“Wamedde Anyim ki Pwony pa Jo Muteggi”

1. Gin ango ma Jehovah mito ki botwa?

LACO ki dakone gibedo ki yomcwiny madit adada ka gunywalo latin ma kome yot. Ento kadi bed gimaro latingi meno matek, pe gimito ni ogak lakere matwal. Ki lok ada, gibedo ki par madit ka latingi pe odongo. I yo acel-lu, kadi bed cwiny Jehovah bedo yom ka wacako pwonyo lok i kome, ento En pe mito ni wagik kenyo. (1 Kor. 3:1) Me ka meno, en mito ni wadok Lukricitayo “muteggi.”—1 Kor. 14:20.

2. Gin ango ma wabinyamo i pwony man?

² Tyen lokke ngo me doko Lakricitayo muteggi? Ngo ma omyero watim wek wadok Lukricitayo muteggi? I yo ma nining ma camo cam matego me cwiny konyowa me dongo watwa ki Jehovah? Dok pingo myero wagwokke ki bedo ki gen mukato kare woko i komwa kekenwa? I pwony man, wabinongo lagam pi lapeny magi.

TYEN LOKKE NGO ME DOKO LAKRICITAYO MUTEGGI?

3. Tyen lokke ngo me doko Lakricitayo muteggi?

³ I Baibul, nyig lok me leb Grik ma kigonyo ni “muteggi” kitwero bene gonyo ni “labongo roc” dok “bute mo murem pe.”a (1 Kor. 2:6) Dong kit macalo latin medde ki dongo nio wang ma odoko dano madit nyo muteggi, omyero wamedde ki dongo watwa ki Jehovah. I yo ma kit meno wadoko Lukricitayo muteggi. Ngene kene ni, kadi bed dong wadoko Lukricitayo muteggi, pud omyero wamedde ki dongo. (1 Tem. 4:15) Wan ducu, kadi wa jo matino, watwero doko Lukricitayo muteggi. Ento ngo ma nyuto ni Lakricitayo moni dong oteggi i yo me cwiny?

4. Ngo ma nyuto ni Lakricitayo moni oteggi?

⁴ Lakricitayo muteggi obedo ngat ma timo jami ducu ma Jehovah mito ento pe yero gin ma en mito timo ayera. Ngene kene ni, kit macalo en tye ki roc, wang ma otimo bal. Kadi bed kit meno, en tute nino ducu me tam ki timo jami i yo pa Jehovah. En nongo dong oruko kit pa dano manyen dok bedo ka tute me tam calo Jehovah. (Ep. 4:​22-24) En nongo opwonnye me moko tam mabeco ma lubbe ki cik kacel ki cik ma igi lac pa Jehovah. Dong pe mitte ni kiryene cik mapol me aluba. Ka en omoko tam mo, en tiyo matek me cobo tam meno.—1 Kor. 9:​26, 27.

5. Ngo ma twero timme i kom Lakricitayo ma pe oteggi? (Jo Epeco 4:​14, 15)

⁵ Ki tungcel, Lakricitayo ma medde ki bedo latin kitwero bwole ki “ryeko pa dano, [kacel] ki lok ma giporo me goba.” En twero ye lok angeya ma pe tye kakare kacel ki anii ma katti ki i odi me poko lok angeya. Nyo twero ye bwola pa jo mungak.b (Kwan Jo Epeco 4:​14, 15.) Twero bedo yot bote me doko lanyeko, rubo kin dano ki mako lok i cwinye. Dok pe bedo ki kero me cung matek i kom abita.—1 Kor. 3:3.

6. Pingo watwero poro dongowa i yo me cwiny ki kit ma latin dongo kwede? (Nen bene cal.)

⁶ Kit ma kitito kwede con, Ginacoya poro dongo i yo me cwiny ki kit ma latin dongo kwede me doko dano madit. Tye jami mapol ma latin pe ngeyo, pi meno, en mito gwok kacel ki tira pa ladit. Me labolle, min latin twero mako cing nyare matidi ka gitye ka ngolo gudi. Ka latin anyaka-ni woto ki dongo, minne twero ye ni ongol gudi pire kene, ento pud bipoyo wiye ni onen tungi ki tungi ma peya ongolo gudi. Ka anyaka-ni odoko dit, nongo en dong ngeyo kit me gwokke ka tye ka ngolo gudi. Kit macalo lutino gimito kony ki bot ludito me gwokke ki i peko, Lukricitayo ma pe guteggi pol kare gimito kony ki bot Lukricitayo ma guteggi me gwokke ki i gin ma twero balo watgi ki Jehovah nyo me moko tam me ryeko. Ki tungcel, ka Lukricitayo ma guteggi gitye ki tam me amoka, gitamo matut i kom cik ma igi lac me Baibul me niang tam pa Jehovah. I nge meno giketo i tic gin ma gupwonyo.

7. Tika Lukricitayo muteggi bene gimito kony ki bot jo mukene?

⁷ Tika meno tyen lokke ni Lakricitayo muteggi dong pe mito kony ki bot ngat mo keken? Pe kumeno. Lakricitayo muteggi bene myero openy pi kony i kare mukene. Ento ngat ma pe oteggi i yo me cwiny mito ni jo mukene guwacce gin me atima nyo gumok tam pire. Ki tungcel, ka Lakricitayo muteggi openyo pi kony ki bot jo ma gitye ki ngec, nongo en pud ngeyo ni Jehovah mito ni ‘eting yecce.’—Gal. 6:5.

8. I yo ma nining ma Lukricitayo ma guteggi pe girom aroma?

⁸ Kit macalo jo madongo ducu pe gical acala-ni, Lukricitayo muteggi ducu kitgi pe rom. Me labolle mogo giryek adada, mukene cwinygi tek, mogo cinggi yot, kun mukene gubedo lukica. Medo i kom meno, ka Lukricitayo aryo ma guteggi gukemme ki tam marom me amoka, giromo moko tam mapatpat, ento nongo tamgi ducu rwatte ki cik ma igi lac me Baibul. Man pol kare timme ka gitye ka moko tam ma lubbe ki cwiny ma ngoligi kop. Pi meno, pe gingolo kop i kom luwotgi ka tamgi opokke woko. Me ka meno, gimedde ki bedo ma gunotte.—Rom. 14:10; 1 Kor. 1:10.

GIN ANGO MA MYERO WATIM WEK WADOK LUKRICITAYO MUTEGGI?

9. Tika dongowa i yo me cwiny timme pire kene? Tit kong.

⁹ Dongo pa latin me doko dano madit timme pire kene, ento ngat moni pe twero doko Lakricitayo muteggi labongo tute. Me labolle, omege ki lumege ma i Korint gujolo kwena maber, gunongo batija, gunongo cwiny maleng dok gupwonyo jami mapol ki bot lakwena Paulo. (Tic 18:​8-11) Kadi bed kit meno, mwaki mapol i nge batijagi, jo mapol i kingi onongo pud pe guteggi. (1 Kor. 3:2) Gin ango ma myero watim wek gin ma kit meno pe otimme i komwa?

10. Gin ango ma myero watim me doko jo muteggi? (Juda 20)

¹⁰ Me doko jo muteggi, myero kong wadong mitiwa me bedo jo muteggi. Jo ma ‘ngecgi nok,’ dok gimito bedo kit meno, pe gibiteggi i yo me cwiny. (Car. 1:​22, NWT) Pe wamito bedo calo ngat ma dong dit ento pe mito kemme ki ticce dok jenge i kom lunyodone me moko tam pire. Me ka meno, wamito ni wamok tamwa piwa kenwa ka wawoto ki dongo i yo me cwiny. (Kwan Juda 20.) Ka pud itye ka tute me doko ngat muteggi, leg bot Jehovah wek omini “miti ki teko me tic.”—Pil. 2:13.

11. Gin ango ma Jehovah ominiwa me konyowa doko Lukricitayo muteggi? (Jo Epeco 4:​11-13)

¹¹ Jehovah ngeyo ni pe watwero doko jo muteggi labongo kony pa jo mukene. En ominiwa lukwat ki lupwonye i kacokke ma gikonyowa me doko jo “muteggi” i yo me cwiny nio wang ma wadoko “dano mucwiny, ma wadongo warom ki Kricito.” (Kwan Jo Epeco 4:​11-13.) Jehovah bene miniwa cwiny mere maleng me konyowa wek wabed ki “tam pa Kricito.” (1 Kor. 2:​14-16) Medo i kom meno, Lubanga ominiwa Jiri angwen-ni me nyutiwa kit ma Yecu onongo tamo kwede, loko kwede dok timo kwede ki jami i kare ma tye i lobo. Ka walubo kit ma Yecu onongo tamo dok timo kwede ki jami, ci wabidoko Lukricitayo muteggi.

I YO MA NINING MA CAMO CAM MATEK KONYOWA ME DONGO WATWA KI JEHOVAH?

12. “Lok mukwongo i kom Kricito” obedo gin ango?

¹² Me doko jo muteggi, myero pe wayeng mere ki “lok mukwongo i kom Kricito” keken, ma meno aye jami ma wakwongo pwonyogi. Labol me pwony magi tye iye ngut i kom bal, niye, batija ki dong cer pa jo muto. (Ibru 6:​1, 2) Magi tye i kin pwony ma Lucaden pa Jehovah ducu giye iye. Pi meno, i kare ma lakwena Petero obedo ka tito kwena bot lwak ma gugure i nino me Pentekote, en oloko i kom jami magi. (Tic 2:​32-35, 38) Omyero waye pwony mukwongo magi ka wamito doko lulub kor Kricito. Me labolle, Paulo onyuto ni ka pe waye i kom nicer ci pe watwero waco ni wabedo Lukricitayo me ada. (1 Kor. 15:​12-14) Kadi bed kit meno, omyero wabed ki miti me pwonyo jami makato magi ka wamito doko Lukricitayo muteggi.

13. Omyero watim gin ango ka wamito nongo adwogi maber ki i cam matek ma kiloko pire i Jo Ibru 5:14? (Nen bene cal.)

¹³ Ka iporo ki pwony mukwongo, cam matek pe kwako cik keken ento kadiwa cik ma igi lac, ma gikonyowa me niang tam pa Jehovah. Me nongo adwogi maber ki i cam magi, omyero wakwan Baibul, walwod gin ma wakwano, dok watute matek me keto i tic gin ma wapwonyo. Ka watimo meno, wabipwonnye me moko tam ma yomo cwiny Jehovah.c—Kwan Jo Ibru 5:14.

14. Paulo okonyo Lukricitayo me Korint nining me doko jo muteggi?

¹⁴ Lukricitayo ma pe guteggi i yo me cwiny ginongo ni tek me moko tam ka pe tye cik mo me Baibul ma loko i kom gin moni atir atir. Ka pe tye cik mo me Baibul, jo mogo gitamo ni gitwero timo gin mo keken ma igi mito. Jo mukene gitwero penyo pi cik ka ma cik pe mitte iye. Me labolle, Lukricitayo ma i Korint nen calo gupenyo Paulo ka ce myero gicam ringo ma kityero bot jok. Me ka tittigi gin me atima, Paulo onyuto ni ngat acel acel tye ki “twero” me yero gin ma iye mito ma lubbe ki kit ma cwinye ngole kwede kop. En oloko i kom cik ma igi lac mogo me Baibul ma twero konyogi me moko tam ma pe weko cwinygi bedo ka pidogi nyo ma pe twero doko ariya bot jo mukene. (1 Kor. 8:​4, 7-9) Paulo onongo tye ka pwonyo Lukricitayo me Korint me tic ki Ginacoya me moko tam pigi kengi me ka jenge i kom jo mukene nyo yenyo cik. I yo meno, en otemo konyogi me doko jo muteggi.

15. Paulo okonyo Lukricitayo ma Luibru nining wek gudong i yo me cwiny?

¹⁵ Watwero nongo pwony mukene ma pire tek ki i waraga ma Paulo ocoyo bot Lukricitayo ma Luibru. Jo mogo i kingi pe gumedde ki dongo watgi ki Jehovah; onongo gudok cen ma ‘mitte ni kipitgi kong ki cak, ento pe cam matek.’ (Ibru 5:12) Pe gupwonyo nyo guye jami manyen ma Jehovah onongo tye ka pwonyogi kwede kun wok ki i kacokke. (Car. 4:18) Me labolle, Lujudaya mapol ma gudoko Lukricitayo onongo pud gitye ka lubo Cik pa Moses, kadi bed mwaki 30 angec onongo dong ginkok pa Yecu ogiko Cik meno woko. (Rom. 10:4; Tito 1:10) Mwaki 30 magi onongo omiyo ki Lujudaya kare muromo me niang ni pe dong mitte ni gulub Cik pa Moses! Ngat mo keken ma okwano waraga pa Paulo bot Luibru biye ni buk man tye ki cam me cwiny matek. Meno aye gin ma onongo Lukricitayo magi gimito kikome me jingo niyegi ni yo manyen me woro ma Jehovah oketo kun tiyo ki Yecu aye ber loyo. Waraga man bene ominigi tekcwiny me medde ki tito kwena kadi bed Lujudaya luwotgi onongo gitye ka keto aunauna i komgi.—Ibru 10:​19-23.

GWOKKE KI BEDO KI GEN MUKATO KARE WOKO I KOMI KEKENI

16. Medo i kom doko jo muteggi, gin ango mukene ma myero watim?

¹⁶ Omyero pe watute me doko jo muteggi keken ento bene wamedde ki bedo kit meno. Dong omyero wagwokke adada pe me bedo ki gen mukato kare woko i komwa kekenwa. (1 Kor. 10:12) Omyero ‘kong wangine kekenwa’ me neno ni watye ka medde ki dongo i yo me cwiny.—2 Kor. 13:5.

17. I yo ma nining ma waraga pa Paulo bot jo Kolocai nyuto ni omyero wamedde ki bedo jo muteggi?

¹⁷ I waragane bot jo Kolocai, Paulo dok onwoyo ni omyero wamedde ki bedo jo muteggi. Kadi bed onongo dong gubedo Lukricitayo ma guteggi, Paulo ocikogi ni gugwokke wek tam pa jo me lobo-ni pe obwolgi. (Kol. 2:​6-10) Dok Epapira, ma onongo ngeyo jo me kacokke meno maber, obedo ka lega pigi wek ‘gubed jo muteggi.’ (Kol. 4:12) Pwony ango ma wanongo? Paulo kacel ki Epapira guniang ni ka wamito medde ki bedo jo muteggi, omyero watute matek dok wanong kony pa Lubanga. Onongo gimito ni Lukricitayo me Kolocai gumedde ki bedo jo muteggi, kadi bed gitye ka kato ki i ariya.

18. Gin ango ma twero timme i kom Lakricitayo muteggi? (Nen bene cal.)

¹⁸ Paulo ociko Luibru ni Lakricitayo muteggi ka pe ogwokke twero rwenyo cwak pa Lubanga matwal. Cwiny Lakricitayo twero doko nwang ma weko en nongo dong pe ngut i kom balle wek onong kica pa Lubanga. Ki pwoc madit, Luibru onongo pe gitye kit meno. (Ibru 6:​4-9) Jo ma i kare-ni ma ticgi okwe woko nyo ma kiryemogi ki i kacokke ento lacen gungut kono? Ka gungut, ginyuto ni gipat ki jo ma lakwena Paulo ocoyo lok i komgi-ni. Ngene kene ni, ka gudwogo cen bot Jehovah, myero gunong kony ma en miyo. (Ejek. 34:​15, 16) Luelda giromo keto yub pi Lacaden mo ma oteggi i yo me cwiny me konyo ngat meno wek odong watte ki Jehovah odoco.

19. Yub ango ma myero wabed kwede?

¹⁹ Ka itye ka tute me dongo i yo me cwiny, itwero cobo yubbi! Medde ki camo cam matego me cwiny kun iwoto ki loko tammi wek obed ma rwatte ki pa Jehovah. Ka dong idoko Lakricitayo muteggi, tim jami ducu ma itwero me medde ki bedo kit meno i kare-ni ki pi naka.