Lacwecwa ma Lamar-ri Paro Piwa

1. LACWECWA MIYO CENG TUC

Labongo ceng, kwo i lobo-ni onongo pe twere. Ceng miyo teko ki yadi me keto potgi, ature, ki nyiggi. Weko bene twere ki yadi me ywayo pii ki i ngom kun a ki i lwitgi cito wa i potgi ci duny woko.

2. LACWECWA WEKO KOT CWER

Kot obedo mic ma Lubanga ominiwa ma weko lobo-ni twero ceko cam ma wacamo. Lubanga miniwa kot ma cwer ki i polo dok miyowa cam mapatpat ma cek ka karegi oromo, miyo wayeng ki cam kun cwinywa bene bedo yom.

3. LACWECWA MINIWA CAM KI GINARUKA

Pol pa wege giparo kit ma gitwero nongo kwede cam ki ginaruka muromo pi jo me odigi. Nen kong gin ma Ginacoya waco: “Kong wunen winyo me polo; pe gicoyo kodi dok bene pe gikayo, pe bene gidilo cam i dero, ento Wonwu ma tye i polo pud pitogi. Wun pe piwu tek kato pigi woko?”​—Matayo 6:25, 26.

“Kong wutam pi lenga me tim, kit ma gidongo kwede . . . ; ento pud amedde ki waco botwu ni, kadi bed [Kabaka] Solomon orukke ki deyone ducu, ento pe orukke macalo mo acel i kingi. Ka ce Lubanga ruko lum ma i tim kit meno . . . , ci en pe birukowu makato?”​—Matayo 6:28-30.

Kit macalo Lubanga twero miniwa cam ki ginaruka, ngene kene ni en twero konyowa me nongo jami mukene ma wamito i kwowa. Ka watute me timo miti pa Lubanga, en bigoyo laane i kom tutewa me puru cam nyo en twero konyowa me nongo tic wek wawil jami ma mitte.​—Matayo 6:32, 33.

Labongo akalakala mo, watye ki tyen lok mapol me maro Lubanga ka watamo i kom ceng, kot, winyo, ki ature. Pwony ma lubo-ni binyamo kit ma Lacwecwa oloko kwede ki dano.