Dongo Dirowa i Tic me Pwony​—Gwoko Rekod pa Jo ma Gunyuto Miti

“Gwokke keni, dok igwok pwonnyi bene.” (1 Tem. 4:16) Tira man ma lakwena Paulo ocoyo bot Temceo-ni nyuto ni myero watute me dongo ngecwa macalo lutit kwena, kadi bed wanyen i tic man nyo dong warii iye. Me konyowa me timo meno, tye pwony manyen ma bikatti kare ki kare i Ticwa Me Ker ma wi lokke tye ni “Dongo Dirowa i Tic me Pwony.” Pwony acel acel binyamo diro moni ma pire tek kun miyo tam mogo i kit me dongo diro meno. Pi dwe moni ducu, kicuko cwiny dano me tute wek gudong diro meno. Ka dwe otum, but Cokke me Ticwa mo bimiyo bot dano kare me tito adwogi mabeco ma gunongo i tic ki diro meno. I dwe man kitye ka cuko cwinywa me tic i kom diro me gwoko rekod pa jo ma gunyuto miti.

Gin Mumiyo Pire Tek: Me cobo ticwa, myero pe watit lok me kwena maber keken. Myero bene wadok cen bot jo ma gunyuto miti wek wapwonygi, kun waonyo pii i wii kodi me lok me ada ma wapito. (Mat. 28:19, 20; 1 Kor. 3:6-9) Man te lokke ni myero wanong dano meno doki, wek wanywak kwede tamme, dok wamedde ki lok ma wanyamo wiati. Pi meno, ka ngati mo onyuto miti, pire tek ni wagwok rekod i kome.