Cokke me Cito i Tic me Pwony ma Yubowa pi Tic Maber

1. Cokke me cito i tic me pwony tye ki yub ango?

¹ I nino mo acel, Yecu orwatte ki lukwenane 70 ma peya gucito ka tito kwena. (Luka 10:1-11) En ocuko cwinygi ki poyo wigi ni pe gibiwekogi ata, pien Jehovah, ma en aye “Won poto” tye ka tirogi. En bene omiyogi tira ma twero yubogi maber me timo tic man, dok oorogi “ki aryo aryo.” I kareni bene, cokkewa me cito i tic me pwony tye ki yub me cuko cwinywa ki yubowa pi timo tic acel meno.

2. Cokke me cito i tic me pwony myero oter cawa ma rom mene?

² I kare mukato angec, cokke man onongo tero dakika 10 nyo 15, dok onongo kwako yubo gurup, nongo ngec i kom wang tic, ki lega. Nicakke kombeddi dong kityeko loko yub man. Cakke i April, cokke me cito i tic me pwony bitero dakika abic me o kwede i dakika abiro. Ento, ka kitimo cokke man i nge cokke mukene ci myero kiwek obed macek loyo, kit macalo nongo lwak pud gua ka kwano ginacoya ki winyo pwony. Bedo ki yub macek biweko dano ducu bedo ki kare muromo i tic me pwony. Medo i kom meno, ka painia nyo lutit kwena gucako tito kwena con ma peya guo i cokke man, ci pe gibibalo kare mapol i cokke me cito ka pwony.

3. Cokke me cito i tic me pwony myero kiyub nining wek okony lutit kwena?

³ Cokke me cito i tic me pwony myero kiyub i yo ma twero konyo lutit kwena. I kacokke mapol, ber pi gurup mapat pat me timo cokkegi me cito i tic me pwony i cawa ma opore pigi ma ka duro dano ducu me kacokke i kabedo acel. Man weko wot i cokke me cito ka pwony ki wang tic bedo yot. Lutit kwena giromo yubbe oyot, dok bene bedo yot bot lanen wi gurup me konyo jo ma gimito kony. Luelda gitwero neno yo mupore ma myero kiti kwede. Ma peya kidolo te yub man ki lega macek, myero latit kwena acel acel onge anga ma bitic kwede ki ka ma gibitic iye.

4. Pingo omyero pe kinen cokke me cito i tic me pwony calo pire pe tek ma rom ki cokke mukene-ni?

⁴ Pire Tek Rom Aroma ki Cokke Mukene-ni: Kit macalo cokke me cito ka pwony kitimo pi konyo jo ma bicito woko i tic me pwony, man weko lwak ducu me kacokke pe gibedo i yub man. Ento man pe myero owek wanen yub man calo pire pe tek. Calo cokkewa mukene-ni ducu, cokke me cito i tic me pwony obedo mic ma Jehovah omiyowa ma konyowa me tugo cwinywa kekenwa i mar ki i tiyo tic mabeco. (Ibru 10:24, 25) Pi meno, ngat ma doro cokke man myero oyubbe maber wek onyam lok ma keto deyo i kom Jehovah dok konyo jo ma gitye ka winyo pwony man. Ka twere, lutit kwena ducu ma gibicito ka pwony myero gubed tye pi cokke man.

5. (a) Tic ango ma lanen wi tic tye kwede i yubo cokke me cito ka pwony? (b) Lamego myero odor yub me cokke me cito ka pwony nining?

⁵ Kit ma Lador Cokke Man Myero Oyubbe Kwede: Wek ngat mo oyubbe maber me miyo pwony, myero en onong pwony man con. Man bene rom arom ki cokke me cito ka pwony. Ka gurup me tito kwena gitimo cokkegi i kabedo mapat pat, lanen wi gurup nyo lakony kore aye myero gudor cokke pi gurupgi. Ento, ka kacokke oribo gurup ducu kacel pi cito i tic me pwony, lanen wi tic twero cimo dano acel me doro cokke man. Lunen wi tic mogo gimiyo yub me doro cokke man bot omege ma gucimo dok giketo nyinggi i ka keto ngec. Lanen wi tic myero oti ki ryeko me yero lador cokke man, kun wiye po ni ber pa cokke man jenge i kom diro me yubo dano ki miyo pwony pa ngat ma bidoro cokke man. Ka laelda, lakony kor tic, nyo omego ma onongo batija pe tye i nino mogo, lanen wi tic myero ocim lamego ma onongo batija dok tye ki diro me pwony me doro cokke man.​—Nen bok i pot karatac 6.

6. Pingo pire tek pi ngat ma kicimo me doro cokke man me yubbe maber?

⁶ Ka wanongo pwony i Cukul me Tiokraci nyo Cokke me Ticwa, wayubbe maber dok watero calo gin ma pire tek. Pe watwero kuro nio ka wacako wot me cito i cokke ka dong watamo kit me miyo pwonywa. Tic ma wanongo pi doro cokke me cito ka pwony bene myero wanen ma rom aroma. Kit macalo cokke man dong tye macek-ki, yubbe maber mitte wek obed me kony dok ogik i cawane kikome. Yubbe maber kwako bene ngeyo wang tic ma kibitiyo iye con.

7. Jami ango ma lador cokke man twero nyamone ki lwak?

⁷ Jami ma Myero Kinyam: Kit ma kwo pa dano me wang tic acel acel pat, “lagwok ot ma lagen” pe omiyo gin me aluba pi cokke me cito ka pwony ducu. (Mat. 24:45) Bok ma i pot karatac 6, ma wiye tye ni “I Cokke me Cito i Tic me Pwony, Wutwero Nyamo,” loko i kom jami mogo ma kitwero nyamone. Pol kare yub me cokke man myero obed nyamo lok kacel ki lwak. Nino mukene, kitwero nyuto lapor ma nongo kiyubo maber nyo vidio ma kikwanyo ki kabedowa me Intanet me jw.org. Ka wutye ka yubo cokke me cito ka pwony, lador cokke man myero otam pi gin ma cuko cwiny dok yubo jo ma gibicito ka pwony i nino meno.

8. Ngo ma watwero nyamone i cokke me cito ka pwony i Ceng Abicel ki Ceng Cabit?

⁸ Me labolle, i Ceng Abicel ducu, pol pa lutit kwena gitero Wi Lubele ki Awake! Pol pa jo ma ginywako i pwony i Ceng Abicel pe gicito ka pwony i nino mukene-ni, pi man wigi pe twero po i kom jami ma gupwonyo i Otyeno me Woro pi Jo me Ot. Pi meno, twero bedo me kony ka lador cokke man otiyo ki kit me cako lok ma kiketo i nge Ticwa Me Ker. Yo mukene aye kit ma kiromo tic ki lok angeya, jami mutimme, nyo nino madongo kun wakubu ki kit me nyuto magajin nyo kit me yubbe pi dok cen ka lim ka rwod ot ojolo magajin. Ka jo mukene i cokke me cito ka pwony gubedo ka poko magajin woko con, lador cokke twero penyogi me nywako tam ma tiyo nyo me tito gin mutimme ma ocuko cwinygi. I Ceng Cabit, lador cokke romo timo gin ma rom aroma pi bukke ma kibiterone i dwe meno. Bukke ma wakwano ki dano, calo brocuwa me Kwena Maber ki Winy Lok pa Lubanga, nyo buk me Baibul Pwonyo watwero terone i nino mo keken, pi meno kitwero nyamo kit me tero bukke magi i cokke me cito ka pwony.

9. Ngo ma kiromo nyamone i tum pa cabit ma watye ki rwec ma kite dok pat?

⁹ Ka kacokke tye ki rwec ma kite dok pat i tum pa cabit, lador cokke romo weko kiporo kit me miyo magajin kacel ki karatac me lwongo nyo trak, nyo en twero nyamo gin me atima ka rwod ot onyuto miti. Gin mukene ma kiromo timone obedo tito gin mutimme i kare me rweyo dano.

10, 11. Pingo lutit kwena myero guyubbe maber wek cokke me cito i tic me pwony obed maber?

¹⁰ Kit ma Lutit Kwena Myero Guyubbe Kwede: Lutit kwena ma gibino pi cokke me cito ka pwony bene myero guyubbe wek obed maber. Ka guyubbe con pi tic me pwony, oromo bedo i otyeno me woro pi jo me ot, ci lutit kwena gibibedo ki jami me anywaka i kare me cokke me cito ka pwony nyo ka gitye ka tic ki jo mukene. Yubbe maber kwako gamo magajin ki bukke con ma peya wao i cokke me cito i tic me pwony wek galle obed pe ka dano ocako wot i wang tic.

¹¹ Pire bene tek ni wao con i cokke me cito ka pwony ma peya yub ocakke. Ngene kene ni, myero watute me o con i cokkewa mukene-ni ducu. Ento, waromo balo yub me cokke me cito ka pwony ka pe wao con. Nining? Omego ma tye ka doro yub me cito ka pwony-nyi myero omok tam i kom jami mapol ma peya opoko jo ma gibicito ka pwony. Ka lutit kwena nok, en romo yero me cwalo gurup man i wang tic ma dong kitiyo iye ento bute odong manok. Ka wang tic tye ka mabor, en twero poko lutit kwena mukene bot jo ma tye ki mutoka. Ka wang tic tye ka ma lutim aranyi pol iye, en romo poko omege me tic cok ki lumege. En twero cwalo lutit kwena ma gitye ki ngolo nyo goro me tic i kin odi ma nongo yone kipiro maber nyo odi ma pe ki citep. En twero poko lutit kwena manyen me tic ki lutit kwena ma gitye ki ngec matut. Ento, ka latit kwena obino lacen, nongo myero dok kicak poko dano odoco wek jo ma gubino lacen bene kipokgi ma rom. Pi agalagala mukene, latit kwena romo o lacen i cokke. Ento ka odoko kitwa me o lacen i cokke, ci gwok nongo pe watye ki pwoc pi yub me cokke nyo pe wayubbe con.

12. Ka pol kare imaro yero ngat ma ibitic kwede con, ngo ma itwero timone?

¹² Lutit kwena ma gubino i cokke giromo keto yubgi con ma peya cokke me cito ka pwony ocakke nyo kiromo miyogi ngat ma gibitic kwede. Ka pol kare imaro yero ngat ma ibitic kwede, tika itwero ‘yabo cwinyi malac’ kun itiyo ki lutit kwena mapatpat me ka tic ki luremi keken kare ki kare? (2 Kor. 6:11-13) Tika itwero keto yub me tic ki latit kwena mo ma pud nyen wek ikonye me dongo dirone me pwony? (1 Kor. 10:24; 1 Tem. 4: 13, 15) Ter iti me winyo cik ducu ma kimini, ma kwako wa ka ma wubicako tito kwena ki iye. Ka cokke ogik, gwokke ki loko yub ma kiketo dok wuwot atir ka ma wang tic tye iye cut.

13. Ka jo ducu ma gitye i cokke me cito ka pwony komgi mit dok ginywako iye, ci adwogi maber ango ma wabinongo ki iye?

¹³ I nge tito lok, jo 70 ma Yecu oorogi-ni “gudwogo cen ki yomcwiny.” (Luka 10:17) Labongo akalakala mo, cokke ma Yecu obedo iye kwedgi ma peya gucito ka pwony okonyogi me tito kwena i yo mucwiny. I kareni bene, cokke me cito i tic me pwony konyo dano i yo acel-lu. Ka jo ducu ma gitye i cokke man komgi mit dok ginywako iye, ci cokke me cito i tic me pwony bicuko cwinywa dok biyubowa me cobo ticwa me miyo “caden bot rok ducu.”​—Mat. 24:14.