1921 Mwaki Miya Acel Angec

“TIC ango ma tye me atima i mwaka-ni?” Watch Tower me Januari 1, 1921, openyo Lutino Kwan me Baibul ki lapeny meno. Ci ogamo lapeny meno kun loko i kom Icaya 61:1, 2, ma opoyo wigi i kom tic me tito kwena maber-ri. “Rwot [Jehovah] Lubanga dong ocwalo cwiny mere i koma, pien dong owira woko ki moo, wek ater lok me kwena maber bot jo ma giunogi . . . , dok ni atit pi mwaka ma Rwot bitimo iye ber bot dano, ki kare me culo kwor pa Lubangawa.”

LUTIT KWENA MA CWINYGI TEK

Wek guti tic man me tito kwena, onongo mitte ni Lutino Kwan me Baibul gubed ki tekcwiny. Onongo bimitte ni gutit “lok me kwena maber” bot jo mamwol kun bene gitito pi “kare me culo kwor” bot jo ma kitgi raco.

Omego J. H. Hoskin, ma onongo bedo i lobo Canada, omiyo caden ki tekcwiny kadi bed kibedo ka keto aunauna i komgi. I acakki me mwaka 1921, en orwatte ki lapwony dini mo. Omego Hoskin ocako lok ki laco man kun waco ni: “Omyero wanywak lok me Baibul ki yomcwiny. Dok kadi bed tamwa pe orwatte i kom pwony mo, pud watwero giko lokwa ki kuc ma nongo pud watye lurem.” Ento tika meno otimme? Omego Hoskin wiye po ni: “Onongo pud waloko pi dakika mo manok keken ci lapwony dini man oloro doggola ci ocanyo matek adada ma atamo ni marayane bipoto wa i ngom.”

Lapwony dini man odange ni: “Pingo pe icit ilok ki lukampiri?” Omego Hoskin pe ogamo lokke meno, ento i kare ma en tye ka a ki gang pa laco man, en obedo ka tam ni, ‘Ki i cwinya abedo ka tamo ni atye ka lok ki lakampiri!’

I kare ma lapwony dini man tye ka pwonyo dano i kanicane orwone, en owaco lok goba mapol i kom Omego Hoskin. Omego Hoskin wiye po ni: “En owaco ki dano ma i kanicane ni an abedo lagoba madit loyo ma pud dong obino i taun meno dok ni omyero kineka woko.” Ento man pe ojuko ominwa-ni, en omedde ki tito kwena dok oloko ki dano mapol. En owaco ni: “Anongo mit pa tito kwena i kabedo man adada. Jo mogo bene guwacca ni, ‘Angeyo ni in itye ka tiyo tic pa Lubanga!’ dok gujalle me mina jami ma amito.”

KWAN PIWA KENWA KI WORO PI JO ME OT

Me konyo dano niang Baibul maber, Lutino Kwan me Baibul onongo kare ki kare gigoyo lapeny me Baibul kacel ki lagamme i magajin ma i kare-ni walwongo ni Awake! Onongo bene tye lapeny me Baibul pi jo matino ma lunyodo twero tic kwede me nyamo lok me Baibul ki lutinogi. Lunyodo onongo “gipenyo lutinogi lapeny magi dok gikonyogi me nongo lagamme i Baibul.” Lapeny mogo calo “Bukke adi ma tye i Baibul?,” onongo pwonyo jami mayotyot ma tye i Baibul. Lapeny mukene calo, “Tika Lakricitayo me ada myero onge ni ebikato ki i aunauna i yo mo olo?,” onongo konyo jo matino me doko lutit kwena ma cwinygi tek.

Onongo bene tye lapeny me Baibul ki lagamme pi jo ma olo dong gitye ki ngec i kom Baibul. Lagam magi onongo nonge i buk me acel i kin bukke me Studies in the Scriptures. Jo mapol gupwonyo jami mapol ki i lapeny magi, ento lacen kimiyo lok angeya ni kibijuko goyo lapeny magi woko. Pingo kijuko?

BUK MANYEN!

Buk me *The Harp of God*

Kad ma tye ki yub me kwan

Kad ma tye ki lapeny

Omege ma onongo gitye ka doro ticwa guniang ni mitte ki dano me pwonyo lok me Baibul kore ki kore. Pi meno, gucwalo woko buk manyen ma wiye tye ni The Harp of God i Novemba 1921. Jo ma gunyuto miti me kwano Baibul onongo gicako yub mo me kwano Baibul ma gitwero timone pigi kengi. Yub me kwano Baibul man okonyo dano me pwonyo lok i kom yub pa Lubanga me miyo ki dano kwo ma pe tum. Yub me kwano Baibul man onongo woto nining?

Ka ngat mo ogamo kopi me buk man, onongo bene kicwale yub me kwan ma kigoyo i kom kad mo matidi. I cabit ma lubo, kicwale kad ma tye ki lapeny madok i kom jami ma en okwano. Kad man onongo gik ki yub me kwan pi cabit ma lubo.

Cabit ducu pi cabit 12, latin kwan man onongo nongo kad manyen ki i ka gamo waraga (posta) ma kacokke macok kwede aye ocwalo. Pol kare jo muti nyo jo ma pe gitwero tito kwena i ot ki ot aye onongo gicwalo kad man. Me labolle, Anna K. Gardner, ma bedo i Millvale, Pennsylvania, i lobo Amerika owaco ni: “I kare ma kicwalo woko The Harp of God, man omiyo ki lamera Thayle, ma tye langolo, tic me atima me cwalo kad ma tye ki lapeny magi cabit ki cabit.” Ka latin kwan otyeko yub me kwano Baibul man, ngat mo ma i kacokke onongo lime wek omedde ki pwonye jami mapol madok i kom Baibul.

Thayle Gardner obedo i wi lela pa lungolo

TIC MA ONONGO TYE ANYIM

I agikki me mwaka meno, Omego J.F. Rutherford ocwalo waraga bot kacokke ducu. En ocoyo i waragane ni “kwena madok i kom Ker-ri i mwaka-ni oo bot jo mapol adada dok okonyo dano mapol makato i mwaki ducu mukato angec.” Ci en omedo ni: “Tic pud tye mapol me atima. Wacuko cwiny jo mukene wek gubin gunywak kacel kwedwa i tic man mamwonya-ni.” Onen ka maleng ni Lutino Kwan me Baibul gutimo gin ma en owaco. I mwaka 1922 gutito kwena me Ker-ri ki tekcwiny makato mwaka mo keken mukato angec.

Lurem ma Cwinygi Tek

Lutino Kwan me Baibul gunyuto mar me omego ki konnye i kingi. Onongo gubedo lurem ma “ginywalo me nywako peko,” kit ma gin mutimme man binyuto kwede.—Car. 17:17.

I Ceng Aryo, Mai 31, 1921, laco mo ma tye ocol i boma me Tulsa, Oklahoma, i lobo Amerika kibole i buc pien kikok i kome ni olwenyo i kom dako mo ma tye muno. I nge meno, co ma muni ma romo 1,000 gulwenyo ki gurup mo matidi pa co ma tye ocol. Lweny man onya oyotoyot i kabedo ma ocol keken aye gibedo iye, ma kilwongo ni Greenwood. Gangi makato 1,400 kacel ki dukan kiyako ci kiwango woko. Ripot ma kicwalo waco ni dano 36 guto, ento nen calo dano ma romo 300 guto. Lacen kilwongo jemo man ni Tulsa Race Massacre.

Omego Richard J. Hill, ma onongo tye Latin Kwan me Baibul ma tye ocol dok bedo i Greenwood, otito gin ma otimme: “I dyewor me jemo meno, wabedo i cokkewa kit ma timme kare ki kare. I nge tyeko cokkewa, wawinyo koko pa muduku i taun me Tulsa. Muduku omedde ki kok wa i cwiny dyewor.” Ceng Adek odiko, Juni 1, piny onongo oballe adada. “Jo mogo gubino guwacciwa ni ka wamito gwokke ci omyero wacit i ot me gure ma gamente tye ka gwoko iye dano cutcut.” Pi meno, Omego Hill ki dakone kacel ki lutinogi abic guringo i ot me gure ma tye i Tulsa. Ki kunu, co ki mon ma tye ocol ma romo 3,000 onongo gitye i te gwok pa mony ma gamente ocwalo me juko jemo man.

I kare me jemo man, Omego Arthur Claus, ma tye muno, omoko tam mo ma mito tekcwiny adada. “I kare ma awinyo ni dano gitye ka kwalo jami ki wango gangi i Greenwood, amoko tamma me cito kunu ka neno kit ma larema me amara, Omego Hill tye kwede.”

Omego Arthur Claus otiyo ki buk me The Harp of God me konyo lutino 14 me pwonyo jami mapol ki i Baibul

I kare ma en oo i gang pa Omego Hill, en oneno jiranine mo ma tye muno omako muduku i nyim ot pa Omego Hill. Jirani man ma obedo larem Omego Hill, otamo ni Arthur obedo ngat acel i kin lujemo. Jirani-ni odange ki dwan malongo ni, “Pingo ibino i nyim ot pa laco man?”

Arthur wiye po ni, “Ka onongo en pe oyeng ki tyen lok ma oweko onongo acito kunu onongo en bicela woko ki mudukune. Atitte ni abedo larem Omego Hill dok ni con onongo amaro bino i gange.” Arthur kacel ki jirani-ni gugwoko gang pa Hill maber dok pe kikwalo gin mo keken.

Lacen, Arthur oniang ni Omego Hill kacel ki jo gange gitye i ot gure. Kitito ki Arthur ni jo ma tye ocol onongo pe gitwero a ki i ot me gure meno labongo waraga ma ladit mony General Barrett oketo iye cinge. Arthur otito ni: “Onongo tek adada me lok ki ladit mony man. I kare ma awacce pulanna, en openya ni: ‘Tika ibigwokke kacel ki jo gange kun iminigi jami ma mitte?’ Ki yomcwiny madit, awacce ni abitimo.”

I kare ma kimine waraga i cinge, Arthur oringo ocito i ot gure. En onyuto waraga man bot lamony ma tye ka gwoko ot me gure man ci lamony meno owaco ni: “Ladit mony aye oketo iye cinge en kikome! Tika ingeyo ni in aye ibedo dano mukwongo ma obino ka gamo ngat mo keken ki kany tin?” Ma pe orii, Arthur ki lamony man gunongo Omego Hill ki jo gange. Gin ducu gudonyo i mutoka pa Arthur ci gucito i gang pa Omego Hill.

Omego Arthur otiyo matek me neno ni jo gang pa Omego Hill kigwokogi maber. I kare ma jo mukene guneno mar me omego ki tekcwiny ma Omego Arthur onyuto, man ogudogi adada. Arthur otito ni: “Jirani ma okonyo gwoko gang pa Hill, marre ki worone i kom Lucaden pa Jehovah omedde. Dok dano mapol gunyuto miti i kom lok ada pien guneno ni jo pa Lubanga pe gupokke pi kala del kom dok ni pe tye ngat mo ma tamo ni en pire tek eloyo lawote i kin jo pa Lubanga.”