Agucito Bibedo Dwe ma Pud Dong Kitito Iye

1. Rwec ma kite dok pat ango ma bitimme i wi lobo ducu ka watye ka donyo i mwaka me 100 me loc pa Ker pa Lubanga?

¹ Kit ma dong watye ka donyo i mwaka me 100 me loc pa Ker pa Lubanga, bibedo ber mada ka waketo deyo i kom Jehovah ki yub me rwec ma kite dok pat! I dwe me Agucito, wabinywako i poko trak manyen ma wi lokke tye ni Watwero Nongo Lagam me Lapeny ma Pigi Tego ki Kwene? Trak man bicuko cwiny dano me ngiyo Baibul pi nongo lagam me lapeny magi, dok tito kit ma jw.org twero konyogi kwede.

2. Watwero ribbe i ‘pako Jehovah’ ki dwan malongo i dwe me Agucito nining?

² Wamiyu Pak ki Dwan Malongo: Wek lutit kwena gumed ticgi, kityeko keto yub pi ngat mo keken ma mito tic macalo painia pi tutunu i dwe me Agucito. I dwe meno, lutit kwena ma kibatija gitwero tic calo painia pi tutunu pi cawa 30. Kit macalo Agucito tye ki Ceng Abicel abic ki Ceng Cabit abic, lutit kwena mapol ma gitye ki dog tic nyo ma gicito i cukul nino ducu gibibedo ki kare me tic calo painia pi tutunu. Ka itye ki latin kwan me Baibul ma tye ka dongo nyo latinni ma mito doko latit kwena, lok bot lakub kin luelda cutcut. Bicuko cwinygi mada ka gunywako kwedwa i tic me tito kwena i dwe man ma kite dok pat-ti! Kadi bed ni painia marii gimaro kwanyo yweyo i dwe me Agucito i nge tyeko cawagi, giromo keto alokaloka i yubgi wek gunywak i rwec man ma kite dok pat-ti. Man aye kare pi jo me odi me nyamo kacel kit ma gibiribbe kwede i ‘pako Jehovah’ ki dwan malongo i dwe me Agucito.—Ejira 3:11; Car. 15:22.

3. Gen ango ma watye kwede i kom rwec man ma kite dok pat-ti?

³ Kadi bed dong wanywako i rwec ma kit man i kare mukato angec, wageno ni man dok bibedo mapat. Tika watwero o i wel ma pud dong malo loyo pa lutit kwena, painia pi tutunu ki dong cawa i dwe me Agucito? Ka wawoto ki tyeko mwaka me ticwa me 2014, wageno ni Jehovah bigoyo laane i kom tute pa jone me weko Agucito bedo dwe ma pud dong kitito iye kwena loyo!—Mat. 24:14.