Kit me Roco Watti ki Jehovah

MWAKA ki mwaka, jo mapol ma kiryemogi ki i kacokke kidwokogi cen. Go kong ‘yomcwiny madit ma bedo i wi polo’ ka ngat acel odwogo cen ka woro Jehovah! (Luka 15:7, 10) Ka kidwoki cen i kacokke, iromo bedo labongo akalakala mo ni Yecu, lumalaika, ki Jehovah cwinygi yom adada ni idwogo cen. Ento, ka iwoto ki dongo watti ki Jehovah, iromo rwatte ki ariya mapol. Ariya macalo mene, dok ngo ma romo konyi me lweny kwedgi?

ARIYA MENE MA ITWERO KATO KI IYE?

Omege ki lumege mapol gilwenyo ki turcwiny kadi bed kidwokogi i kacokke. Twero bedo ni iniang kit ma Kabaka Daudi owinyo kwede. Kadi bed onongo kitime kica pi balle, en owaco ni: “Balla dong obwoyo koma woko.” (Jab. 40:12; 65:3) Ka ngat moni odwogo cen bot Jehovah, en pud cwinye romo pide nyo lewic romo make pi mwaki mapol. Laminwa Isabelle onongo kiryemo ki i kacokke pi mwaki makato 20 kulu.a En owaco ni, “Anongo ni tek adada me ye ni Jehovah romo timma kica.” Ka cwinyi otur, watti ki Jehovah dok twero doko goro. (Car. 24:10) Tute matek me neno ni gin ma kit meno pe otimme i komi.

Jo mukene gibedo ki lworo ni pe gibitwero timo jami ducu ma mitte me bedo ki wat macok ki Jehovah odoco. I nge dwogo cen i kacokke, omego ma nyinge Antoine owaco ni, “Wiya onongo owil woko i kom jami mapol ma apwonyo nyo atimo i kare ma onongo atye Lacaden.” Pien jo mukene giwinyo kit man, pe gitimo jami ducu ma myero gutim pi Jehovah.

Me labolle, ka yamo lapiru obalo ot pa ngat moni marac adada, cwinye romo tur ka en otamo pi cawa ki tic ma mitte me roco ode. I yo acel-lu, ka watti ki Jehovah oballe woko pi bal madit ma itimo, itwero tamo ni bimito tic matek adada me roco watti ki Jehovah. Ento pe mitte ni itim man keni.

Jehovah lwongowa ni: “Wubin kombeddi, wek wanywak tam kacel.” (Ic. 1:18, Baibol) Dong itiyo matek me ‘nywako tam kacel’ nyo yubo watti ki Jehovah. Jehovah mari adada pi tute me timo meno. Tam kong: Pien idwogo cen bot Jehovah, en romo tic kwedi macalo labol me moko ni Catan lagoba!—Car. 27:11.

Dwogoni cen bot Jehovah nyuto ni inyikke cok bot Jehovah, dok en ocikke ni en bene ebinyikke cok kwedi. (Yak. 4:8) Yomo cwiny jo mukene me neno ni idwogo cen i kacokke. Ento omyero itim makato meno. Mitte ni imedde ki dongo marri pi Woru kacel ki Laremi, Jehovah. Itwero timo meno nining?

KET YUB MA ITWERO COBONE KA IWOTO KI ROCO WATTI KI JEHOVAH

Temme me keto yub ma itwero cobone. Twero bedo ni wi pud po i kom pwony mogo ma pigi tego ma ipwonyo madok i kom Jehovah ki cikkene me kelo Paradic. Ento mitte dok ni ibed ki yub maber me tito kwena kare ki kare, cito i cokke, ki dong ribbe kacel ki omege ki lumege. Nen kong yub magi ma itwero ketogi.

Leg bot Jehovah kare ducu. Woru niang ni ka cwinyi bedo ka pidi pi bal ma itimo, biweko bedo tek boti me lega bote. (Rom. 8:26) Kadi bed kit meno, ‘mine keni i lego Lubanga ki cwinyi ducu,’ kun itito ki Jehovah kit ma imito bedo ki wat macok kwede. (Rom. 12:12) Omego mo ma nyinge Andrej wiye po ni: “Cwinya onongo pida dok lewic maka adada. Ento i nge lega acel acel, cwinya okwe. Abedo ki kuc dok ma wiya opye mot.” Ka pe ingeyo gin ma omyero ileg pire, tam i kom lega pa Kabaka Daudi i kare ma ongut i kom balle ma tye kicoyo i Jabuli 51 ki 65.

Kwan Baibul kare ki kare. Man bikonyi me bedo ki niye matek dok biweko marri pi Jehovah dongo. (Jab. 19:7-11) Omego mo ma nyinge Felipe owaco ni, “Pien onongo ape ki yub maber me kwano Baibul pira kena nino ducu, adoko goro adada dok atimo gin ma ocwero cwiny Jehovah. Onongo pe amito timo bal acel-li kiryo, pi meno aketo yub me kwan pira kena nino ducu.” In bene iromo timo gin ma kit meno. Ka imito kony me yero wi pwony ma itwero kwedo i kwanni piri keni, itwero penyo lawoti ma tye ki wat maber ki Jehovah wek okonyi.

Dong watti ki omege ki lumege odoco. Jo mogo ma gudwogo cen i kacokke gibedo ki lworo ni omege ki lumege cwinygi bicwer i komgi. Laminwa Larissa oye ni: “Lewic omaka adada. Awinyo calo aturo cwiny omege ki lumege ducu me kacokke. Abedo ka winyo kit meno pi kare malac.” Bed labongo akalakala mo keken ni luelda kacel ki jo mukene me kacokke gimito konyi me roco watti ki Jehovah. (Nen bok ma wiye tye ni “Ngo ma Luelda Gitwero Timone?”) Cwinygi yom ni idwogo cen i kacokke, dok gimito ni ibed ma cwinyi yom!—Car. 17:17.

Ngo ma romo konyi me nyikke cok ki jo me kacokke? Bed tye i cokke ducu kacel ki omegini ki lumegini dok inywak kwedgi i tic me tito kwena kare ducu. Man bikonyi nining? Felix owaco ni: “Jo me kacokke gubedo ka kuro dwogona ki yomcwiny. Awinyo calo kimara adada. Gin ducu gukonya me winyo maber ni dok adwogo cen i kacokke, ni Jehovah dong otimma kica, dok ni atwero medde ki tic pi Jehovah.”—Nen bok ma wiye tye ni “Gin Ango ma Itwero Timone?”

PE IIL CINGI WOKO!

Catan bimedde ki kelo peko mapol i yoni wek idok goro ka iwoto ki tute me dongo watti ki Jehovah. (Luka 4:13) Bed atera kun idongo watti ki Jehovah kombeddi.

Madok i kom romine, Jehovah ocikke ni: “Abiyenyo romi ma gurwenyo, dok abikwanyo romi ma yam gitye ka lak ata adwokogi cen, abitweyo tyen romi ma ret tye iye, abimiyo romi magoro gijing gidoko tek.” (Ejek. 34:16) Jehovah dong okonyo jo mapol me roco watgi kwede. Bed ki gen matek ni en mito konyi me medde ki dongo wat matek kwede.

Ngo ma Luelda Gitwero Timone?

Luelda gitwero timo jami mapol me konyo lutit kwena ma kidwokogi cen i kacokke me roco watgi ki Jehovah. Nen kong jami mogo ma gitwero timo pi jo ma kidwokogi cen i kacokke.

Cuk cwinygi. Lakwena Paulo onongo ngeyo ni ngat ma kidwoko cen i kacokke twero bedo ki “cwercwiny madit mukato kare.” (2 Kor. 2:7) En pol kare cwinye twero bedo ka pide, lewic make dok cwinye tur adada. Paulo omiyo tira bot jo me kacokke ni: “Wutimme kica, dok wukwe cwinye.” Jo ma kidwokogi cen i kacokke gimito cuko cwiny ni Jehovah kacel ki omegigi ki lumegigi pud gimarogi matek. Ka luelda pol kare giminigi pwoc dok gikonyogi, man romo konyogi me lweny ki turcwiny.

Leg kwedgi. “Lega pa dano ma kite atir tek, tye ki twero madwong.” (Yak. 5:16) Larissa, ma kiloko i kome con-ni owaco ni: “Atito ki luelda akalakala kacel ki lworo ma onongo atye kwede. Gin gulego kweda dok pira. Man oweko aniang ni luelda onongo pe gukeco i koma. Onongo gimito konya me yubo watta ki Jehovah.” Omego Theo owaco ni: “Lega pa luelda okonya me niang ni Jehovah mara mada dok neno jami mabeco ma atimo ento pe jami maraco keken.”

Dok laremgi. Jo ma kidwokogi cen i kacokke gimito lurem. Laelda mo ma nyinge Justin owaco ni: “Ti ki kare mo keken ma onen me lwongogi me tic kacel kwedi i tic me pwony, ki dong ma pire tek loyo, limgi i gangigi. Pire tek adada me bedo laremgi!” Laelda mukene ma nyinge Henry owaco ni: “Ka jo mukene i kacokke gineno luelda gimako lirem ki jo ma kidwokogi cen i kacokke, gin bene gibitimo kit meno.”

Konygi me kwan. Larem muteggi i yo me cwiny romo konyo ngat ma kidwoko i kacokke me bedo ki yub maber me kwan pire kene. Laelda mo ma nyinge Darko owaco ni: “Amaro nywako kwedgi jami mabeco ma anongo i kwan pira kena ki dok nyutigi kit ma amaro kwede kwano Baibul. Aketo bene yub me kwano pwony mo ma cuko cwiny kacel kwedgi.” Laelda mukene ma nyinge Clayton owaco ni: “Acuko cwinygi me nongo pwony ki i Baibul i kom jo mogo ma gukato ki i peko macal ki ma gin gitye ka kato ki iye.”

Bed lakwat maber. Jo ma kidwokogi cen i kacokke guneno luelda i ticgi macalo lungolkop. I kare ma dong kidwokogi cen, mitte adada ni gunen luelda macalo lukwat. (Jer. 23:4) Bed atera me winyo lokgi kacel ki miyo botgi pwoc. Kubbe kwedgi teretere. Nen kong gin ma laelda mo ma nyinge Marcus timo ka ocito i lim me kwat: “Wanywako Ginacoya mo, waminigi pwoc, dok wacuko cwinygi ni cwinywa yom adada pi tutegi me dwogo cen i kacokke dok ni Jehovah bene cwinye yom. I agikki me lim acel acel, wamoko nino me dok cen pi lim mukene.”

a Nying ma i pwony man kiloko woko.