Kit ma Pire Tek Loyo me Bedo Lapwony Maber
1. Kit ango ma pire tek loyo me bedo lapwony maber?
1 Gin ango ma weko ngat moni bedo lapwony Baibul maber? Pwonye me cukul? Kwo ma iwok ki iye? Diro ma kinywalli kwede? I ada, obedo cik ma ribo cik ducu, ma nyutu lupwonnye pa Yecu, dok ma obedo kit pa Jehovah ma pud dong pire tek loyo. (Jon 13:35; Gal. 5:14; 1 Jon 4:8) Kit meno aye mar. Lupwonye mabeco ginyutu mar ma kit meno.
2. Pingo pire tek piwa me maro dano?
2 Maro Dano: Lapwony Madit Yecu, onyuto mar pi dano dok man onyiko dano cok bote. (Luka 5:12, 13; Jon 13:1; 15:13) Ka waparo pi dano, ci wabikwanyo kare me miyo caden botgi. Ariya macalo aunauna ki cac i komwa pe bijuko mar ma wanyutu. Wabibedo ki miti i kom jo ma watito lok botgi, kun nongo wapwonyogi i yo ma lubbe ki mitigi. Wabijalo cawa muromo me kwan ki latin kwan acel acel ki dok me yubbe con pi kwan kwedgi.
3. Maro lok me ada me Baibul konyowa nining i tic me pwony?
3 Mar Lok Ada me Baibul: Yecu bene omaro ada me Baibul dok otero macalo lonyo. (Mat. 13:52) Ka wamaro lok me ada ci wabibedo ka lokone ki mit kom dok biyomo cwiny jo ma winyowa. Mar ma kit meno biweko waketo tamwa i kom ngec ma pire tek ma watye kwede ma ka neno gorowa, dok man bikonyowa me lweny ki lworo i tic me pwony.
4. Waromo dongo mar nining?
4 Kit me Dongo Mar: Waromo dongo mar pi dano nining? Ki lwodo lok i kom mar ma Jehovah ki Wode gunyuto ki dok kit ma dano me wang ticwa gitye kwede labongo ngec mo i kom Baibul. (Mar. 6:34; 1 Jon 4:10, 11) Marwa pi lok ada me Baibul bimedde ka wakwano Baibul piwa kenwa dok walwodo lok ma iye kare ki kare. Mar obedo but nyig ma nyak pi cwiny maleng. (Gal. 5: 22) Pi man myero wakwa Jehovah pi cwiny mere maleng pi kony me dongo kit me mar. (Luka 11:13; 1 Jon 5:14) Labongo paro pi pwonye me cukul, kwo ma wawok ki iye calo Lukricitayo me ada, ki dong diro ma kinywalowa kwede, waromo bedo lupwonye mabeco ka wanyuto mar.