Itwero Yero Kit ma Anyimmi Bibedo Kwede

Mwaki ma romo 3,500 angec, Lubanga Jehovah otito ki jo ma giwore gin ma myero gutim wek gubed ki anyim maber. En owaco ni: “Atyeko keto i nyimwu kwo ki to, gum ki lok me ceno dano; mumiyo wuyer kwo wek wun ki likwayowu wubed makwo.”—Nwoyo Cik 30:19.

Me bedo ki anyim maber, onongo mitte ni jo meno gumok tam ma atir. I kare-ni bene, omyero wamok tam marom ki meno. Baibul otittiwa kit me yero anyim mamwonya ki ‘maro Jehovah Lubangawa, dok ki woro doge.’—Nwoyo Cik 30:20.

WATWERO MARO JEHOVAH KACEL KI WORO DOGE NINING?

NONG PWONY KI I BAIBUL: Me maro Jehovah, mukwongo omyero kong ipwony lok i kome ki i Baibul. Ka iwoto ki timo meno, ibipwonyo ni en obedo Lubanga ma lamar ma mito gin maber loyo piri. En joli me lega bote ‘pien en paro piri.’ (1 Petero 5:7) Baibul tye ki cikke man ni, ka itute me nyikke cok kwede, ‘ci en bene binyiko cok kwedi.’—Yakobo 4:8.

KET GIN MA IPWONYO I TIC: Woro dog Lubanga te lokke ni omyero ilub tira ma nonge i Baibul. Ka itimo kit meno, “bimiyo nyimi bedo maleng, ka dok ticci ducu bicobbe kakare.”—Yocwa 1:8.