Wulub Lanen pa Lunebi—Jepania
1. Jepania otiyo calo lanebi i kare mene, dok en obedo lanen maber botwa nining?
1 I kine ka dye cencwari me abiro K.M.P., onongo dong Lujudaya giworo Baal woko ka maleng. Kabaka Amon ma kite racci onongo kineko woko dok kabaka Yocia aye onongo tye ka loc. (2 Tek. 33:21–34:1) I kare meno Jehovah oketo Jepania me tito lokke me ngolo kop. Kadi bed Jepania oa ki i doggola pa luker me Juda, en pe olworo tito pi kwena me ngolo kop pa Jehovah i kom luloc me Juda pi timo tim maraco. (Jep. 1:1; 3:1-4) I yo acel-lu, myero wan bene wapor lanen me tekcwiny pa Jepania wek wat ma tye i kinwa ki wadiwa pe obal woro ma watye kwede pi Jehovah. (Mat. 10:34-37) Kwena ango ma Jepania otito pire, dok okelo adwogi ango?
2. Ngo ma myero watim wek wabwot i nino me akemo pa Jehovah?
2 Wuyeny Jehovah: Jehovah keken aye twero laro dano i nino me akemone. Pi man oweko Jepania okwayo jo me Juda me yenyo Jehovah, yenyo kit matir, ki yenyo mwolo ma kare pud tye. (Jep. 2:2, 3) Karewa-ni bene rom ki kare pa jo me Juda. Calo Jepania, wacuko cwiny jo mukene me yenyo Jehovah, ento wan bene myero watim jami ma rwatte ki tam ma wamoko dok ‘pe myero wawek lubo Jehovah woko.’ (Jep. 1:6) Ma ka meno myero wayeny Jehovah ki kwano Lokke kacel ki lega pi tira mere. Wayenyo gin matir ki tute me kwo i yo maleng i wang Jehovah. Wayenyo mwolo ki mine i te tela dok wabedo atera me lubo tira mo keken ma Jehovah omiyo kun wok ki i dulle.
3. Pingo myero wamedde ki bedo ki neno mupore i ticwa me pwony?
3 Adwogi Mabeco: Kwena me ngolo kop ma Jepania otito-ni ogudo cwiny lujudaya mogo matut, tutwalle Yocia ma ocako yenyo Jehovah ma en pud tye awobi. Yocia otute matek me lweny i kom woro cal apaya. I kare-ni kadi bed kodi me ada me Ker-ri opoto i nget yo, i kom pata, nyo i kin okuto, mogo bene poto i ngom maber dok nyako nyige. (Mat. 13:18-23) Wageno ni Jehovah bigoyo laane i kom tutewa me coyo kodi me Ker-ri.—Jab. 126:6.
4. Pingo myero ‘wabed ma wakuro Jehovah’?
4 Jo mukene i Juda onongo gitamo ni Jehovah pe bitimo gin mo. Ento, Jehovah omoko i lokke ni ninone madit dong tye cok. (Jep. 1:12, 14) Larre bibino bot jo ma giyenyo ka larre bote keken. (Jep. 3:12, 17) Ka wamedde ki bedo ma ‘wakuro Jehovah,’ myero cwinywa obed yom ma wanote kacel ki luworo luwotwa ma gin lutic pa Lubanga!—Jep. 3:8, 9.