Gin Ango ma Moko Anyimmi?
Jo mapol giye ni teko mo ma pe nen aye moko kit ma anyimgi bibedo kwede. Kit macalo giye meno, gilubo tim mogo ma gitamo ni biweko anyimgi bedo maber.
GIN MA DANO MAPOL GIYE
TYET KI LAKALATWE: Jo mukene giye ni kit ma lakalatwe oryene kwede i kare ma kinywalo kwede ngat moni aye moko anyim pa dano meno. Gikwano horoscopes wek ginge ngo ma bitimme i anyimgi dok okonygi me moko tam.
PENYO TAM KI BOT AJWAKA: Jo mogo gitamo ni penyo tam ki bot ajwaka aye biweko gibedo ki kwo maber. Gitamo ni ka gitimo meno, ci jami ducu biwot maber. Medo i kom meno, gimoko tam ma lubbe ki gin ma ajwagi magi tittigi.
WORO ABILA PA KWARO: Tye dok jo mukene ma giye ni omyero giyom cwiny kwarigi ma guto nyo lubange mapatpat wek ginong gwok kacel ki gum. Dako mo ma nyinge Van,a ma bedo i lobo Vietnam, owaco ni, “Onongo aye ni ka amiyo woro bot kwarina, ci abibedo ki kwo maber i kare-ni kacel ki anyim ma genne pira ki pi lutinona.”
PWONY NI DANO KINYWALO TYEN MAPOL: Dano mapol giye ni ka ngat moni oto, kinywale odoco, dok meno timme tyen mapol. Giye ni jami mabeco nyo maraco ma timme i kom ngat moni i kare-ni obedo adwogi me jami ma gutimo i kwogi macon.
Ento jo mapol gineno pwony ma kit meno calo tim me kwiya piny. Kadi bed kit meno, pud gitimo jami calo kwano dye cing dano, kwano horoscopes, ngiyo i dyel, tyet ki ajaa, ki mukene. Gitamo ni timo jami ma kit meno twero konyogi me ngeyo anyimgi.
TIKA TIM MA KIT MAGI KONYO DANO?
Tika jo ma giketo gengi i kom tim magi ginongo kwo maber kacel ki anyim mamwonya?
Nen kong gin ma otimme i kom laco mo ma nyinge Hào, ma bedo i lobo Vietnam. En onongo tyeto ki lakalatwe, tiyo ki feng shui, dok woro abila pa kwarone wek enong tira i kwone. Tika en onongo adwogi maber? Hào owaco ni, “Biacarana otur woko, adonyo i banya madongo, abedo ki kukukuku i pacona, dok atwoyo two par matek.”
Laco mo ma nyinge Qiuming, ma bedo i lobo Taiwan, onongo bene ye i kom tim me tyet ki lakalatwe, pwony ni dano kinywalo tyen mapol, gum kom, feng shui, ki dong woro abila pa kwaro. I nge ngiyo tim magi maber, en owaco ni: “Aniang ni pwony kacel ki kwer magi pe girwatte dok ginyweno wi dano matek adada. Anongo ni byek ma kibyeko kun kitiyo ki lakalatwe pol kare pe cobbe kakare. Ka odok i kom pwony ni kinywalo dano tyen mapol, ka wi pe po i kom kwoni macon ci ibilokke nining wek itim gin maber i kwoni mukene i anyim?”
“Aniang ni pwony kacel ki kwer magi pe girwatte dok ginyweno wi dano matek adada.”—QIUMING, TAIWAN
Kit ma Hào, Qiuming, ki jo mukene dong guniang kwede, gum kom, lakalatwe, kwariwa ma guto, nyo nywalle odoco aye pe doro anyimwa. Tika man tyen lokke ni pe watwero timo gin mo keken me doro anyimwa?
Jo mapol gitamo ni me bedo ki anyim maber, omyero ikwan i rwom ma lamal dok itute me bedo ki lonyo madwong. Ento adwogine obedo ningo bot jo ma gumoko tam ma kit meno?
a I pwony man ki ma lubo-ni, nying mogo kiloko woko.
b Lok man nonge i Buk Maleng i Jo Galatia 6:7. Man rwatte ki carolok Acholi mo ma waco ni Ikayo gin ma icoyo, ka icoyo bel ikayo bel.