Watiyo pi Lubanga ma “Lalonyo i Kicane”

1. Ngo ma twero bino i wiwa ka watamo i kom ngat ma lakica?

KA WATAMO i kom ngat ma lakica, ci watwero goyo cal ngat ma tye ki cwiny maber, maro dano, dok cinge yot. Watwero tamo bene i kom labol ma Yecu omiyo i kom Lacamaria maber. Laco man me rok mukene-ni aye obedo ‘ngat ma otimo kica’ ki Lajudaya ma lukwo ogoyo dok gukwalo jamine. Lacamaria-ni “kica omake i kome” dok okonyo Lajudaya man ki mar. (Luka 10:29-37) Lapor man nyuto ka maleng kit mo mamwonya adada pa Lubangawa—kica. Lubanga lakica pien en marowa. Dok en nyutiwa kica i yo mapol nino ducu.

2. Yo mukene ango ma watwero nyuto kwede cwiny me kica?

² Tye yo mukene ma ngat moni twero nyuto kwede cwiny me kica. Ngat ma lakica twero moko tamme pe me miyo pwod ki ngat ma omyero onong pwod. I yo ma kit meno, Jehovah tye ka nyuto kica i komwa. Laco jabuli owaco ni, “En pe timowa kun poro bal ma watimo.” (Jab. 103:10) I kare mukene, Jehovah twero yero me miyo pwod magwar adada bot labalo.

3. Lapeny mene ma wabinyamogi?

³ I pwony man, wabinyamo lapeny adek: Pingo Jehovah nyuto cwiny me kica? Tika twere me miyo pwod magwar i yo me kica? Dok gin ango ma twero konyowa me nyuto cwiny me kica? Kong dong wanenu kit ma Lok pa Lubanga gamo kwede lapeny magi.

PINGO JEHOVAH NYUTO CWINY ME KICA?

4. Pingo Jehovah maro nyuto cwiny me kica?

⁴ Jehovah maro nyuto kica. Lakwena Paulo ocoyo ni Lubanga “lalonyo i kicane.” I tyeng man, lakwena Paulo onongo tye ka tittiwa ni Lubanga nyuto cwiny me kica ki miyo gen me kwo i polo bot luticce ma kiwirogi kadi bed gitye ki roc. (Ep. 2:4-7) Ento Jehovah pe nyuto cwiny me kica bot luticce ma kiwirogi keken. Laco jabuli Daudi ocoyo ni: “[Jehovah] ber bot dano ducu, dok kica make i kom gin ducu ma en oketo.” (Jab. 145:9) Pien Jehovah maro dano, en nyuto cwiny me kica ka oneno tyen lok mupore me timo kica.

5. Yecu opwonyo kit ma Jehovah nyuto kwede kica nining?

⁵ Makato ngat mo keken, Yecu ngeyo maber adada kit ma Jehovah maro nyuto kwede cwiny me kica. Jehovah ki Yecu gubedo kacel i polo pi mwaki mapol ma Yecu peya obino i lobo. (Car. 8:30, 31) Tyen mapol, Yecu oneno kit ma Wonne onyuto kwede kica bot dano ma lubalo. (Jab. 78:37-42) I pwonye, kare ki kare Yecu oloko i kom kit man mamwonya pa Wonne.

6. Yecu okonyowa nining me niang kica pa Wonne?

⁶ Kit ma kitito kwede i pwony mukato-ni, Yecu otito carolok i kom latin awobi ma orwenyo me konyowa niang kit ma Jehovah maro nyuto kwede kica. Awobi man oa woko ki gang ci ‘obalo limme pi kwo carocaro.’ (Luka 15:13) Lacen, en ongut i kom timme me carocaro, omwolle, ci odwogo cen gang. Wonne odok iye nining? Onongo pe mitte ni latin man okur pi kare malac me niang kit ma wonne winyo kwede. Yecu owaco ni: “Ka onongo pud tye cen ka mabor, wonne onene. Kica omake i kome, oringo okwako ngute, onoto leme.” Won awobi man pe okelo lewic i kom wode. Me ka meno, en otimo kica ki wode dok ojole cen i kin jo me ode. Awobi ma orwenyo-ni onongo otimo bal madit adada, ento pien en ongut i kom balle, wonne otime kica. Wego ma lakica ma i lapor man cung pi Jehovah. I lapor man ma gudo cwinywa-ni, Yecu onyutiwa ni Jehovah tye atera me timo kica ki lubalo ma gungut i kom balgi.—Luka 15:17-24.

7. Kit ma Jehovah nyuto kwede kica moko nining ni en ryek adada?

⁷ Jehovah nyuto cwiny me kica pien en ryek adada. Jehovah kare ducu moko tam mabeco ma kelo adwogi maber bot cwecce. Pi meno, Baibul waco ni ‘ryeko ma oa ki malo opong ki kica dok nyako nyig maber.’ (Yak. 3:17) Calo lanyodo ma lamar, Jehovah ngeyo ni kicane kelo adwogi maber bot lutinone. (Jab. 103:13; Ic. 49:15) Kica pa Jehovah miniwa gen pi anyim maber kadi bed watye ki roc. Pi meno, pien Jehovah ryek adada, en nyuto kica ka oneno tyen lok mupore me timo kica. Ento Jehovah bene ngeyo kare ma pe opore me nyuto cwiny me kica. Pien en ryek, en pe nyuto kica ka timo meno binyuto ni en cayo bal.

8. Ngo ma mitte ni kitim i kare mogo, dok pingo?

⁸ Ket kong ni latic pa Lubanga mo omoko tamme me timo tim tarwang akaka. Omyero watim gin ango? Jehovah owaco ki lakwena Paulo ni omi tira ki kacokke ni ‘pe waribbe’ ki labalo-ni. (1 Kor. 5:11) Lubalo ma gukwero ngut woko i kom balgi kiryemogi woko ki i kacokke. Timo man pire tek pien gwoko omege ki lumege ma lugen dok kelo deyo i kom yo maleng ma Jehovah timo kwede jami. Ento jo mogo gitamo ni ka kiryemo ngat moni ki i kacokke, ci nongo Lubanga pe onyuto cwiny me kica bote. Tika man tye lok ada? Kong wanenu.

TIKA NYUTO CWINY ME KICA KA KIRYEMO NGAT MONI KI I KACOKKE?

9-10. Ma lubbe ki Jo Ibru 12:5, 6, pingo watwero waco ni ryemo ngat moni ki i kacokke obedo yub me kica? Mi lapor.

⁹ Ka wawinyo lok angeya ma kimiyo i kacokke pa Lukricitayo ni ngat ma wamaro “dong pe tye Lacaden pa Jehovah,” cwinywa cwer adada. Watwero pennye kekenwa ka ce onongo opore me ryemo ngat ma wamaro-ni. Tika ryemo ngat moni ki i kacokke nyuto cwiny me kica? Eyo, nyuto cwiny me kica. Ka mitte ni kimi ngat moni pwod, ci nyuto ryeko, kica, kacel ki mar me minigi pwod. (Car. 13:24) Tika twero konyo labalo me loko kwone ki ngut i kom balle ka kiryeme woko ki i kacokke? Ada twero konye. Jo mapol ma onongo gutimo bal madongo guwaco ni ryemogi ki i kacokke aye okonyogi me niang ni gitimo bal madit, dok okonyogi me ngut ki loko kwogi ci gudwogo cen i kacokke.—Kwan Jo Ibru 12:5, 6.

¹⁰ Nen kong lapor man. Lakwat oniang ni romone mo acel kome lit. En ngeyo ni ka wek emi kony me yotkom ki romo man, ci mitte ni ekwany woko ki i kin luwote. Ento romo maro bedo ki luwote dok twero doko ger ka kikwanye ki i kin luwote. Ka lakwat otimo man, tika en nongo tye ka tero romo man i yo marac? Ngene kene ni pe. Lakwat ngeyo ni ka eweko romo ma kome lit-ti i kin luwote ci twone twero kobo i kom romi ma komgi yot. Ka en okwanyo romo ma kome lit ki i kin luwote, ci nongo en tye ka gwoko romi ducu ma komgi yot.—Por ki Lulevi 13:3, 4.

11. (a) I yo ma nining ma kitwero poro ngat ma kiryemo ki i kacokke ki romo ma kome lit? (b) Gin ango ma jo ma kiryemogi ki i kacokke gitwero timo, dok kony ango ma gitwero nongo?

¹¹ Watwero poro Lakricitayo ma kiryemo ki i kacokke ki romo ma kome lit-ti. Nongo en kome lit i yo me cwiny. (Yak. 5:14) Kit macalo ka ngat moni tye ki two ci en twero kobo two ki jo mukene, i yo acel-lu ka ngat moni obalo watte ki Jehovah ci en twero bito jo mukene me timo bal. Pi meno, mitte ni kikwany ngat ma kome lit i yo me cwiny ki i kacokke. Pwod ma kit man obedo lanyut me mar pa Jehovah bot Romine ma lugen, dok man twero konyo labalo-ni me niang i kom balle ci ngut iye. I kare ma nongo kiryemo ngat moni, en twero bino i cokke, ka ma en twero nongo cam me cwiny. En tye agonya me gamo jami akwana me kwan pire kene ki neno JW Broadcasting^®. Dok ka luelda guneno ni en tye ka timo alokaloka i kwone, gitwero mine tira kare ki kare wek okonye yubo watte ki Jehovah dok odwog cen i kacokke.b

12. I yo mene ma luelda gitwero nyuto kwede mar kacel ki kica bot labalo ma okwero ngut i kom balle?

¹² Pire tek ni wiwa myero opo ni jo ma pe gungut pi balgi keken aye kiryemogi ki i kacokke. Luelda gingeyo ni omyero gitam matut ma nongo peya gumoko tam me ryemo ngat moni. Gingeyo ni Jehovah miyo pwod “maberber pe ki kiniga twatwal.” (Jer. 30:11) Gimaro utmegigi, dok pe gimito timo gin mo keken ma twero balo wat pa utmegigi ki Jehovah. Kadi bed kit meno, i kare mogo, yo acel keken me nyuto kica aye me kwanyo labalo ki i kacokke.

13. Pingo onongo mitte ni kiryem Lakricitayo mo ma i Korint woko ki i kacokke?

¹³ Tam kong i kom gin ma lakwena Paulo otimo i kom labalo mo ma okwero ngut pi balle i cencwari me acel. Lakricitayo mo ma i Korint onongo tye ka bedo ki ci-wonne macalo dakone. Man pud dong obedo bal malik ya! Madok i kom tim ma kit man, Jehovah onongo owaco ki Luicrael macon ni: “Dano ma obuto ki ci-wonne, nongo oketo lewic i kom wonne; gibineko gin aryo ducu, remogi dok i wigi.” (Levi 20:11) Ngene kene ni, Paulo onongo pe twero golo rukca ni kinek laco man. Ento en omiyo tira ki jo Korint ni kiryem laco man woko ki i kacokke. Tim carocaro pa laco man onongo tye ka gudo jo mogo me kacokke. Jo mogo i kingi onongo gitamo ni man pe obedo bal madit!—1 Kor. 5:1, 2, 13.

14. Paulo onyuto cwiny me kica nining bot laco mo ma i Korint ma kiryemo woko ki i kacokke, dok pingo? (2 Jo Korint 2:5-8, 11)

¹⁴ I nge kare mo, Paulo oniang ni laco man otimo alokaloka madongo i kwone. Labalo man onongo ongut i kom balle! Kadi bed laco man onongo okelo lewic i kom kacokke, Paulo onongo pe mito tero labalo man ma kiryemo-ni marac mukato kare woko. En owaco ki luelda me kacokke ni: “Wutimme kica, dok wukwe cwinye.” Nen kong tyen lok ma Paulo omiyo pi timo man: “Wek omi cwercwiny madit mukato kare pe onure woko.” Kica omako Paulo i kom laco man ma ongut-ti. Paulo onongo pe mito neno ni cwercwiny onuro laco man ma weko en giko yenyo kica woko.—Kwan 2 Jo Korint 2:5-8, 11.

15. Luelda gitwero miyo pwod kun ginyuto cwiny me kica bene nining?

¹⁵ Calo Jehovah, luelda bene gimaro nyuto kica. Gimiyo pwod ka mitte dok bene ginyuto cwiny me kica ka twere dok tyen lok me nyutone tye. Ka luelda pe gumiyo pwod ki labalo, ci nongo pe gunyuto cwiny me kica. Me ka meno, nongo gitye ka cwako tim marac. Tika mitte ni luelda keken aye gunyut cwiny me kica?

GIN ANGO MA TWERO KONYOWA ME NYUTO CWINY ME KICA?

16. Ma lubbe ki Carolok 21:13, Jehovah dok iye nining i kom jo ma gukwero nyuto cwiny me kica?

¹⁶ Lukricitayo ducu gitute me nyuto cwiny me kica calo Jehovah. Pingo? Tyen lok acel aye ni Jehovah pe biwinyo lega pa jo ma pe ginyuto kica bot jo mukene. (Kwan Carolok 21:13.) Pe tye ngat mo ma mito ni Jehovah okwer winyo legane, pi meno wagwokke adada ki dongo cwiny macol kun pe watimo kica. Pe wakwero miyo kony ki Lakricitayo ma tye ka deno can dok kare ducu wabedo atera me winyo “koko pa lucan.” I yo acel-lu, watute me keto i tic pwony man ma wanongo ki i Baibul ma waco ni: “Ngat ma pe timo kica kibingolo kop i wiye labongo kica.” (Yak. 2:13, NWT) Ka ki mwolo wiwa opo i kom kit ma wan bene wamito ni kitimiwa kica, ci wabibedo ki kare me nyuto kica bot jo mukene. Mitte tutwal ni wanyut cwiny me kica bot labalo ma ongut i kom balle ci odwogo cen i kacokke.

17. Kabaka Daudi onyuto cwiny me kica nining?

¹⁷ Labol ma i Baibul twero konyowa me nyuto cwiny me kica ki gwokke ki cwiny me gero. Me labolle, nen kong gin mo ma otimme i kwo pa Kabaka Daudi. Pol kare en onongo nyuto cwiny me kica. Kadi bed Caulo onongo mito neke woko, Daudi onyuto kica bot kabaka ma Lubanga owiro-ni. En pe otemo culo kwor i kom Caulo nyo keto awano i kome.—1 Cam. 24:9-12, 18, 19.

18-19. Tyen aryo mene ma Daudi pe onyuto cwiny me kica?

¹⁸ Ento Daudi onongo pe kare ducu nyuto cwiny me kica. Me labolle, Nabal onongo obedo laco mager dok oloko marac i kom Daudi kun bene okwero miyo cam ki Daudi kacel ki monnye. Man ocwero cwiny Daudi matek ci omoko tamme me neko Nabal ki co me ode ducu. Ento Abigail dako pa Nabal, onongo obedo dano ma lakica dok diyo cwinye, dok en orune ci omiyo cam bot Daudi. Pi meno, Daudi pe oneko Nabal ki co ma i ode.—1 Cam. 25:9-22, 32-35.

¹⁹ I kare mukene doki, lanebi Natan owaco ki Daudi ni laco mo ma olony adada omayo romo pa jiranine ma lacan. Ki kiniga madwong, Daudi owaco ni: “Macalo Rwot [Jehovah] tye makwo-ni, dano ma otimo kit meno ber ginek woko.” (2 Cam. 12:1-6) Daudi onongo ngeyo Cik pa Moses maber adada. Lakwo ma okwalo romo acel onongo myero ocul romi angwen. (Nia 22:1) Me ngolo kop ni kinek lakwo romo man woko onongo obedo cwiny marac adada. Natan onongo tye ka tic ki lapor man me konyo Daudi niang ni en otimo bal madit makato! Dok Jehovah onyuto kica ki Daudi i rwom ma lamal makato kit ma Daudi onyuto kwede kica i kom lakwo romo-ni ma i lapor pa Natan!—2 Cam. 12:7-13.

20. Gin ango ma wapwonyo ki i labol pa Daudi?

²⁰ I kare ma onongo kiniga omako Daudi matek, en omoko tamme me neko Nabal ki co ma i ode. Dok lacen, Daudi owaco ni laco ma olony ma i lapor pa Natan omyero kinek woko. I tyen me aryo-ni, watwero penye pingo Daudi ma obedo laco ma lakica twero ngolo kop kit meno. Tam kong i kom ngo ma onongo pud otimme atima. I kare meno, cwiny Daudi onongo tye ka pide matek. Ka ngat moni ngolo kop alenga i wi jo mukene ci nongo watte ki Jehovah pe tye maber. Yecu ociko lulub kore ni: “Pe wungol kop i kom jo mukene, wek wun bene pe kingol kop i komwu. Pien kop ma wungolo-ni bene gibingolo i komwu.” (Mat. 7:1, 2) Omyero wagwokke ki ngolo kop ki gero i wi jo mukene dok watute me bedo calo Lubangawa ma “lalonyo i kicane.”

21-22. I yo ma nining ma watwero nyuto kwede cwiny me kica?

²¹ Kica pe obedo gin ma wawinyo ki i cwinywa keken. Jo ma lukica gitimo jami me konyo jo mukene. Pi meno, wan ducu watwero yenyo jo ma gimito kony i pacowa, i kacokkewa, kacel ki ka ma wabedo iye. Ki lok ada, tye yo mapol adada ma watwero nyuto kwede cwiny me kica! Tika tye ngat mo ma mito cuko cwiny? Tika watwero mine kony, gwok nyo ki mine cam nyo tiyo tic mogo pire? Tika Lakricitayo mo ma kidwoko cen i kacokke mito larem macok ma twero cuko cwinye? Mono waromo nywako kwena maber ki jo mukene? Man obedo yo maber adada me nyuto kica bot jo ducu ma warwatte kwedgi.—Yubu 29:12, 13; Rom. 10:14, 15; Yak. 1:27.

²² Ka waniang ni jo mogo gimito kony ma kit man, ci wabibedo ki kare me nyuto kica i yo mapol adada. Ka wanyuto cwiny me kica, wayomo cwiny Wonwa me polo pien en “lalonyo i kicane”!