Mar ki Pwoc pi Jehovah Bitugo Cwinyi me Nongo Batija

1-2. Kit ma kinyuto kwede i Tic pa Lukwena 8:27-31, 35-38, gin ango ma otugo cwiny Laetiopia ma tiyo i gang kal me nongo batija?

TIKA imito nongo batija macalo lalub kor Kricito? Mar ki pwoc dong otugo cwiny jo mapol me moko tam meno. Nen kong labol pa laco mo ma onongo tiyo i gang kal pa kabaka ma dako me lobo Etiopia.

² Laetiopia man onongo batija cutcut i nge pwonyo ki i Ginacoya ni mitte ni omyero enong batija. (Kwan Tic pa Lukwena 8:27-31, 35-38.) Ngo ma otugo cwinye? Ngene kene ni, en obedo ki pwoc pi Lok pa Lubanga pien onongo tye ka kwano tyeng mogo i buk pa Icaya kun obedo i gadigadi i kare ma oa ki i Jerucalem me cito Etiopia. Dok i kare ma Pilipo oloko kwede, laco man odongo pwoc pi gin ma Yecu otimo pire. Ento pingo onongo laco man ocito i Jerucalem? Pien en onongo dong tye ki mar pi Jehovah. Wangeyo man nining? En onongo oa ka woro Jehovah i Jerucalem. Laco-ni nen calo onongo oweko dini pa lunywalle dok oribbe ki rok acel keken ma onongo gudyere bot Lubanga me ada. Marre pi Jehovah aye bene otugo cwinye me timo gin mukene. En onongo batija dok odoko lalub kor Kricito.​—Mat. 28:19.

3. Ngo ma twero gengo ngat moni ki nongo batija? (Nen bene bok ma wiye tye ni “Cwinyi Cal ki Ngom Mene?”)

³ Mar pi Jehovah twero tugo cwinyi me nongo batija. Ento mar bene twero gengi ki timo meno. Nining? Tam kong i kom labol mogo. Twero bedo ni imaro wadini ki luremi ma pe giworo Jehovah, dok iparo ni ka inongo batija, ci gibidagi. (Mat. 10:37) Nyo romo bedo ni imaro timo jami ma ingeyo ni Jehovah dagi, dok inongo ni juko tim magi tek. (Jab. 97:10) Nyo gwok idongo ma ibedo ka kwero kwer mogo ma kubbe ki dini goba. Dok pud cwinyi bedo yom ka wi opo i kom jami ma onongo wutimo i kare me kwer magi. Macalo adwogine, itwero nongo ni tek me juko kwero kwer mogo ma pe yomo cwiny Jehovah. (1 Kor. 10:20, 21) Pi meno, omyero dong imok tammi i kom lapeny man, “Gin ango nyo anga ma an amaro loyo?”

NGAT MA MYERO WAMAR MAKATO DUCU

4. Gin ango ma pire tek loyo ma bitugo cwinyi me nongo batija?

⁴ Itye ki jami mabeco mapol ma myero imar dok ibed ki pwoc pire. Me labolle, kadi wa ma peya icako kwano Baibul ki Lucaden pa Jehovah, twero bedo ni onongo dong itye ki woro matut pi Baibul. Dok oromo bedo ni onongo itye ki mar pi Yecu. Man ma dong ingeyo Lucaden pa Jehovah-ni, twero bedo ni imaro ribbe kwedgi. Ento pe dong tye ni maro jami magi bitugo cwinyi me dyere bot Jehovah ki nongo batija. Gin ma pire tek loyo ma bitugo cwinyi me nongo batija aye marri pi Lubanga Jehovah. Ka imaro Jehovah makato, ci pe ibiweko ngat mo nyo gin mo keken gengi ki tic pire. Mar pi Jehovah bitugo cwinyi me nongo batija dok bikonyi bene me medde ki bedo lagen bote i nge batijani.

5. Lapeny mene ma wabinyamogi i pwony man?

⁵ Yecu owaco ni omyero wamar Jehovah ki cwinywa ducu, kwowa ducu, tamwa ducu, ki tekowa ducu. (Mar. 12:30) Itwero pwonnye me maro ki woro Jehovah matut kit meno nining? Tamo i kom mar pa Jehovah piwa tugo cwinywa me mare bene. (1 Jon 4:19) Ka idongo mar pi Jehovah, ci miti ki tic ango ma bilubo kore?b

6. Ma lubbe ki Jo Roma 1:20, i yo mene ma watwero pwonyo kwede lok i kom Jehovah?

⁶ Pwony lok i kom Jehovah ki i ngiyo cwecce. (Kwan Jo Roma 1:20; Yabo 4:11) Tam i kom ginapita ki lee ma Jehovah ocweyogi ki kit ma ginyuto kwede ni en ryek adada. Tam kong i kom kit ma kiyubo kwede komwa i yo mamwonya. (Jab. 139:14) Dok itam i kom teko ma Jehovah oketo i kom ceng, tutwalle ka iniang ni ceng tye i kin lacer bilion mapol ata.c (Ic. 40:26) Ka iwoto ki lwodo jami magi, woroni pi Jehovah bidongo. Ento, ka ingeyo ni Jehovah ryek dok tek, meno nongo pud acakki me dongo watti kwede. Me jingo marri pi Jehovah, myero inge jami mapol i kome makato meno.

7. Wek marri pi Jehovah obed matut, gin ango ma omyero iye labongo akalakala mo?

⁷ Myero ibed labongo akalakala mo keken ni Jehovah paro piri. Tika inongo ni tek me ye ni Lacwe polo ki lobo neni dok paro piri? Ka iwinyo kit meno, ci wi myero opo ni Jehovah “pe tye cen ka mabor ki bot ngat acel acel i kinwa.” (Tic 17:26-28) En “ngiyo cwiny dano ducu,” dok ocikke boti ni, ‘ka ce iyenyo en, ci ibinonge.’ (1 Tekwaro 28:9) Ki lok ada, Jehovah otito tyen lok ma omiyo kombeddi itye ka kwano Baibul kun waco ni, “Aywayowu bota.” (Jer. 31:3, NW) Ka iwoto ki niang i yo matut jami ma Jehovah otimo piri, ci marri pire bene bidongo.

8. Itwero nyuto nining ni itye ki pwoc pi mar pa Jehovah?

⁸ Yo acel me nyuto pwoc pi mar pa Jehovah aye ki lok kwede i lega. Marri pi Lubanga bidongo ka iwacce par ma i cwinyi dok ipwoye pi jami ducu ma en timo piri. Dok wat i kin in ki Jehovah bijing ka ineno kit ma en gamo kwede legani. (Jab. 116:1) Ibimoko ada ni en niang pekoni. Ento me nyikke cok ki Jehovah, omyero iniang kit ma en tamo kwede. Dok mitte ni inge gin ma en mito ki boti. Yo acel keken ma ibinongo kwede ngec meno aye ki kwano Lokke, Baibul.

9. Itwero nyuto nining ni itye ki pwoc pi Baibul?

⁹ Pwonnye me bedo ki pwoc pi Baibul, Lok pa Lubanga. Baibul keken aye tye ki lok ada i kom Jehovah ki yubbe piri. Inyuto ni itye ki pwoc pi Baibul ka ikwano nino ducu, iyubbe pi kwanni ki lapwonnyi me Baibul, dok iketo i tic jami ma ipwonyo. (Jab. 119:97, 99; Jon 17:17) Tika itye ki yub me kwano Baibul nino ducu? Tika ilubo yub meno?

10. Gin acel ango ma kite dok pat madok i kom Baibul?

¹⁰ Gin acel ma kite dok pat madok i kom Baibul aye ni tye ni lok pa jo ma guneno Yecu. Man aye buk acel keken ma tito kakare gin ma Yecu otimo piri. Ka iwoto ki pwonyo gin ma Yecu owaco dok otimo, man bitugo cwinyi me mako larem kwede.

11. Ngo ma bikonyi me maro Jehovah?

¹¹ Pwonnye me maro Yecu, ci marri pi Jehovah bidongo. Pingo? Pien Yecu obedo ka poro kit pa Wonne macok adada. (Jon 14:9) Pi meno, ka imedde ki pwonyo lok i kom Yecu, ci ibiniang lok i kom Jehovah maber dok ibidongo pwoc pire bene. Tam kong i kom kica ma Yecu onyuto pi dano ma onongo jo mukene cayogi​—calo lucan, lutwo, ki lugoro. Tam bene i kom tam ma tiyo ma en mini ki kit ma kwoni yubbe kwede ka iwinyo lokke.​—Mat. 5:1-11; 7:24-27.

12. Ka iwoto ki pwonyo lok i kom Yecu, man twero tugo cwinyi me timo ngo?

¹² Marri pi Yecu bidongo doko matek ka itamo matut i kom ginkok ma en omiyo piwa wek Lubanga otimwa kica pi balwa. (Mat. 20:28) Ka iniang ni Yecu omine me to piri, ci man bitugo cwinyi me ngut i kom balli ki me yenyo kica pa Jehovah. (Tic 3:19, 20; 1 Jon 1:9) Dok ka marri pi Yecu ki Jehovah woto ki dongo, ibinongo ni ibicako nyikke cok ki jo ma giwinyo kit meno bene.

13. Gin ango ma Jehovah omini?

¹³ Pwonnye me maro jo ma gimaro Jehovah. Wadini ki luremi macon ma pe giworo Jehovah pe guromo niang pingo imito dyere bot Jehovah. Gitwero bene keto aunauna i komi. Jehovah bikonyi ki mini omege ki lumege me kacokke ma gibibedo calo jo me ot-ti. Ka ibedo cok ki omege ki lumege magi, ci ibinongo mar ki kony ma imito. (Mar. 10:29, 30; Ibru 10:24, 25) I nge kare mo, wadini gitwero ribbe kwedi i tic pi Jehovah kun nongo gilubo cikke bene.​—1 Pet. 2:12.

14. Kit ma kitito kwede i 1 Jon 5:3, ngo ma iniang iye madok i kom rwom me kit matir pa Jehovah?

¹⁴ Pwonnye me woro rwom me kit ma atir pa Jehovah dok ilubgi. Ma peya ipwonyo lok i kom Jehovah, twero bedo ni onongo imoko piri keni gin matir ki gin marac, ento kombeddi dong ineno ni rwom me kit matir pa Jehovah aye ber loyo. (Jab. 1:1-3; kwan 1 Jon 5:3.) Tam kong i kom tira ma Baibul miyo bot wegi odi, mon, lunyodo ki lutino. (Ep. 5:22–6:4) Tika jo me ot-ti gitye ki yomcwiny pien ilubo tira meno? Mono kiti oyubbe pien ni ilubo tam pa Jehovah i kom yero lurem mabeco? Tika cwinyi yom i kare-ni makato yam con? (Car. 13:20; 1 Kor. 15:33) Nen calo lagammi i kom lapeny magi tye ni eyo.

15. Ngo ma itwero timone ka imito kony me keto lok ada me Baibul i tic?

¹⁵ I kare mukene, itwero nongo ni tek me ngeyo kit me keto i tic lok ada me Baibul ma ipwonyo. Meno aye tyen lok ma oweko Jehovah tiyo ki dulle me mini bukke ma tito lok me Baibul dok gikonyi me poko gin maber ki gin marac. (Ibru 5:13, 14) Ka ikwano bukke magi i yo matut, ci ibineno ni lok ada me Baibul tiyo, dok man biweko inyikke cok ki dul pa Jehovah.

16. Jehovah oyubo jone nining?

¹⁶ Pwonnye me maro ki cwako dul pa Jehovah. Jehovah oyubo jone i kacokke mapatpat; dok Wode Yecu aye lawi kacokke ducu. (Ep. 1:22; 5:23) Yecu ocimo gurup matidi pa co ma kiwirogi wek gutel wiwa i yubo tic ma en mito ni watim i kare-ni. Yecu olwongo gurup pa co man ni “lagwok ot ma lagen dok maryek,” dok giketo cwinygi i cobo ticgi me konyi wek inyikke cok ki Lubanga dok igwok watti kwede. (Mat. 24:45-47) Yo acel ma lagwok ot ma lagen gwoki kwede aye ki cimo luelda me tic macalo lukwat. (Ic. 32:1, 2; Ibru 13:17; 1 Pet. 5:2, 3) Luelda gitye atera me mine piri, me kweyo cwinyi, ki me konyi me dongo wat macok ki Jehovah. Ento gin acel ma pire tek adada ma gitwero timo piri aye konyi me pwonyo jo mukene lok i kom Jehovah.​—Ep. 4:11-13.

17. Ma lubbe ki Jo Roma 10:10, 13, 14, pingo waloko ki jo mukene i kom Jehovah?

¹⁷ Kony jo mukene me maro Jehovah. Yecu ociko lulub kore me pwonyo jo mukene ki lok i kom Jehovah. (Mat. 28:19, 20) Watwero lubo cik man koko koko pien ni obedo cik ma myero walubi. Ento ka marri pi Jehovah woto ki dongo, ibiwinyo calo lakwena Petero ki Jon ma guwaco ni, “Wan pe watwero weko tito pi gin ma yam waneno ki ma wawinyo.” (Tic 4:20) Pe tye gin mo ma twero keliwa yomcwiny calo konyo ngat mukene me maro Jehovah. Go kong yomcwiny ma Pilipo latit kwena maber-ri obedo kwede i kare ma en okonyo Laetiopia-ni me pwonyo lok ada ma tye i Ginacoya ci laco-ni onongo batija! Ka ilubo lanen pa Pilipo dok ilubo cik pa Yecu me tito kwena, nongo inyuto ni imito bedo Lacaden pa Jehovah. (Kwan Jo Roma 10:10, 13, 14.) I kare meno, in bene ibipenyo lapeny acel ma Laetiopia-ni openyo ni: “Gin ango ma genga limo batija?”​—Tic 8:36.

18. Ngo ma wabinyamo i pwony ma lubo man?

¹⁸ Ibimoko tam ma pire tek loyo i kwoni ka iyero me nongo batija. Kit ma batija obedo gin ma pire tek adada-ni, mitte ni itam matut i kom tyen lokke. Gin ango ma myero inge madok i kom batija? Ngo ma omyero itim ma peya inongo batija ki dok i ngeye? Lapeny magi kibinyamogi i pwony ma lubo man.