Pingo Tim me Adage Onya Matek?

Ngo ma omiyo tim me adage onya dok tye ka medde ameda i lobo? Me ngeyo lagamme, omyero kong waniang gin ma adage obedo, gin ma omiyo dano gidag luwotgi, ki dong kit ma adage nya kwede.

Adage Obedo Gin Ango?

Adage kwako bedo ki cwiny ma kec adada i kom ngati mo nyo jo moni. Adage ma kit meno pe obedo akemo ma dano bedo kwede pi kare manok mo keken, ento rii pi kare malac.

PINGO DANO CAKO DAGO JO MUKENE?

Dano gicako dago luwotgi pi tyen lok mapol. Giromo cako dago dano ducu me gurup moni kadi pe gutimo gin mo marac. Gitwero cako dago jo meno pien gitamo ni gin jo maraco, lutim bwami dok pe gitwero loko kitgi. Giromo neno jo ma kidaggi-ni ki cac, calo jo ma twero kelo peko i kwo pa luwotgi. Jo ma gitye ki cwiny me adage i kom jo mukene pol kare nongo gukato ki i tim bwami, ngolo kop alenga, nyo gin mo otimme i komgi ma oweko adage tye madwong i cwinygi.

KIT MA ADAGE NYA KWEDE

I kine mukene, dano gidag jo ma bene peya gurwatte kwedgi. Me labolle, dano pol kare gibedo ki cwiny marom ki pa jo me ganggi nyo luremgi i kom ngat mukene. Pi meno, ka dano mo ki i pacogi nyo lureme gidag ngat moni ci man weko dano ducu me paco meno bene gicako dago ngat meno.

Ka dong waniang maber kit ma yot kwede pi adage me kobo bot jo mukene, ci wabiniang bene gin mumiyo dano mapol gidag jo mukene. Ento me juko nya pa tim me adage, omyero kong wange kit ma adage ocakke kwede. Watwero pwonyo meno ki i Baibul.

BAIBUL NYUTO KIT MA ADAGE OCAKKE KWEDE

Cal atero aryo ma tye i lawala, ma cung pi jami ma nyayo adegadega. 1. Lubo lok goba, pa luwoti, ma i Intanet, ki ma i lok angeya. 2. Bedo ki ngec manok i kom tekwaro, kaka, nyo dini pa jo mukene. 3. Bedo ki lworo ni kibiloko kwoni, kibimayo jamini, nyo i kom jami ma pe ingeyo. 4. Adage, ma kwako apokapoka, cimo tok, ki tim bwami.

CWINY ME ADAGE PE OCAKKE KI BOT DANO. Adage ocakke i kare ma lamalaika mo i polo ma lacen kilwonge ni Catan Larac-ci, ojemo i kom Lubanga. Larac-ci onongo ‘lanek cakke wa con’ i kare ma en ojemo. Macalo “lagoba, doki won goba,” en tye ka medde ki cwako cwiny me adage ki tim bwami. (Jon 8:44; 1 Jon 3:11, 12) Baibul wacciwa ni en cwinye col, tye ki akemo madwong dok ger adada.—Yubu 2:7; Niyabo 12:9, 12, 17.

YOT KI DANO MA TYE KI ROC ME DAGO JO MUKENE. Dano mukwongo, Adam, olubo yo me bal pa Catan. Pi meno, dano ducu gulako bal kacel ki roc ki bote. (Jo Roma 5:12) Latin kayo pa Adam, Kain, obedo ki cwiny me adage i kom ominne Abel, ci oneke woko. (1 Jon 3:12) Kadi bed kit meno, dano ginyuto mar ki kica. Ento pi bal ma walako-ni, pol pa dano giparo pigi kengi, gilunyeko, dok gimaro wakke—dok kit maraco magi kelo adage.—2 Temceo 3:1-5.

NGAT MA PE MARO JO MAPAT KWEDE POL KARE DONGO CWINY ME ADAGE. Lobo-ni medo cwiny me adage kun cwako tim gero. Tim maraco calo apokapoka me kaka, yet, bwura, ki dong balo jami pa dano onya adada pien “lobo ducu tye i te loc pa Larac,” ma en aye Catan.—1 Jon 5:19.

Baibul pe tito jami ma kelo cwiny me adage keken. Tittiwa bene kit me lweny ki cwiny meno.