Wulub Lanen pa Lunebi—Mika
1. Pingo watwero bedo ki gen ni Jehovah bijwero lobo marac-ci i karene kikome?
1 ‘Agikki me lobo marac-ci mono bibino awene?’ Lanebi Mika nen calo otamo i kom lapeny ma kit meno i kare ma en obedo ka tito kwena me ngolo kop pa Jehovah i kom ker me Icrael ki Juda. Ento, genne pe obedo me nono. I mwaka 740 K.M.P., ma Mika pud kwo, lok pa Jehovah i kom Camaria ocobbe kakare. (Mika 1:6, 7) Lacen, i mwaka 607 K.M.P., kijwero Jerucalem woko. (Mika 3:12) Watwero lubo lanen pa Mika nining kun wawoto ki kuro ngolo kop pa Jehovah i karewa-ni?
2. I yo ango ma wanyuto kwede ni wadiyo cwinywa ka wawoto ki kuro nino pa Jehovah, dok pingo?
2 Di Cwinyi: Mika ocoyo ni: “Ento ki tung bota, abineno bot Rwot [Jehovah], abikuro Lubanga lalar mera; Lubangana biwinyo loka.” (Mika 7:7) Man dong pe te lokke ni Mika obedo mot ka kuro agikki piny. En omedde ki ticce macalo lanebi pa Jehovah. Ka wawoto ki kuro nino pa Jehovah, myero wamedde ki lubo “kit kwo maleng ki me woro Lubanga.” (2 Pet. 3:11, 12) Diyo cwiny pa Jehovah miyo kare bot dano me ngut balgi. (2 Pet. 3:9) Pi meno, wajolo ki cwinywa ducu tam ma kimiyowa ni myero walub lanen me diyo cwiny pa lunebi.—Yak. 5:10.
3. Pingo myero waleg Jehovah pi cwiny mere maleng?
3 Jenge i kom Teko pa Jehovah: Kadi bed ni Mika onongo tye ki tic matek adada me atima, en ojenge i kom teko pa Jehovah me timo ticce. (Mika 3:8) Jehovah ngeyo ni wamito teko ki bote, mumiyo Baibul owacci walege pi teko. En miyo teko muromo bot jo muol wek gucob ticgi calo Lukricitayo. (Jab. 84:5, 7; Ic. 40:28-31) Tika dong iwinyo kit meno i ticci pi Lubanga? Tika ipenyo Jehovah kare ki kare pi kony ki teko pa cwiny mere maleng?—Luka 11:13.
4. Kit ma Mika okwo kwede ominiwa lanen maber i kit me kwo i kare-ni nining?
4 Pi kare me kwone ducu, Mika oketo tic pa Lubanga obedo gin ma pire tek loyo. Omoko tamme me bedo lagen kadi bed jo ma gurumo en onongo kitgi oballe adada. I yo acel-lu, wan bene kitemo niyewa nino ducu. Dong myero wan ducu wamok tamwa me ‘wot i nying Jehovah Lubangawa nakanaka.’—Mika 4:5.