Gin Maber ki Marac: Lapeny ma Wakemme Kwede

Ka imito wot me cito i kabedo mo ma naka yam peya io iye, gin ango ma ibitimo?

1. 1. Cak wot i yo ma itamo ni biteri kunnu.

2. 2. Lub kor jo mukene, ki gen ni gingeyo yo meno.

3. 3. Ti ki gin mo ma genne ma twero nyutti yo, calo GPS, nyo mep, nyo peny laremi mo ma ngeyo yo meno maber.

Ka wayero yo me acel nyo aryo, ci wabio ka mo gire, ento pe wamaro o ka ma wamito cito iye kikome. Ento ka wayero yo me adek, ci watwero bedo ki tekcwiny ni wang ma wao ka ma wamito cito iye-ni.

Kwowa kitwero porone ki wot—wot ma wageno ni biterowa i kwo maber i anyim. Ka wabio kunnu nyo pe, jenge i kom ka ma wayenyo iye tira ka watye ka moko tam.

Kadi bed pol pa tam ma wamoko obedo tam matino tino, ento tye mukene ma pigi tek adada. Tam ma pigi tego magi ginyuto gin ma waye ni ber nyo rac. Tam magi bigudo kwowa kacel ki kwo pa jo ma wamaro pi kare malac, i yo maber nyo i yo marac. Tam magi kwako lok madok i kom:

• Tim me buto ki nyom

• Bedo lagen, dog tic, ki cente

• Kit me pwonyo lutino

• Kit me tero jo mukene

Itwero ngeyo nining ka tam ma imoko i lok magi bikelo anyim maber piri ki lupaconi?

Lapeny ma wan ducu wakemme kwede ene: Gin ango ma twero konya me moko tam mabeco ka odok i kom gin matir ki gin marac?

Magajin man bitito pingo watwero geno gin ma Baibul waco ka odok i kom gin maber ki gin marac kacel ki kit ma Baibul twero konyi kwede.