Mwaka Miya Acel me Rweyo pi Ker-ri!
1. Kicuko cwiny jo pa Jehovah me timo gin ango cokcok mwaka 100 mukato angec?
1 Cokcok mwaka 100 mukato angec, Omego Rutherford owacci: “Wunen, Kabakawa dong tye ka loc! Wun wutye lutit kwenane. Pi meno,wucitit, wucitit, wucitit pi Kabaka-ni ki ker-re.” Lok pa omego-ni ocuko cwiny jo pa Jehovah me rweyo pi Ker-ri i kabedo ducu. Meno aye gin ma dong watimo! Calo Lukricitayo me kare macon, wan bene watito kwena maber me Ker-ri “bot ginaketa ducu ma tye i te polo.” (Kol. 1:23) Ka waneno gin mutimme i mwaka 100 mukato-ni, ngo ma dong watimo me rweyo pi Ker pa Lubanga? Watwero medde ki rweyo pire ka wadonyo i mwaka me 100 me loc pa Ker-ri nining?
2. I yo ango ma bukkewa dong gutito pi Ker pa Lubanga?
2 Gin Mutimme i Kare Mukato Angec: Pi mwaki mapol, bukkewa dong gutito pi Ker pa Lubanga. Cakke i mwaka 1939 wi lok me magajinwa ma pire tek loyo tye ni: Wi Lubele Tito pi Ker pa Jehovah. Magajin man pol kare nyamo lok i kom Ker-ri ki gin ma bicobone. Magajin me Awake! bene tito ni Ker pa Lubanga keken aye gen pa dano. Pud dong pore ni magajin aryo magi aye magajin ma kigonyogi dok kipokogi loyo magajin mo keken i lobo-ni!—Yabo 14:6.
3. Yo mene ma dong watiyo kwede me rweyo pi Ker-ri?
3 Jo pa Jehovah dong gutiyo ki yo mapatpat mapol me rweyo pi Ker-ri. I acakkine gutiyo ki lakub dwan ma kiketo i wi mutoka, redio, ki rekod. Yo me pwony magi okonyowa me tito kwena maber-ri bot jo mapol i kare ma onongo wel lutit kwena me Ker-ri nok. (Jab. 19:4) Cokcok-ki, wacako keto lok mapol i jw.org, ma miyo watito pi Ker-ri bot jo milion mapol ata—kadiwa jo ma gibedo i lobe ka ma kigengo iye ticwa.
4. Yo me pwony ma kite dok pat ango ma wanywako iye?
4 Jo pa Jehovah bene ginywako i yo mukene ma kite dok pat me tito kwena me Ker-ri. Me labolle, cakke i kine ka mwaka 1995, watute me teno kor ticwa me pwony i ot ki ot ki miyo caden ka ma guro wi dano mapol, ka ito mutoka, ki i ka timo biacara. Cokcok-ki wacako yub ma kite dok pat me miyo caden i boma madito me twok lobo ducu. Medo i kom meno, kacokke mapol gitye ka nywako i miyo caden i dye lwak i wang ticgi kun gitiyo ki gadigadi ma kiryeyo iye bukkewa nyo meja ma kiketo cok ki ka ma dano mapol wok ki iye. Ngene kene ni wot i ot ki ot aye pud yo me tito kwena ma pire tek loyo botwa.—Tic 20:20.
5. Mwaka me ticwa manyen-ni biminiwa kare maber me timo ngo?
5 Gin ma Bitimme i Anyim: I acakki me mwaka me ticwa manyen i Sektemba, jo mapol gibicako tic macalo painia marii. In bene itwero donyo i tic calo painia marii? Ka pe, tika itwero donyo i tic calo painia pi tutunu kare ki kare? Kadi bed itwero tic calo painia nyo pe, Jehovah bigoyo laane i komi pi jalleni i yo mo keken me tic ki tekki ducu i tito pi Ker-ri.—Mal. 3:10.
6. Pingo dwe me Oktoba 2014 bibedo dwe ma kite dok pat?
6 I dwe me Oktoba 2014, Ker-ri nongo dong oloyo loc pi mwaka 100 kikome. Dong ma kubbe ki meno, Wi Lubele me dwe meno bilok i kom Ker pa Lubanga. Pingo pe itute me poko magajin man bot jo mapol kit ma itwero? Dong, ka watye ka kuro kare meno, myero wamedde ki tito “lok me kwena maber . . . i kom ker pa Lubanga” bot jo ducu ma giye winyone.—Tic 8:12.