Tika Itwero Nongo Ber pa Bedo ki Wang Tic ma Megi?
1. I yo ango ma kiromo poko kwede wang tic ka kacokke moni tye ki wang tic malac?
1 I yo ango ma kiromo poko kwede wang tic ka kacokke moni tye ki wang tic malac? Buk me Organized, pot karatac 103, tito ni: “Bedo ki wang tic ma megi ma tye cok kwedi bikonyi me tic ki cawa ma icwalo i tic me pwony i yo maber loyo. Iromo bene lwongo latit kwena mukene me tic kwedi i wang tic ma megi.”
2. Ka itye ki wang tic ma megi, itwero keto yub ango me medde ki miyo caden macalo gurup?
2 Medde ki Miyo Caden Macalo Gurup: Ka inongo wang tic ma megi ma cok ki ka ticci, iromo nywako i tic me pwony i cawa me yweyo me dyeceng nyo ma pud peya idwogo paco i nge tic, ka twere ki latit kwena mukene ma gang ticce bene tye cok. Ka inongo ka ma tye cok ki pacowu, ka twere in kacel ki jo me otti wuromo nywako i miyo caden iye ki otyeno. Ngene kene ni, ka pe wuwoto i cokke me cito ka pwony, opore piwu me lega pi tira pa Jehovah ma peya wucako tito kwena. (Pil. 4:6) Medo i kom meno, myero ipok cawani ma itiyo i wang tic ma meri maber wek imedde ki cwako yub me miyo caden macalo gurup. Tutwalle i tum pa cabit ma nongo dano mapol gicito i tic me pwony, bedo ber loyo me cwako gurupwu.
3. Adwogi maber ango ma bino ki i bedo ki wang tic ma megi?
3 Ber pa Yub Man: Ka itye ki wang tic ma megi, nongo itwero tito kwena i cawa mo keken mupore piri. Iromo keto cawa muromo i tito kwena pien pe mitte ni kong icit i cokke me cito ka pwony. Yub ma kit man konyo lutit kwena mapol me tic macalo painia pi tutunu nyo painia marii. Kit macalo rwodi ot ma nongo gunyuto miti gibedo i wang tic acel-lu, bedo yot me dok cen kun imedde ki dongo mitigi ki kwano Baibul kwedgi. Jo mapol ginongo ni tito kwena i wang tic ma meggi miyo gibedo ki ngec maber i kom jo ma gibedo kunnu, dok jo meno gibedo ki gen i komgi, tutwalle ka gitiyo i kabedo meno tyen makato acel, ma peya kidwoko cen bot laneno me ticwa, wek omi bot ngat mukene. Bedo ki wang tic ma megi mono twero konyo in kacel ki jo me odi me cobo ticwu ducu kakare?—2 Tem. 4:5.