Yubbe ki Yomcwiny pi Kwero Nipo
1. Kare me Nipo obedo kare maber me timo ngo?
1 Kwer me Nipo ma bibedo i Ceng Aryo, 26 Marci 2013, bimiyowa kare maber me nongo yomcwiny pi mic pa Lubanga me larre. (Ic. 61:10) Kadi bed kare me Nipo pud tye anyim, yomcwiny ma watye kwede bikonyowa me yubbe maber con. I yo ma nining?
2. Ngo ma tugo cwinywa me yubbe pi kwer me Nipo?
2 Kit me Yubbe pi Kwer me Nipo: Cam me Otyeno pa Rwot obedo kwer madit adada ento yub me kwerone gire pe tek. Kadi bed kit meno, yubbe con mitte wek wi dano pe owil ki jami mogo ma pigi tego ma mitte. (Car. 21:5) Omyero kiyer cawa ki kabedo mupore. Myero kinong vino ki mugati ma mitte-ni kikome. Kabedo ma Nipo bibedo iye myero kilwok dok kiyub obed maleng pi nino meno. Lami pwony myero oyubbe maber, dok lujol wele ki jo ma gibiwot i kin dano ki vino kacel ki mugati myero bene guyubbe. Romo bedo ni pol pa yub magi dong wucobo woko con. Pwoc ma watye kwede pi mic me ginkok aye tugo cwinywa me yubbe maber pi nino ma pire tek man.—1 Pet. 1:8, 9.
3. Watwero yubo cwinywa nining pi Cam me Otyeno pa Rwot?
3 Kit me Yubo Cwinyi: Mitte bene ni wayub cwinywa wek waniang gin mumiyo Nipo pire tek. (Ejira 7:10) Pi meno, omyero waket cawa me kwano kwan me Baibul pi kare me Nipo ki me tamo matut i kom kare me agikki me kwo pa Yecu i lobo. Tam matut i kom cwiny me mine ken ma Yecu onyuto-ni bitugo cwinywa me poro lanene.—Gal. 2:20.
4. Adwogi mene pa ginkok ma kelo boti yomcwiny madit loyo?
4 To pa Kricito oilo malo twero me loc pa Jehovah. Gonyowa bene ki i bal ki to. (1 Jon 2:2) Tone yabiwa yo me bedo ki kuc ki Lubanga ki me nongo kwo ma pe tum. (Kol. 1:21, 22) Konyowa bene me jingo tam ma wamoko me cobo dyerewa bot Jehovah kun wacung matek macalo lupwonnye pa Kricito. (Mat. 16:24) Ka itye ka yubbe me kwero Nipo ma bibino cokcok-ki, walego ni yomcwiny-nyi omedde ameda!