Kit ma Lega Twero Konyi Kwede
I kare ma kinongo ni Pamela tye ki two kanca, en oyenyo kony ki bot ludaktari. Ento, en bene olego bot Lubanga wek omine kero me kanyo pekone meno. Tika lega okonye?
Pamela otito ni, “I kare ma kibedo ka miya yat pi two kanca, pol kare onongo abedo ki lworo adada. Ento ka alego bot Lubanga Jehovah, ci cwinya onongo cako pye dok acako tamo tam ma atir. Pud awinyo arem kare ducu, ento lega konya me bedo ki neno matir. Ka dano gipenya kit ma awinyo kwede, awaccigi ni, ‘Pe awinyo maber, ento atye ki yomcwiny!’”
Ngene kene ni, pe omyero wakur wang ma two mo malit nyo peko mo madit opoto i komwa ka wek wacak lega. Wan ducu wakato ki i pekki madongo ki matino, dok pol kare wawinyo ni wamito kony me kanyone. Tika lega twero konyowa?
Baibul tittiwa ni: “Kel pekoni ducu bot Rwot [Jehovah], ci en bikonyi; en pe biye ni myero gidir dano ma kite atir woko wacel.” (Jabuli 55:22) Meno pud dong obedo tam ma cuko cwinywa ya! Dong lega twero konyi nining? Ka ilego bot Lubanga i yo ma atir, en bimini gin ma imito me loyo ariya ma itye ka kato ki iye.—Nen bok ma wiye tye ni “Adwogi Maber ma Inongo ki i Lega.”