Wulub Lanen pa Lunebi—Nakum
1. Ngo ma watwero pwonyone ki i buk pa Nakum?
1 Wi obur me Nineve tye macalo lanyut ni Jehovah lwenyo i kom lumonene ki dok ni kadi wa lamonene ma ger adada pe twero cung i nyime, kit ma lanebi Nakum otito kwede. (Nak. 1:2, 6) Ngiyo maber lok pa lanebi Nakum bimiyowa pwony pi ticwa me Ker.
2. Watwero weko kwenawa bedo me kwe cwiny nining?
2 Mi Kwe Cwiny ki Gen: Ka ineno wiye wiye, iromo tamo ni buk pa Nakum tye ki lok me ngolo kop i kom Nineve keken, ma onongo obedo boma madit pa jo Aciria. (Nak. 1:1; 3:7) Ento, lok man obedo mamit adada bot jo pa Jehovah. Nakum, ma tyen lok me nyinge obedo “Lakwe cwiny,” ojingo cwiny Lujudaya ni lukworgi dong kicok tyekogi! Nakum omedo mokone ni Jehovah obedo “ka kanne i kare me can.” (Nak. 1:7) Ka watye ka pwony, wan bene wanywako kwena maber dok wacuko cwiny dano me yenyo ka kanne bot Jehovah.—Nak. 1:15.
3. Wan watwero lubo lanen pa Nakum i tic ki lanen ki lapor nining?
3 Ti ki Lanen Kacel ki Lapor: Jehovah otito ki Nakum ni opor agikki pa Nineve ki pa boma me Tebec (No-amon) me Ejipt, ma Aciria kikome yam oturo. (Nak. 3:8-10) Ka watye ka lok ki dano i kom agikki me lobo me kare-ni, watwero nyuto lok pa lunebi me Baibul ma nyuto ni Jehovah cobo lokke ma kadi wa acel mo pe poto nono. Me laporre, i kare ma jo Babilon ki jo Media guoto lweny i kom boma me Nineve i 632 K.M.P., kot ma ocwer matek omiyo kulu Taigric opong, oweko cel matek me boma meno omuk opoto woko. Kimako Nineve oyotoyot kit ma Jehovah owaco con.—Nak. 1:8; 2:6.
4. Wan watwero loko lok ma niange maber i ticwa me pwony nining?
4 Lok i Yo ma Niange Maber: Nakum ocoyo lokke kun tito maber. Lokke onongo niange maber. (Nak. 1:14; 3:1) I yo acel-lu, wan bene omyero watiyu ki leb ma niange maber. (1 Kor. 14:9) I lim me acel, tit ka maleng tyen lok me limoni. Ka itye ka kwano Baibul ki dano, konygi me dongo niye i kom Jehovah ki dok Lokke ki dong me neno kit ma lok meno tiyo kwede i kwogi.—Rom. 10:14.
5. Gen ango ma wanongo i lok pa lanebi Nakum?
5 Gen pa Nakum i kom cobbe pa lok pa Jehovah nen ka maleng i buk me Baibul ma tye ki nyinge. Man ma agikki me lobo pa Catan tye cok-ki, wanongo kwe cwiny i lok pa Lubanga ni: “Lakwor mo pe bia malo i kome kiryo.”—Nak. 1:9, Katoli Baibol.