Pe ia Woko ki i Paradicwa me Cwiny

1. Paradic me cwiny obedo gin ango, dok omyero wamok tamwa me timo gin ango?

TYE paradic mo i lobo i kare-ni ma opong ki dano ma gitye ka timo jami mabeco. Opong ki dano milion mapol ma gitye ki kuc me ada. Jo ma dong gitye i paradic man gumoko tamgi pe me a woko ki iye. Gitye bene ki miti ni jo mapol myero guribbe kwedgi i paradic man ma mamwonya adada-ni. Man paradic ma nining? Obedo paradic me cwiny!a

2. Gin ango ma tye me ur madok i kom paradic me cwiny?

² Ki ur madit, Jehovah oyubo kabedo mo ma jone gibedo iye ki kuc dok ma gunote, kadi bed gikwo i lobo marac adada pa Catan, ma opong ki jo ma gidag luwotgi. (1 Jon 5:19; Yabo 12:12) Lubangawa ma lamar-ri neno kit ma lobo man balo kwede kit pa dano, ento en gwoko luticce wek gumedde ki tic pire ki yomcwiny. Lokke tito ni paradic me cwiny obedo “ka-gwok” kacel ki “poto ma kionyo pii oromo iye maber.” (Ic. 4:​6, NWT; 58:11) Ki kony pa Jehovah, jo ma gibedo i paradic man gitye ki yomcwiny dok ginongo gwok muromo i kare man me agikki ma kwo tek-ki.—Ic. 54:14; 2 Tem. 3:1.

3. Lok pa lanebi ma nonge i Icaya cura 65 ocobbe nining i kare pa Luicrael macon?

³ Jehovah otiyo ki lanebi Icaya me tito kit ma kwo bibedo kwede pi jo ma gibibedo i paradic me cwiny. Itwero nongo lok pa lanebi man i buk pa Icaya cura 65, ma cobbene mukwongo obedo i mwaka 537 K.M.P. I kare meno, Lujudaya ma gungut kigonyogi ki i opii i Babilon ci gudok cen i lobogi. Jehovah ogoyo laane i kom jone dok okonyogi me roco boma me Jerucalem ma onongo dong odoko obwur ki me roco ot pa Lubanga wek obed kabedo me woro Jehovah i lobo Icrael odoco.—Ic. 51:11; Jek. 8:3.

4. Lok pa lanebi ma nonge i Icaya cura 65 tye ka cobbe nining i karewa-ni?

⁴ Cobbe me aryo pa lok pa lanebi Icaya ocakke i mwaka 1919, i kare ma kigonyo lutic pa Jehovah ki i opii pa Babilon Madit. I nge meno, paradic me cwiny ocako nya i wi lobo ducu. Lutit kwena me Ker-ri ma komgi mit gucako kacokke mapol dok gunyako kit pa Lukricitayo. Co ki mon ma yam gubedo jo mager ki lutim tarwang ‘guruko kit pa dano manyen ma giketo i cal pa Lubanga.’ (Ep. 4:24) Ngene kene ni, pol pa mot ma Icaya otito pire bicobbe ma kome i lobo manyen. Ento kadiwa i kare-ni watye ka nongo mot mapol pi bedo i paradic me cwiny. Kong dong wanenu mot magi ki pingo omyero pe waa woko ki i paradic me cwiny.

KIT MA JO MA GIKWO I PARADIC ME CWINY GIWINYO KWEDE

5. Kit ma kitito kwede i Icaya 65:​13, mot ango ma watye ka nongo mitte i paradic me cwiny?

⁵ Komwa yot dok wayeng matek. Lok pa lanebi Icaya nyuto apokapoka madit ma tye i kin kwo pa jo ma gitye i paradic me cwiny ki jo ma gitye woko. (Kwan Icaya 65:13.) Jehovah yabo cinge dok weko luticce giyeng matek i yo me cwiny. Watye ki cwiny mere maleng, Lokke Baibul, kacel ki cam me cwiny muromo ma watwero ‘camo, mato, ki dong bedo ki yomcwiny.’ (Por ki Niyabo 22:17.) Ento kwo tye matek adada pi jo ma pe gitye i paradic me cwiny. Gin ‘kec nekogi, orwo pii nekogi, dok lewic makogi.’ Mitigi me cwiny pe kitye ka cobone.—Amoc 8:11.

6. Buk pa Joel 2:​21-24 loko nining i kom mot mogo ma Jehovah miniwa, dok gitwero konyowa nining?

⁶ I lok pa lanebi Joel, en otiyo ki jami mogo ma pigi tego i kwo calo kal, kongo vino, ki moo jeituni me nyuto ni Jehovah miyo ki jone jami ducu ma mitte wek niyegi obed tek, kadi wa cam me cwiny. (Joel 2:​21-24) En timo meno kun tiyo ki Baibul kacel ki bukkewa ma jenge i Baibul, kabedowa me Intanet, cokkewa, gure me adwol, ki gure madito. Watwero camo cam me cwiny magi nino ducu, dok macalo adwogine, wabedo ma komwa yot dok ma wayeng.

7. Gin ango ma weko wabedo ki “yomcwiny”? (Icaya 65:14)

⁷ Cwinywa yom. Jo pa Lubanga giwero ki “yomcwiny” pien gitye ki pwoc madit bot Jehovah. (Kwan Icaya 65:14.) Lok ada ma jingo niyewa, cikke pa Lubanga ma nonge i Baibul, kacel ki genwa ma jenge i kom ginkok pa Kricito giweko wabedo ki “yomcwiny.” Boko lok i kom jami magi kacel ki omegiwa ki lumegiwa weko wabedo ki yomcwiny me ada!—Jab. 34:8; 133:​1-3.

8. Jami aryo mene ma pigi tek ma nen ka maleng i kin jo ma gitye i paradic me cwiny?

⁸ Mar kacel ki ribbe ma tye i kin jo pa Jehovah nen ka maleng i kin jo ma gitye i paradic me cwiny. (Kol. 3:14) Man konyowa me goyo i wiwa kit ma kwo bibedo kwede i lobo manyen, ka ma lutic pa Jehovah gibibedo ki mar kacel ki note matek ma loyo ma watye kwede i kare-ni. Laminwa mo otito gin ma en oneno i kin jo pa Jehovah i kare ma orwatte kwedgi pi tyen mukwongo: “Onongo pe angeyo kit me bedo ki yomcwiny, kadi wa i pacona. Tyen mukwongo ma aneno dano gitye ka nyuto mar me ada bot luwotgi obedo i kare ma arwatte ki Lucaden pa Jehovah.” Ngat mo keken ma mito bedo ki yomcwiny me ada myero obed i paradicwa me cwiny. Kadi bed jo me lobo-ni gitye ki tam marac i kom lutic pa Jehovah, wan watye ki nying maber ki Jehovah kacel ki jo ducu ma giwore.—Ic. 65:15.

9. Cikke ango ma wanongo i Icaya 65:​16, 17 madok i kom jami ma keliwa arem ki can malit i kare-ni?

⁹ Watye agonya dok wiwa opye mot. Icaya 65:14 waco ni jo ma pe giye donyo i paradicwa me cwiny ‘gikok, dok bene gidange matek ki koko.’ Ento jami ducu ma kelo arem ki can malit bot jo pa Lubanga i kare-ni kono? I agikkine, ‘wiwa dong biwil woko i kom can ma yam waneno con, can meno dong birwenyo woko ki i wiwa.’ (Kwan Icaya 65:​16, 17.) Jehovah bijwayo pekkiwa ducu, dok ka kare woto ki kato, pe dong wabipo i kom kit ma pekkiwa ounowa kwede.

10. Pingo iwinyo ni obedo mot madit me ribbe kacel ki omegiwa ki lumegiwa i kacokke? (Nen bene cal.)

¹⁰ Kadiwa i kare-ni, wabedo ma wiwa opye mot ka watye i cokkewa, ka ma watwero bedo agonya dok wiwa wil woko i kom pekki ma keliwa par i lobo-ni. Wakonyo bene utmegiwa me bedo ma wigi opye mot ka watute me nyuto mar, yomcwiny, kuc, kica ki mwolo ma gitye i kin nyig ma nyak pi cwiny maleng pa Lubanga. (Gal. 5:​22, 23) Pud dong watye ki pwoc madit ya me bedo i dul pa Jehovah! Jo ma gimedde ki bedo i paradic me cwiny gibineno cobbe pa cikke pa Lubanga me kelo “polo manyen ki lobo manyen.”

11. Ma lubbe ki Icaya 65:​18, 19, bedo i paradic me cwiny ma Jehovah oyubo-ni myero ogudwa nining?

¹¹ Watye ki pwoc madit. I nge meno, Icaya omedde ki tito pingo omyero ‘cwinywa obed yom kun wabedo ki yomcwiny nakanaka’ i paradicwa me cwiny. Jehovah aye oyubo paradic man. (Kwan Icaya 65:​18, 19.) Dong pe tye me ur ni en tye ka tic kwedwa me konyo dano wek gua woko ki i dul mapatpat me lobo man, ma pe pwonyogi lok ada i kom Lubanga, ki me konyogi me donyo i paradicwa mamwonya me cwiny! Watye ki yomcwiny madwong adada pien watye i ada, dok meno tugo cwinywa me tito kwena man bot jo mukene.—Jer. 31:12.

12. Cikke ma gitito pigi i Icaya 65:​20-24 weko iwinyo nining, dok pingo?

¹² Watye bene ki pwoc madit pi gen ma watye kwede ma bino pi wat maber ma tye i kinwa ki Jehovah. Tam kong i kom jami ducu ma wabineno dok wabitimo i lobo manyen! Baibul ocikke ni: “Latin mo ma ginywalo ma ri pi kare manoknok keken bene pe bibedo tye iye, kadi ladit mo muti ma pe bicobo karene.” Wan ‘wabigero odi ci wabibedo i igi, wabipuro poto olokwa, ci wabicamo nyige bene.’ Dok ‘pe wabiyelle ki tic nono’ pien nongo ‘Jehovah dong otyeko miyowa mot.’ En ocikke me miniwa kwo ma tye ki tyen lok, gwok muromo, ki kuc. “Ma peya [jone] gulwongo lwongo,” en nongo ngeyo gin ma ngat acel acel mito, dok ‘bimiyo gin makwo ducu giyeng.’—Ic. 65:​20-24; Jab. 145:16.

13. Icaya 65:25 oloko nining i kom alokaloka ma dano gitimo i kwogi ka gucako tic pi Jehovah?

¹³ Watye ki kuc. Ki kony pa cwiny maleng pa Lubanga, jo ma yam gero dong odoko gikomgi woko gutimo alokaloka madongo i kwogi. (Kwan Icaya 65:25.) Gutute matek me weko kitgi maraco macon woko. (Rom. 12:2; Ep. 4:​22-24) Ngene kene ni, jo pa Lubanga pud gitye ki roc, pi meno, pud wabimedde ki timo bal. Kadi bed kit meno, Jehovah oribo “dano ducu” oweko gitye ki mar kacel ki kuc ma pe kitwero balone. (Tito 2:11) Man obedo tango ma Lubanga won twer ducu keken aye twero timone!

14. I yo ma nining ma lok ma nonge i Icaya 65:25 ocobbe kwede i kom omego mo acel?

¹⁴ Tika dano gitwero loko kitgi? Nen kong labol man. Awobi mo ma onongo dong obedo i buc tyen mapol i kare ma mwakane romo 20 onongo maro tim tarwang ki gero adada. Onongo kitweye i buc pi kwo mutoka, turo odi pa dano, ki bal mukene madongo. En onongo obedo ngat latunge ki remo ma timo bal i cawa mo keken. I kare ma owinyo lok ada ma i Baibul dok ocako wire i cokke pa Lucaden pa Jehovah, en oye ki cwinye ducu ni enongo tyen lok me kwo—ma en aye me woro Jehovah i paradic me cwiny. I nge nongo batija, en obedo ka tam i kom kit ma Icaya 65:25 ocobbe kwede i kome. En olokke ki i bedo dano mager calo orudi, ci odoko dano mamwol ma maro kuc calo romo.

15. Pingo wamito lwongo jo mukene me bino ka ribbe kwedwa i paradicwa me cwiny, dok watwero timo meno nining?

¹⁵ Icaya 65:13 cakke ki lok man: “Rwot Lubanga owaco ni.” Tyeng 25 gik ki lok man, ni “man Rwot [Jehovah] ma owaco.” Cikkene kare ducu cobbe kakare. (Ic. 55:​10, 11) Paradicwa me cwiny dong tye i kare-ni. Jehovah oribo utmege ma i wi lobo ducu wek gubed jo me ode. Kit macalo watye i kin jo me ode, watye ki kuc madwong kit ma twere kwede i kare-ni, dok wanongo gwok muromo i lobo man marac-ci. (Jab. 72:7) Pi tyen lok magi, wamito ni wakony jo mapol kit ma watwero, me bino ka ribbe kwedwa i paradicwa me cwiny. Watwero timo man ka waketo tamwa i tic me loko dano wek gudok lulub kor Kricito.—Mat. 28:​19, 20.

KIT ME KONYO JO MUKENE WEK GUBED KI MITI ME DONYO I PARADIC ME CWINY

16. Gin ango ma twero weko dano bedo ki miti me donyo i paradic me cwiny?

¹⁶ Wan ducu ki acel acel watwero timo gin mo wek paradic me cwiny onen mamwonya bot jo mukene. Me timo man, omyero walub lanen pa Jehovah. En pe diyo dano tek tek me bino i dulle. Me ka meno, en ‘peyo’ dano motmot kelogi bote. (Jon 6:44; Jer. 31:3) Jo ma cwinygi atir ma gipwonyo lok i kom mar pa Jehovah kacel ki kite mukene-ni gicako bedo ki miti me nyikke cok ki Jehovah. I yo ma nining ma kitwa kacel ki jami mabeco ma watimo twero weko dano gibedo ki miti me donyo i paradic me cwiny?

17. I yo ma nining ma watwero ywayo kwede jo mukene i paradic me cwiny?

¹⁷ Yo acel ma watwero ywayo kwede jo mukene me bino i paradic me cwiny aye ki tero omegiwa ki lumegiwa i yo me mar kacel ki kica. Ka jo manyen gubino i cokkewa, wamito ni guwiny kit ma jo ma pe guye guwinyo kwede i kare ma gubino i cokke pa Lukricitayo i boma me Korint macon. Jo magi gutito ni: “Adada, Lubanga gire tye i kinwu.” (1 Kor. 14:​24, 25; Jek. 8:23) Pi meno, myero wamedde ki lubo tira ma waco ni: “Wubed ki kuc i kinwu kekenwu.”—1 Tec. 5:13.

18. Gin ango ma twero ywayo dano kelogi i dulwa?

¹⁸ Omyero kare ducu watute me neno omegiwa ki lumegiwa kit ma Jehovah nenogi kwede. Watimo meno ki keto cwinywa i kom kitgi mabeco ento pe i kom gorogi, pien goro magi cokcok-ki birwenyo woko. Watwero cobo niang manok mo keken i yo me mar ka kare ducu wabedo ‘jo ma lukica ki cwiny maber kun dano acel acel timo ber bot lawote dok watimo kica i kinwa kekenwa.’ (Ep. 4:32) Ka watimo meno, ci jo ma gimito ni kitergi kit meno, gibibedo ki miti me donyo i paradic me cwiny.b

MEDDE KI BEDO I PARADIC ME CWINY

19. (a) Kit ma kinyuto kwede i bok ma wiye tye ni “Gua Woko ka Dok Gudwogo Cen,” gin ango ma jo mogo guwaco i nge dwogo cen i paradic me cwiny? (b) Gin ango ma omyero wamok tamwa me timone? (Nen bene cal.)

¹⁹ Pud dong watye ki pwoc madit ya pi paradicwa me cwiny! Tye mamwonya, dok opong ki luwor Jehovah mapol i kare-ni makato kare mo keken. Dong walego ni wamedde ki bedo ki pwoc pi paradic man ma Jehovah oyubo piwa-ni. Ngat mo keken ma mito nongo yweyo, bedo ma oyeng, ma wiye opye mot dok ki gwok muromo myero obin i paradic me cwiny dok pe oa woko ki iye! Ento omyero wagwokke adada pien Catan tye ka timo jami ducu ma en twero me bitowa wek waa woko ki iye. (1 Pet. 5:8; Yabo 12:9) Omyero pe waye bwolane. Dong omyero watiyu matek me gwoko deyo ki lengo kacel ki kuc ma i paradicwa me cwiny.