Jo me Odi Mono Gitye ka Yubbe pi Bwot?
1 Lok pa lunebi me Baibul ma otyeko cobbe nyutu ni agikki pa lobo man marac-ci dong tye ka bino oyotoyot. Wan dong watye ka kwo i kare marac ma rom aroma ki kare ma onongo Pii Aluka cok corre i lobo. (Mat. 24:37-39) Nua obwot i kare me tyeko lobo macon meno pien en “obedo ka wot kacel ki Lubanga.” (Acak. 6:9) Nua myero obed ni opwonyo jo ma i ode ki yo pa Jehovah pien gin bene gubwot. I yo ma nining ma waromo poro kwede Nua kun wayubbe macalo jo me ot pi bwot ki i agikki pa lobo man marac-ci?
2 Latit Lok me Kit ma Atir: Nua odiyo cwinye pi mwaki ma romo 40 me o 50 kulu macalo “latit lok me kit ma atir.” (2 Pet. 2:5) Omyero obed ni jiranine gubedo ka ngalo ticce me tito kwena-ni angala. Kono onongo lumalaika ma lujemo ma gulokke-ni aye gubedo ka dorogi nyo pe, pe ngene. Pol kare warwatte ki jo ma cwinygi nok nyo gingalo ticwa me ker-ri angala, ma meno nyutu ni agikki me lobo-ni dong tye cok. (2 Pet. 3:3, 4) Ento dano mapol i kare-ni gitye ka jolo lokwa kun ‘gimol gibino’ i woro Jehovah, ma meno pe rom ki dano me kare pa Nua. (Ic. 2:2) Ka wadiyo cwinywa ci ‘wan kikomwa kacel ki jo ma winyowa’ wabilarre. (1 Tem. 4:16) Pud dong pire tek ya, ni lunyodo myero gubed ka pwonyo lutinogi i lok kacel ki lanengi wek gin gunge ni tito kwena obedo gin ma mitte pi oyot adada!—2 Tem. 4:2.
3 En “Otimo Kumeno”: Bwot pa Nua kacel ki jo me ode onongo cung i kom lubu cik pa Jehovah ki gen. (Acak. 6:22) Pire tek ni wan bene i kare-ni omyero wabed atera me “gamo tam” nyo tira ma a ki i Baibul ki bot lagwok ot ma lagen. (Yak. 3:17) Lutino me paco mo ma dong gudoko dongo woko gipo kit ma wongi oketo tam ma a ki bot dul pa Jehovah i tic. Me labolle, en obedo ka kwan ki jo me ode cabit ducu kun terogi i tic me pwony i tum cabit ducu kit ma onongo mitte. En onongo tute me tic ki latinne mo acel i tic me pwony i tum cabit ducu. Cungone matek i ‘timone kumeno’ nyo i timo kit ma mitte kwede kikome ogudo cwiny lutinone atikatika, ma oweko gin abicel ducu gudongo gudoko lutic pa Jehovah ma lugen.
4 Agikki me lobo man bibino atura. (Luka 12:40) Ka walubu lanen pa Nua dok waketo niye i kom larre, ci wan kacel ki jo ma i odiwa wabibedo atera!—Ibru 11:7.