Yo Abic me Nongo Latin Kwan me Baibul

1. Ka nongo latin kwan i wang ticwa tek mada, ngo ma myero watim, dok pingo?

¹ Tika tek boti mada me nongo ngat ma myero ikwan kwede Baibul? Medde ki yenyo. Jehovah goyo laane i kom jo ma pe giilo cinggi woko i tiyo ticce. (Gal. 6:9) Kany watye ki yo abic ma twero konyi.

2. Watwero cako kwano Baibul ki dano ki penyogi atir nining?

² Peny Dano Atir ka Gimito Kwano Baibul: Jo mapol gingeyo ni wan wapoko Wi Lubele ki Awake!, ento oromo bedo ni pe gingeyo ni wakwano Baibul ki dano. Pingo pe kong item penyogi atir ka itye ka pwony i ot ki ot? Itwero bene penyo jo ma gitye ki miti ma ilimogi ka gimito kwano Baibul. Ka gukwero, itwero medde ki weko bukkewa kacel ki dongo mitigi. Omego mo acel obedo ka limo luot moni pi mwaki mapol calo jo ma en tero botgi magajin. Nino mo en oweko magajin manyen botgi, ci i ngeye ma dong oa me kato woko, tam obino i wiye ci openyo luot-ti ni: “Tika wumito kwano Baibul?” En ouro mada i kare ma gugamo ni gimito kwano Baibul. Kombeddi luot man dong gutyeko nongo batija.

3. Myero mono watam ni jo ducu ma gibino i cokke dong gitye ka kwano Baibul ki latit kwena mo? Tit kong.

³ Penyo Jo ma Gibino i Cokke: Pe itam ni jo ducu ma gunyuto miti ma gibino i cokke dong gitye ka kwano Baibul ki latit kwena mo. Omego mo acel otito ni: “Pol pa lutino kwan me Baibul ma atye kwede anongo ki i kin jo ma gubino i cokke.” Lamego mo acel omoko tamme me kwan ki mego mo me kacokkegi ma tye ki anyira ma dong gunongo batija. Mego-nu onongo dong obedo ka bino i cokke pi mwaki 15, dok en onongo o i acakki me cokke kikome, ci a woko teke cokke otum. I kare ma lamego-ni openye, mego-ni oye kwan ci lacen odoko lacaden. Lamego-ni owacci: “Cwinya cwer ni akuro pi mwaka 15 kulu me penye ka mito kwano Baibul!”

4. I yo ango ma watwero nongo latin kwan me Baibul ki penyo jo mukene?

⁴ Penyo pi Jo Mukene ma Gimito Kwan: Lamego mo acel tute me tic ki lutit kwena mukene ka gicito ka kwan ki lutino kwangi me Baibul. Ka latit kwena lawote oye, i agikki me kwangi en penyo latin kwan-ni ka ngeyo jo mukene ma gimito kwan. Ka itero buk me Baibul Pwonyo bot ngat mo ma dong ilimo tyen mapol, itwero penye ni: “Tika ingeyo ngat mo mukene ma cwinye bibedo yom me gamo buk man?” I kare mogo, kwo me kabedowu weko pe twere pi lutit kwena ki painia me kwan ki jo ma girwatte kwedgi i wang tic. Dong ka tye kit meno, wek lutit kwena mukene gunge ni itye atera me kwano Baibul ki dano.

5. Ngo mumiyo waromo penyo jo ma pe guye ma luotgi tye i kacokkewa ka gimito kwano Baibul?

⁵ Luot ma Gipe i Niye: Wutye mono ki lutit kwena mogo i kacokkewu ma luotgi pe gubedo lucaden? Luot mogo ma gipe i niye gikwero nyamo lok me Baibul ki coggi nyo mongi ma gubedo Lukricitayo, ento giye kwano Baibul ka ngat mukene aye openyogi. Pol kare bedo ber ka kong ipenyo omego nyo lamego ma lacaden-ni wek inge yo maber loyo me lok ki luotte.

6. Lega pire tek lakwene ka imito nongo latin kwan me Baibul?

⁶ Lega: Pe icaa teko pa lega. (Yak. 5:6) Jehovah ocikke me winyo legawa ka lubbe ki gin ma en mito. (1 Jon 5:14) Omego mo acel ma tye ki tic mapol adada obedo ka lega pi nongo latin kwan me Baibul. Dakone oparo ka en binongo cawa me konyo latin kwan, tutwalle ka latin kwanne tye ki pekki mapol. Pi meno, en otito bot Jehovah peko man i kare ma obedo ka lega pi cware me nongo latin kwan. Jehovah ogamo legagi i nge cabit aryo i kare ma painia mo me kacokkegi onongo laco ma mito kwano Baibul ci omiye bot omego-ni. Dakone ocoyo ni: “Awaco bot jo ducu ma gitamo ni kwano Baibul ki dano tek adada ma pe gitwero ni: Tit pekoni kikome ka itye ka lega, dok pe ijuk lega i kom peko man. Wanongo yomcwiny madwong makato kit ma onongo atamo.” Ka idiyo cwinyi, in bene itwero nongo latin kwan me Baibul ci ibibedo ki yomcwiny me konye me donyo i “doggola ma tero dano i kwo”—Mat. 7:13, 14.