonygi yo mere, ada wek Jehovah aye opwonygi! (Ic. 2:3) I mwaka me ticwa me 2010, Lucaden pa Jehovah gucwalo cawa makato bilion 1.6 i miyo caden ki pwonyo dano lok ada me Baibul. Medo i kom meno, cabit acel acel kimiyo pwony i kacokke makato 105,000 i lobo ducu, dok bukke pa lagwok ot ma lagen tye i leb mapat pat makato 500.

3. Adwogi maber ango ma in dong inongo ki i pwonye ma Jehovah miyo?

³ Nong Ber-re i Yo Ducu: Pud dong wanongo adwogi maber ki i pwony pa Lubanga ya! Wapwonyo ni Lubanga tye ki nyinge dok ni en paro piwa. (Jab. 83:18; 1 Pet. 5:6, 7) Pwonye man omiyo wangeyo lagam me lapeny mogo ma pigi tego calo: Pingo dano limo can dok gito? An atwero nongo yomcwiny nining i kwona? Kwo mono tye ki tyen lok mo? Jehovah bene miniwa tira ma konyowa dok ‘bimiyo nyimwa bedo maleng.’—Yoc. 1:8.

4. Yub me pwonye ango ma tye pi lutic pa Lubanga, dok pingo myero wanong pwonye ki bot Jehovah i yo ducu ma watwero?

⁴ Medo i kom meno, Jehovah oketo yub ma kite dok pat me konyo luticce wek gumed ticgi pire. Pot karatac 4-6 kiryeyo iye yub me pwonye mogo ma tye. Kadi bed watye ki ariya mogo ma gengowa me nongo pwonye magi ma kiryeyogi malo-ni, tika watye ka nongo ber pa pwonye mukene ma watye agonya me nongone? Tika watye ka cuko cwiny jo matino me keto yub me cwiny ki yelle pi nongo pwonye ma pud dong ber loyo—ma en aye pwony ma Lubanga miyo, ma ka lubo tam ma lupwonyegi me cukul miyogi me yenyo pwonye i rwom ma lamal? Nongo pwonye i yo ducu ki bot Jehovah bikonyowa me bedo ki kwo me yomcwiny kombeddi ki kwo ma pe tum ma tye anyim.—Jab. 119:105; Jon 17:3.

Pwonye Mogo ma Dul pa Jehovah Miyo

Kilaci me Pwonyo Coc ki Kwan

• Ticce: Pi pwonyo dano kwan ki coc wek gubed jo ma giromo kwano Baibul ki dok pwonyo dano ki lok me ada.

• Kare ma Cwalo: Kare ma kineno ni opore.

• Ka ma Bedo Iye: Ot me Ker.

• Angagi ma Cito Iye: Tye pi lutit kwena ki jo ma gitye ki miti.

• Kit me Cone Pire: Luelda me kacokke aye giyubo kilaci man ka ce mitte, dok gicuko cwiny dano ducu ma gimito nongo pwonye man me donyo iye.

Cukul me Tiokraci

• Ticce: Me pwonyo lutit kwena wek gubed jo mucwiny i tito ki pwonyo lok me kwena maber-ri.

• Kare ma Cwalo: Tye pi kare ducu.

• Ka ma Bedo Iye: Ot me Ker.

• Angagi ma Donyo Iye: Lutit kwena ducu. Ki jo mukene ma gibino i cokke kare ducu, gicwako pwony me Baibul, dok yo me kwogi rwatte ki cik pa Lukricitayo.

• Kit me Cone Pire: Peny lador Wi Cukul me Tiokraci.

Kilaci me Pwonyo Leb Mukene

• Ticce: Me pwonyo lutit kwena kit me tito kwena maber-ri i leb mukene.

• Kare ma Cwalo: Dwe abic. Pol kare bedo i Ceng Abicel odiko pi cawa acel nyo aryo.

• Ka ma Bedo Iye: Polle, bedo i Ot me Ker ma tye cok.

• Angagi ma Cito Iye: Lutit kwena ma gitye lanen maber ma gimito tito pi kwena maber-ri i leb mukene.

• Kit me Cone Pire: Kilaci man jang gang kal aye yubo ka mitte.

Tic me Gero Odi me Ker

• Ticce: Tye me gedo ki roco Odi me Ker. Man pe obedo cukul, ento yub man pwonyo jo ma gujalo karegi diro mapat pat me wek gukony tic me gedo.

• Kare ma Cwalo: Lubo kare ma ngat moni ma ojalle tye kwede.

• Ka ma Bedo Iye: Ka mo keken ma Komitti ma Loyo Lok kom Gedo me Rijon ocimo nyo ka ma Gurup ma Gedo Ot me Ker tye ka tic iye. Jo mogo ma gujalle dok kiromo lwongogi me miyo kony ka mo mabor ma peko opoto iye atura.

• Ngat ma Oporre pi Tic Man: Omego ki lumege ma dong gunongo batija dok luelda guye ni gupore. Giromo bedo jo ma gitye ki diro me tic nyo ma gipe ki diro me tic.

• Kit me Cone Pire: Pong fom me Kingdom Hall Volunteer Worker Questionnaire (S-82) nyo me Application for Kingdom Hall Construction Volunteer Program (A-25) ma luelda me kacokkewu aye gimiyo.

Cukul me Pwonyo Painia

• Ticce: Pi konyo painia wek ‘gucob ticgi ducu kakare.’—2 Tem. 4:5.

• Kare ma Cwalo: Cabit aryo.

• Ka ma Bedo Iye: Jang gang kal aye moko; pol kare bedo i Ot me Ker ma tye cok.

• Ngat ma Oporre pi Cukul Man: Tye pi jo ma kong gutiyo macalo painia marii olo pi mwaka acel.

• Kit me Cone Pire: Painia ducu ma gupore gitye agonya me cito i cukul man tekke gunongo ngec me lwongo ki bot laneno me adwol.

Cukul pi Jo ma Gudonyo Nyen i Betel

• Ticce: Cukul man kiyubo me konyo jo ma pud gudonyo nyen wek gutim tic me Betel maber.

• Kare ma Cwalo: Cawa acel i cabit acel acel, pi cabit apar wiye abicel.

• Ka ma Bedo Iye: I Betel.

• Ngat ma Oporre pi Cukul Man: Myero gubed jo ma kilwongogi me tic i Betel pi kare malac, nyo pi tutunu (ma dong gutiyo pi mwaka acel nyo makato).

• Kit me Cone Pire: Jo ma gitye i Betel ma gupore pi cukul man kimiyogi ngec.

Cukul me Ticwa me Ker

• Ticce: Me pwonyo luelda ki lukony kor tic wek gumi tira kacel ki timo ticgi pi kacokke maber. (Tic 20:28) Cukul man gitimo i nge mwaka mogo ma lubbe ki kit ma Lukiko Madit omoko kwede.

• Kare ma Cwalo: Pi mwaki mukato macok cok-ki, luelda gicwalo nino acel ki nucu ki dok lukony kor tic gicwalo nino acel i kwan man.

• Ka ma Bedo Iye: Ot me Ker ma tye ka cok nyo Ot me Gure.

• Ngat ma Oporre pi Cukul Man: Luelda nyo lukony kor tic.

• Kit me Cone Pire: Laneno me adwol aye lwongo luelda ki lukony kor tic ma gupore pi cukul man.

Cukul pi Lueldaa

• Ticce: Pi konyo luelda wek gutim ticgi i kacokke maber.

• Kare ma Cwalo: Nino abic.

• Ka ma Bedo Iye: Jang gang kal aye moko; pol kare bedo i Ot me Ker nyo i Ot me Gure macok.

• Ngat ma Oporre pi Cukul Man: Myero ibed laelda.

• Kit me Cone Pire: Jang gal kal aye lwongo luelda ma gupore.

Cukul pi Luneno ma Giwoto Awota ki dok Mongib

• Ticce: Pi medo ngec pa luneno me adwol ki me distrik i kit me tic pi kacokke, ki me “yelle ka tito lok ki pwonyo dano,” ki dong kwayo lwak ma gigwoko maber.—1 Tem. 5:17; 1 Pet. 5:2, 3.

• Kare ma Cwalo: Dwe aryo.

• Ka ma Bedo Iye: Jang gang kal aye moko.

• Ngat ma Oporre pi Cukul Man: Myero ibed laneno me adwol nyo laneno me distrik.

• Kit me Cone Pire: Jang gang kal aye cwalo lwongo man bot luneno me adwol ki me distrik kacel ki mongi.

Cukul me Baibul pi Omege ma Wigi Nonoc

• Ticce: Pi yubo luelda ki lukony kor tic ma wigi nono wek gubed ki ngec me medo ticgi i kacokke. Jo ma gutyeko kwan man kicwalogi ka ma can lutit kwena tye iye i lobogi. Jo manok i kingi kiromo cwalogi i lobo mukene, ka gitye atera me cito kunnu.

• Kare ma Cwalo: Dwe aryo.

• Ka ma Bedo Iye: Jang gang kal aye moko; pol kare bedo i Ot me Gure nyo i Ot me Ker.

• Ngat ma Oporre pi Cukul Man: Omege ma gitye i kine ka mwaka 23 nio i mwaka 62 ma komgi yot dok gitye ki miti me cito ka timo tic me Ker-ri ka ma can lutit kwena tye iye. (Mar. 10:29, 30) Myero gubed jo ma dong kicimogi pi timo tic i kacokke pi mwaka aryo olo.

• Kit me Cone Pire: Ka cukul man dong tye i kabedo me jang gang kalwu, kitimo cokke mo pi jo ma gimito cito i cukul man i kare me gure me adwol. Ngec ma kwako lok kom cukul man kibimiyone i cokke meno.

Cukul me Baibul pi Jo Munyommed

• Ticce: Me miyo pwonye ma kite dok pat pi jo munyomme wek gubed me kony bot Jehovah ki dulle. Jo ma gutyeko kwan man kicwalogi ka ma can lutit kwena tye iye i lobogi. Jo manok ki i kingi kiromo cwalogi i lobo mukene ka gitye atera me cito kunnu.

• Kare ma Cwalo: Dwe aryo.

• Ka ma Bedo Iye: Kilaci mukwongo kitye ka timone i Watchtower Educational Center i Patterson, New York, i Amerika. Lacen cukul man kibitimone i kabedo mapat pat ma jang gang kal omoko, i Ot me Ker nyo i Ot me Gure.

• Ngat ma Oporre pi Cukul Man: Jo munyomme ma gitye i kine ka mwaka 25 nio i mwaka 50, ma komgi yot, gitye agonya me tic ka mo keken ma lutit kwena nok iye dok gitye ki cwiny man ni “An ene; ora.” (Ic. 6:8) Medo i kom meno, myero gubed jo ma dong gurii i nyomgi olo pi mwaki aryo dok bene gitye i tic pi kare malac olo pi mwaki aryo labongo gikone.

• Kit me Cone Pire: Ka cukul man dong tye i kabedo me jang gang kalwu, cokke mo tye i gure me nino acel pi jo ma gitye ki miti me donyo i cukul man. Ngec ma kwako lok kom cukul man kibimiyone i cokke meno.

Cukul me Gilead

• Ticce: Me pwonyo painia ki jo mukene ma gitye ka tic pi kare malac me doko lumiconari.

• Kare ma Cwalo: Dwe abic.

• Ka ma Bedo Iye: Watchtower Educational Center, i Patterson, New York, Amerika.

• Ngat ma Oporre pi Cukul Man: Luot ma dong gunongo batija olo mwaka adek angec dok mwakagi tye i kine ka mwaka 21 me o i 38 ka gitye ka pongo fom man tyen mukwongo. Myero gubed jo ma giloko leb Muno, gurii i nyomgi olo pi mwaki aryo, dok nongo gutiyo i tic pi kare malac pi olo mwaki aryo labongo gikone. Ngat ma pongo fom man myero obed dano ma kome yot. Painia ma gitiyo i lobe mukene (kadiwa ma dong gitiyo calo lumiconari); luneno ma giwoto awota, jo ma gitiyo i Betel; ki jo ma con gupwonye i Cukul pi Luelda ki Lukony Kor Tic, Cukul me Baibul pi Omege ma Wigi Nono, ki Cukul me Baibul pi Jo Munyomme bene giromo cone pi cukul man.

• Kit me Cone Pire: I jang gang kal mogo, kitimo cokke pi jo ma gitye ki miti me cito i cukul man i kare me gure me distrik. Ibinongo ngec mapol i kom cukul man i cokke meno. Ka i lobowu cokke meno pe kitimo i gure me distrik kun itye ki miti me cone pi cukul man, iromo coyo waraga i jang gang kal pi nongo ngec ma kwako kop man.

Cukul pi Lumemba me Komitti me Jang Gang Kal ki Mongi

• Ticce: Pi konyo omege me Komitti me Jang Gang Kal wek gubed jo ma neno wi tic i Betel maber, gineno kop ma mako tic i kacokke, gineno kit ma tic woto kwede i adwol ki distrik ki wang ticgi ducu, kun bene gineno tic me gonyo leb, goyo bukkewa, cwalo bukkewa i kabedo ma mitte kacel ki doro tic mogo ma kitiyo i Betel.—Luka 12:48b.

• Kare ma Cwalo: Dwe aryo.

• Ka ma Bedo Iye: Watchtower Educational Center, i Patterson, New York, i Amerika.

• Ngat ma Oporre pi Cukul Man: Lamemba me Komitti me Jang Gang Kal nyo Komitti me Lobo moni nyo ka kicimo ngat moni me timo tic meno.

• Kit me Cone Pire: Lukiko Madit aye lwongo omege magi ki mongi.

[Footnotes]