Gwok Genni Macalo Lakricitayo Obed Matek

1. Gen ango ma Jehovah ominiwa?

JEHOVAH omiyo botwa gen mamwonya adada me bedo ki kwo ma pe tum. Jo mogo gitye ki gen me kwo pi naka i polo macalo cwec me cwiny ma pe gitwero to. (1 Kor. 15:50, 53) Ento, pol pa wan watye ki gen me kwo pi naka i lobo ma nongo komwa yot dok cwinywa yom. (Yabo. 21:3, 4) Kadi bed watye ki gen me kwo nakanaka i polo nyo i wi lobo, genwa pire tek botwa.

2. Genwa cung i kom ngo, dok pingo wawaco kit meno?

² Nyig lok man ni “gen,” ma kitiyo kwede i Baibul, twero gonye ni “bedo ki niye ni jami mabeco bitimme.” Watwero bedo labongo akalakala mo keken ni genwa pi anyim bicobbe pien gen man a ki bot Jehovah. (Rom. 15:13) Wangeyo gin ma en ociko, dok wangeyo ni kare ducu en gwoko lokke. (Wel 23:19) Waye ada ni Jehovah tye ki miti kacel ki teko me cobo jami ducu ma en ocikke me timone. Dong pi meno, genwa pe cung i kom lek mamwa nyo mitiwa. Genwa cung i kom gin ma wangeyo ni tye ada.

3. Ngo ma wabinyamo i pwony man? (Jabuli 71:5)

³ Wonwa me polo marowa, dok en mito ni wagene. (Kwan Jabuli 71:5.) Ka genwa i kom Jehovah tye matek, wabibedo ki kare me ciro atematema dok wabibedo ki tekcwiny kacel ki yomcwiny kadi bed gin ango otimme i komwa. Kong dong wanenu kit ma genwa gwokowa kwede. Me timo meno, wabicako ki nyamo kit ma gen tye calo lajuk me mel ki otok nyonyo. I nge meno wabinyamo kit ma watwero jingo kwede genwa.

GENWA TYE CALO LAJUK ME MEL

4. I yo ma nining ma gen tye calo lajuk mel? (Jo Ibru 6:19)

⁴ I waragane bot Luibru, lakwena Paulo oporo genwa ki lajuk me mel. (Kwan Jo Ibru 6:19.) En onongo maro wot ki mel, pi meno onongo ngeyo ni lajuk mel gengo mel ki mol kun weko cung mot i kabedo acel. I kare mo, en onongo tye ka wot ki mel, ci yamo magwar ocako kodo. I kare ma yamo magwar meno tye ka kodo, en oneno ka lukwang mel gubolo lajuk mel angwen i pii ki tung tere me juko mel ki twommo got ma i pii. (Tic 27:29, 39-41) Kit macalo lajuk mel weko mel cung mot, genwa weko wacung matek ma pe wadirre woko ki bot Jehovah ka watye ka kato ki i pekki macal ki yamo magwar. Genwa weko wabedo ma wiwa opye mot ka watye ka kato ki i peko pien nongo waye ni jami biyubbe. Wi opo ni, Yecu ocikowa ni kibiunowa. (Jon 15:20) Pi meno, bedo ka lwodo lok i kom gin ma Jehovah ociko pi anyim bikonyowa me medde ki tic pire.  

5. Gen okonyo Yecu nining i kare ma en okemme ki to?

⁵ Nen kong kit ma gen okonyo kwede Yecu me bedo lagen kadi bed en ongeyo ni ebito to malit. I nino me Pentekote mwaka 33 K.M., lakwena Petero oloko i kom lok pa lanebi mo ma nonge i buk me Jabuli ma tito kit ma Yecu obedo kwede ki tekcwiny, ni: “Nino ducu abedo maber kun atye ki gen. Pien in pe ibitenya ata i lobo pa jo muto, pe ibiweko kom danoni ma geni top woko. . . . Bedoni kweda bimiyo abedo ki yomcwiny madwong mada.” (Tic 2:25-28; Jab. 16:8-11) Kadi bed Yecu onongo ngeyo ni ebito, en onongo tye ki gen matek ni Lubanga bicere dok ni ebibedo ki yomcwiny me ribbe kacel ki Wonne i polo.—Ibru 12:2, 3.

6. Gin ango ma omego mo acel owaco madok i kom gen?

⁶ Genwa macalo Lukricitayo okonyo omegiwa ki lumegiwa mapol me ciro can. Nen kong labol pa Leonard Chinn, omego mo ma lagen ma onongo bedo i England. I kare me Lweny me Wi Lobo me Acel, kibole i buc pien okwero donyo i mony. Pi dwe aryo, kiloro wiye i ot bucce kene. I nge meno, kidiye me bedo ka tiyo tic opii. Lacen en ocoyo ni, “Jami ma akato ki iye okonya me niang kit ma pire tek kwede me bedo ki gen ka wamito medde ki ciro can. Watye ki lanen pa Yecu, lukwena ki lunebi, dok watye ki cikke mamwonya ma kimiyo botwa i Baibul. Jami magi ducu miniwa gen matek pi anyim dok jingowa me ciro can.” Gen obedo calo lajuk mel bot Leonard, dok twero bedo lajuk mel botwa bene.

7. Pekki ma wakato ki iye twero jingo genwa nining? (Jo Roma 5:3-5; Yakobo 1:12)

⁷ Ka waciro can dok waneno kit ma Jehovah konyowa kwede, waniang ni watye ki cwakke. Man weko genwa bedo matek. (Kwan Jo Roma 5:3-5; Yakobo 1:12.) I nge meno, nongo dong watye ki gen matek loyo ma wabedo kwede i kare ma pud wajolo kwena maber ajola. Catan mito ni pekkiwa obwowa woko, ento ki kony pa Jehovah, watwero kanyo pekki magi ducu.

GENWA TYE CALO OTOK NYONYO

8. I yo ma nining ma gen tye calo otok nyonyo? (1 Jo Tecalonika 5:8)

⁸ Baibul bene oporo genwa ki otok nyonyo. (Kwan 1 Jo Tecalonika 5:8.) Lamony onongo ruko otok nyonyo me gwoko wiye ki i kom atero ma lumonene bayo kun kemo wiye. I lwenywa i kom Catan, mitte ni wagwok wiwa ki i kom atero ma Catan bayo. En tiyo ki jami mapatpat me bitowa ki me balo tamwa. Kit macalo otok nyonyo gwoko wi lamony, genwa gwoko tamwa wek wamedde ki bedo lugen bot Jehovah.

9. Ngo ma timme i kom jo ma gipe ki gen?

⁹ Genwa me nongo kwo ma pe tum bikonyowa me moko tam mabeco. Ki tungcel, ka genwa odoko goro dok wacako tamo pi mitiwa keken, wiwa twero wil woko i kom genwa me nongo kwo ma pe tum. Nen kong gin mutimme i kom Lukricitayo mogo ma onongo gikwo i boma me Korint macon. Gurwenyo niye i kom cikke mo ma pire tek adada pa Lubanga—ma en aye gen me nicer. (1 Kor. 15:12) Paulo ocoyo ni jo ma pe giye i kom nicer gikwo mere pi cobo mitigi keken. (1 Kor. 15:32) I kare-ni, jo mapol ma pe gitye ki gen i kom cikke pa Lubanga gitimo gin mo keken ma gitwero me yomo cwinygi kombeddi. Ento wan wapat pien waketo genwa i kom cikke pa Lubanga pi anyim. Genwa tye calo otok nyonyo ma gwoko tamwa dok weko pe watamo pi cobo mitiwa keken, ma meno balo watwa ki Jehovah woko.—1 Kor. 15:33, 34.

10. I yo ma nining ma gen twero gwokowa ki i kom tam maraco?

¹⁰ Genwa twero bene gwokowa ki i tamo ni tutewa me yomo cwiny Jehovah konye pe. Me labolle, jo mogo giromo tamo ni: ‘An pe abibedo i kin jo ma gibikwo nakanaka. Pe apore kulu. Pe abitwero timo gin ma Lubanga mito ni atim.’ Wi opo ni Erifaji, ma otimme calo etye ka cuko cwiny Yubu, bene otiyo ki kodi tam meno bot Yubu. Erifaji owaco ni: “Dano gin ango, ma miyo en twero bedo ma iye leng?” Medo i kom meno, en oloko kit man i kom Lubanga: “Nen, Lubanga pe geno wa jone maleng-gu, polo kulu pe leng ki i wange.” (Yubu 15:14, 15) Meno pud dong obedo goba madongo ya! Wi myero opo ni Catan aye mito ni itam kit meno. En ngeyo ni ka ibedo ka tam kit meno, ci ibicako rwenyo genni woko. Dong, kwer goba ma kit meno lajwac dok icik wangi i kom cikke pa Jehovah. Pe ibed ki akalakala mo keken ni en mito ni inong kwo ma pe tum dok bikonyi me cobo miti meno.—1 Tem. 2:3, 4.

GWOK GENNI OBED MATEK

11. Pingo omyero wadi cwinywa ka wawoto ki kuro cobbe pa genwa?

¹¹ Pe yot kare ducu me gwoko genwa wek obed matek. Watwero ol woko ki diyo cwinywa ka wakuro Lubanga me cobo cikkene. Ento, pien Jehovah acakkine pe, wa ki agikkine bene, man weko gin ma nen calo otero kare malac botwa, ki tung bote nongo cok adada. (2 Pet. 3:8, 9) En bitimo gin ma ocikke pire i yo maber loyo, ento en pe oromo timone i kare ma nongo wan wamito. Ngo ma twero konyowa me gwoko genwa wek obed matek ka wawoto ki kuro Lubanga me cobo cikkene?—Yak. 5:7, 8.

12. Ma lubbe ki Jo Ibru 11:1, 6, gen kubbe nining ki niye?

¹² Wabigwoko genwa bedo matek ka wamedde ki bedo cok ki Jehovah, pien en aye biweko genwa cobbe kakare. Ki lok ada, Baibul nyuto ni wek wabed ki gen, myero wabed ki niye ni Jehovah tye, dok ni “en miyo bakacic bot jo ma yenye.” (Kwan Jo Ibru 11:1, 6.) Ka waye ada ni Jehovah tye, ci wabibedo ki tekcwiny ni en bicobo gin ducu ma en ociko. Kong dong wanyamu yo mogo ma watwero dongo kwede wat matut ki Jehovah wek wamedde ki gwoko genwa obed matek.

13. Watwero nyiko cok bot Lubanga nining?

¹³ Leg bot Jehovah, dok ikwan Lokke. Kadi bed pe watwero neno Jehovah, pud waromo nyiko cok kwede. Waromo lok kwede i lega, ki tekcwiny ni en biwinyo legawa. (Jer. 29:11, 12) Watwero winyo Lubanga ki kwano Lokke kacel ki lwodone. Ka wawoto ki kwano kit ma Jehovah ogwoko kwede jo ma lugen i kare mukato angec, genwa bimedde ki dongo. Jami ducu ma nonge i Lok pa Lubanga “gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.”—Rom. 15:4.

14. Pingo omyero wabed ka lwodo lok i kom jami ma Jehovah otimo pi jo mukene?

¹⁴ Lwod lok i kom kit ma Jehovah ogwoko kwede cikkene. Tam kong i kom gin ma Lubanga otimo pi Abraim gin ki Cara. Onongo dong gutii woko ma pe gitwero nywalo lutino. Kadi bed kit meno, Lubanga onongo ocikke botgi ni gibinywalo latin. (Acak. 18:10) Abraim odok iye nining? Baibul waco ni: “Oketo genne i kom gin ma nen calo pe gitwero geno, omiyo en odoko kwaro rok mapol.” (Rom. 4:18) Kadi bed Abraim onongo pe ngeyo kit ma cikke pa Lubanga bicobbe kwede, en obedo ki tekcwiny ni Jehovah bicobo cikkene. Laco ma lagen-ni pe onongo turcwiny mo pi keto genne i kom Lubanga. (Rom. 4:19-21) Lok ma kit meno pwonyowa ni kare ducu watwero bedo ki tekcwiny ni Jehovah bicobo cikkene ducu, kadi bed nen calo gin ma pe twere ki tung botwa.

15. Pingo omyero wabed ka tam i kom gin ma Jehovah dong otimo piwa?

¹⁵ Tam matut i kom gin ma Jehovah dong otyeko timone piri. Tam i kom cikke ma nonge i Lok pa Lubanga ma dong ineno ocobbe ada i kwoni. Me labolle, Yecu ocikke ni Wonne bimini jami ducu ma mitte pi kwo. (Mat. 6:32, 33) Yecu bene ocuko cwinyi ni Jehovah bimini cwiny mere maleng ka ce ipenyo pire. (Luka 11:13) Jehovah ogwoko cikkene magi. Nen calo itwero tamo pi cikkene mukene ma ocobo piri. Me labolle, en ocikke me timmi kica, me kweyo cwinyi, ki dong me mini cam me cwiny kare ducu. (Mat. 6:14; 24:45; 2 Kor. 1:3) Ka ibedo ka lwodo lok i kom gin ma Lubanga otyeko cobone piri, man bijingo genni i kom jami ma en bitimo piri i anyim.

CWINYWU OBED YOM PI GIN MA WUGENO

16. Pingo gen obedo mic ma pire tek tutwal?

¹⁶ Genwa me nongo kwo ma pe tum obedo mic ma pire tek adada mua ki bot Lubanga. Watye ka kuro anyim mamwonya adada—ma watye ki gen matek ni bibino. Gen meno bedo calo lajuk mel, ma weko pe watagge dok wamedde ki ciro can, kanyo aunauna, nyo kadi wa kemme ki to. Bedo calo otok nyonyo, ma gwoko tamwa wek wakwer gin marac dok wamok matek i kom gin ma atir. Genwa ma jenge i kom Baibul nyikowa cok bot Lubanga dok nyuto tut pa marre piwa. Wanongo adwogi maber adada ka wagwoko genwa bedo matek.

17. Pingo genwa keliwa yomcwiny?

¹⁷ I waragane bot jo Roma, lakwena Paulo ocuko cwinygi ni: “Cwinywu obed yom pi gin ma wugeno.” (Rom. 12:12) Paulo onongo twero bedo ki yomcwiny pien en onongo ngeyo ada ni ka emedde ki gwoko genne, ci ebinongo kwo ma pe tum i polo. Wan bene watwero bedo ki yomcwiny pi gin ma wageno pien wangeyo ada ni Jehovah bigwoko cikkene ducu. Kit ma laco jabuli ocoyo kwede, “tye ki gum [yomcwiny] dano . . . ma genne ducu tye i kom Rwot [Jehovah] Lubangane, . . . En gwoko cikkene nakanaka.”—Jab. 146:5, 6.