Lapeny pa Lukwan Bukkewa
Omyero waniang lok ma tye i Jabuli 12:7 nining?
Wang ginacoya ma guromo tyeng me 7 ginyuto ni tyeng man tye ka lok i kom dano.
I Jabuli 12:1-4, wakwano ni “jo ma lugen dong guto gurwenyo woko ki i kin dano.” Dok i Jabuli 12:5-7, en owaco ni:
“‘Ento kombeddi abibino,’ Rwot ma owaco,
‘pien dong giyako jami pa lucan woko,
dok jo ma piny obwoyogi gitye ka cur acura ki arem.
Abigwokogi kit ma gimito-ni.’
Lok pa Rwot ma en ociko ber, gitwero genone,
obedo calo ryal ma giliyo maber ki mac piny i ngom, ma giliyo tyen abiro kulu.
Gwoka maber kare ducu, ai Rwot,
gwokwa ki i kom yalwak me kare man.”
Tyeng me 5 tito gin ma Lubanga bitimo pi jo ma piny obwoyogi. En bigwokogi.
Tyeng me 6 waco ni “Lok pa Rwot [Jehovah] ma en ociko ber, gitwero genone,” ‘calo ryal ma giliyo maber.’ Lok man nyuto kit ma Lukricitayo me ada giwinyo kwede ka odok i kom Baibul.—Jab. 18:30; 119:140.
I Baibul mogo kigonyo lok ma nonge i Jabuli 12:7 ni: ‘Ibigwokgi maber kare ducu.’
Dok pien i tyeng me 6 onongo kiloko i kom “lok pa Rwot,” jo mogo giwaco ni tyeng me 7 tye ka lok i kom ‘gwoko’ Baibul ento pe gwoko dano. Dok wangeyo ni Lubanga kare ducu ogwoko Baibul kadi bed jo mapol gutute matek me rwenyone woko.—Ic. 40:8; 1 Pet. 1:25.
Kadi bed kit meno, Jehovah bene gwoko jo ma piny obwoyogi ma kiloko iye i tyeng me 5, dok En bimedde ki konyo jo ma ‘kiunogi’ kacel ki jo ma ‘can opoto i komgi.’—Yubu 36:15; Jab. 6:4; 31:1, 2; 54:7; 145:20.
Dong, gin ango ma Jehovah gwoko, kit ma kitito i tyeng me 7, dano nyo Lokke?
Ka wangiyo lok ma i jabuli man maber, ci nen ka maleng ni tye ka lok i kom dano.
I acakki me Jabuli 12, Daudi oloko i kom lutic pa Jehovah ma lugen ma jo maraco obwologi. Dok i tyeng me 3, wanongo lok man ni Jehovah bijuko nyo jwero jo ma tiyo ki lebgi i yo marac. Jabuli man cuko cwinywa ni watwero geno Lubanga ni en bigwoko jone pien lokke ducu genne.
Pi meno, jo ma Jehovah bigwokogi kit ma kitito kwede i tyeng me 7, gubedo luticce ma jo maraco unogi.
Dong, pingo lugony Baibul mogo gugonyo tyeng me 7 ni: “Ibigwokgi maber kare ducu”? Kit ma kigonyo kwede tyeng man rwatte ki kopi mapatpat me Ginacoya me leb Ibru. Ento Baibul ma kilwongo ni Septuagint ma tye i leb Grik, kigonyo kit man: “En bicung piwa” ki “En bigwokowa.” Kit ma kigonyo kwede tyeng man nyuto ni kitye ka lok i kom lutic pa Jehovah ma kiunogi. Kibigwokogi “ki i kom yalwak me kare man,” ma gin aye jo maraco ma gicwako tim bwami. (Jab. 12:7, 8) I Baibul mo acel ma kigonyo i leb Aram, tyeng me 7 kwanne ni: “Ai RWOT, in ibigwoko jo ma kitgi atir, ibigwokogi ki i cing yalwak me kare man marac-ci pi naka.” Kit ma kigonyo kwede tyeng man, moko ni Jabuli 12:7 pe tye ka lok i kom gwoko Lok pa Lubanga.
Pi tyen lok meno, tyeng man miyo gen bot “jo ma lugen” ni, Lubanga bigwokogi.