Kit ma Luelda Ginyuto Kwede Mar ki Kica bot Lubalo

1. Gin ango ma twero timme ka ngat moni otimo bal madit?

I PWONY mukato-ni, wanyamo gin ma Paulo owaco ki kacokke me Korint ni gutim i kare ma omego mo otimo bal madit. Labalo-ni onongo pe ongut i kom balle dok onongo mitte ni kikwanye woko ki i kacokke. Ento, kit ma ginacoya ma pwony man jenge iye nyuto kwede, Lubanga twero konyo jo ma gutimo bal madongo me ngut i kom balgi. (Rom. 2:4) Lubanga twero tic ki luelda nining me konyo labalo me ngut i kom balle?

2-3. Gin ango ma omyero watim ka waniang ni laye lawotwa mo otimo bal madit, dok pingo?

² Ka luelda pe gingeyo ni ngat moni otimo bal madit, ci nongo pe gitwero konye. Dong, gin ango ma omyero watim ka waniang ni laye lawotwa mo otimo bal madit, ma twero weko kikwanye woko ki i kacokke? Mukwongo, omyero wacuk cwiny omego nyo lamego-ni me lok ki luelda wek onong kony.—Ic. 1:18; Tic 20:28; 1 Pet. 5:2.

³ Ento, ket kong ni labalo-ni okwero lok ki luelda woko. Ka tye kit meno, ci wan aye omyero walok ki luelda wek ngat meno onong kony ma mitte. Ka watimo meno, wanyuto ni wamaro ominwa nyo laminwa-ni pien wangeyo ni luelda gitwero konye. Ka ngat meno omedde ki timo bal, ci en bimedde ki balo watte ki Jehovah. En bene twero balo nying maber ma kacokke tye kwede. Dong kadi bed timo man pe yot, pud wabicito bot luelda pien wamaro Jehovah kacel ki omego nyo lamego meno.—Jab. 27:14.

KIT MA LUELDA KONYO KWEDE JO MA GUTIMO BAL MADONGO

4. Miti pa luelda tye nining ka gitye ka rwatte ki ngat ma otimo bal madit?

⁴ Ka ngat mo me kacokke otimo bal madit, luelda giyero omege adek ki i kingi ma gibibedo i komittia ma birwatte ki ngat meno. Mitte ni co magi gubed jo mamwol. Giniang ni, kadi bed gitye ka tute me konyo labalo moni, ento pe gitwero diyo ngat mo me lokke. (Nwo. 30:19) Luelda bene giniang ni pe lubalo ducu gibingut i kom balgi, kit ma Kabaka Daudi otimo kwede. (2 Cam. 12:13) Lubalo mukene gitwero moko tamgi me kwero tira mua ki bot Jehovah. (Acak. 4:​6-8) Kadi bed kit meno, miti pa luelda tye me konyo labalo-ni me ngut i kom balle, ka twerre. Gin ango ma wi luelda myero opo iye ka gitye ka rwatte ki labalo?

5. Cwiny ango ma luelda myero gubed kwede ka gitye ka rwatte ki labalo? (2 Temceo 2:​24-26) (Nen bene cal.)

⁵ Luelda gineno labalo-ni calo romo murwenyo, ma pire pud tek bot Jehovah. (Luka 15:​4, 6) Pi meno, ka luelda gurwatte ki labalo-ni, pe giloko kwede ki gero nyo gitere marac. Luelda pe gitamo ni gin ma mitte keken aye me penyo lapeny ki niang gin mutimme. Me ka meno, gibitute me nyuto kit mapatpat ma kiryeyogi i 2 Temceo 2:​24-26. (Kwan.) Luelda gitute me nyuto mwolo ki kica, pien gimito konyo labalo-ni me loko tamme.

6. Luelda gitwero yubo cwinygi nining ma peya gurwatte ki labalo? (Jo Roma 2:4)

⁶ Luelda giyubo cwinygi. Gitute me lubo lanen pa Jehovah i kit ma gitero kwede labalo, kun wigi po i kom lok pa lakwena Paulo, ni: ‘Lubanga lakica, pien teli wek ingut i kom balli.’ (Kwan Jo Roma 2:4.) Luelda myero wigi opo ni ticgi ma pire tek loyo aye me bedo lukwat i te tela pa Kricito. (Ic. 11:​3, 4; Mat. 18:​18-20) Ma peya luelda gurwatte ki labalo-ni, kong gilego bot Jehovah wek gubed ki kare me konyo labalo-ni me ngut i kom balle. Gitimo kwed i Ginacoya kacel ki i bukkewa. Dok gilego bot Jehovah wek okonygi me niang maber lok i kom ngat meno kacel ki gin mutimme. Gitute me niang kit ma en odongo kwede nyo gin mutimme i kwone ma oweko en tamo nyo timo jami i yo meno.—Car. 20:5.

7-8. Luelda gitwero lubo lanen me diyo cwiny pa Jehovah nining ka gurwatte ki labalo?

⁷ Luelda gilubo lanen me diyo cwiny pa Jehovah. Wigi po i kom kit ma Jehovah otute kwede me konyo lubalo i kare mukato angec. Me labolle, Jehovah odiyo cwinye i kom Kain. En otite gin ma bitimme ka en pe oloko kite dok ni en binongo mot ka obedo lawiny. (Acak. 4:​6, 7) Jehovah ooro lanebi Natan me miyo tira ki Daudi. Natan otiyo ki lapor maber adada ma ogudo cwiny kabaka dok okonye me ngut i kom balle. (2 Cam. 12:​1-7) Dok Jehovah ‘obedo ka cwalo’ lunebine “teretere” bot rok me Icrael i kare ma gukwero bedo luwiny bote. (Jer. 7:​24, 25) En pe okuro ni kong jone gungut i kom balgi ka dong ecak konyogi. Me ka meno, kadi bed onongo pud gitye ka timo bal, en olegogi me ngut i kom balgi.

⁸ Luelda gilubo lanen pa Jehovah ka gitye ka konyo jo ma gutimo bal madongo. Kit ma 2 Temceo 4:2 otito kwede, ka luelda gitye ka tute me konyo labalo, ginyamo lok kwede ‘kun gidiyo cwinygi.’ Jami akwana madok i kom tyeng meno loko kit man i kom laelda ma tute me lubo lanen pa Jehovah: “En myero ojukke kene dok odi cwinye wek okony labalo-ni me bedo ki miti me timo gin ma atir. Ka laelda-ni okeco nyo kiniga omako, labalo-ni twero kwero winyo tira nyo ngut i kom balle.”

9-10. Luelda gitwero konyo labalo nining me niang i kom jami ma en obedo ka timo ma otere wa i timo bal madit?

⁹ Luelda gitute me niang gin ma labalo-ni obedo ka timo ma otere wa i timo bal madit. Gin ango ma oweko watte ki Jehovah odoko goro? Tika en ojuko kwan pire kene nyo cito i tic me pwony kare ki kare? Mono en ojuko lega bot Jehovah kare ki kare? Tika en oweko mitine maraco obedo ka doro kwone? Tika en tye ki lurem maraco nyo maro galowang macilo? Jami ma en oyero-ni mono ogudo tamme ki mitine nining? Tika en niang kit ma gin ma en otimo-ni gudo kwede Wonne, Jehovah?

¹⁰ Luelda gitwero penyo lapeny ma twero konyo labalo-ni me tam i kom jami ma oweko watte ki Jehovah odoko goro dok otere wa i timo bal madit. Gitimo man i yo me kica dok pe gipenyo lok me mung ma pe mitte ni luelda gunge. (Car. 20:5) Medo i kom meno, gitwero tic ki lapor mo ma konyo labalo-ni me niang ni gin ma etimo-ni rac, kit ma Natan otimo kwede me konyo Daudi. Gwok nyo i rwattegi mukwongo, cwinye twero cako cwer i kom balle. En bene twero ngut woko i kom balle.

11. Yecu otero lubalo nining?

¹¹ Luelda gitute me lubo lanen pa Yecu. Yecu okonyo Caulo me Taruco kun penye ki lapeny man ni: “Caulo, Caulo, iyela pingo?” I kare ma Yecu otiyo ki lapeny meno, en okonyo Caulo me niang ni gin ma en tye ka timo-ni rac. (Tic 9:​3-6) Dok ma lubbe ki “dako ca, Jejebel,” Yecu owaco ni: “Amiyo bote kare me ngut.”—Yabo 2:​20, 21.

12-13. I yo ma nining ma luelda gitwero miyo kwede kare bot labalo me ngut? (Nen bene cal.)

¹² Luelda gilubo lanen pa Yecu dok pe girune ka moko ni labalo moni pe bingut i kom balle. Jo mogo gitwero ngut woko tyen mukwongo ma luelda orwatte kwedgi. Ento jo mukene twero mitte ni kong kiminigi kare. Pi meno, luelda giketo yub me rwatte ki labalo-ni tyen mapol. Gwok nyo i nge rwattegi mukwongo, labalo meno twero cako tam matut i kom gin ma kinyamo kwede. En oromo nyuto mwolo ci penyo Jehovah ni otimme kica pi balle. (Jab. 32:5; 38:18) Pi meno, i rwattene me aryo ki luelda, labalo-ni twero nyuto cwiny mapat ki ma en onyuto i rwattegi mukwongo.

¹³ Me konyo labalo-ni wek ongut i kom balle, luelda ginyuto bote cwiny me kica. Gilego bot Jehovah wek ogo laane i kom tutegi dok gibedo ki gen ni labalo meno biloko tamme ci ngut i kom balle.—2 Tem. 2:​25, 26.

14. Anga kikome ma konyo labalo me ngut, dok pingo watwero waco kit meno?

¹⁴ Ka labalo-ni ongut, meno yomo cwinywa matek! (Luka 15:​7, 10) Kadi bed luelda gitute matek me tiro ngat moni, anga kikome ma konyo labalo me loko kite? Wi opo i kom gin ma lakwena Paulo ocoyo i kom lubalo, ni: ‘Gwok nyo Lubanga bimiyogi cwiny me ngut.’ (2 Tem. 2:25) Pi meno, Jehovah, ento pe dano mo keken, aye ma konyo Lakricitayo me loko tamme ki kite. Paulo otito jami mogo mabeco ma timme ka ngat moni ongut. Dano meno bibedo ki niango matut i kom lok me ada, ryekone bidwogo, dok bibwot ki i owic pa Catan.—2 Tem. 2:26.

15. Luelda gitwero medde ki konyo labalo ma ongut nining?

¹⁵ Ka labalo mo ongut, komitti pa luelda ma gubedo i lokke gibiketo yub pi lim me kwat, wek ngat meno omedde ki nongo kony ma mitte me cung matek i kom abita pa Catan ki me timo gin ma atir. (Ibru 12:​12, 13) Ngene kene ni, luelda pe gitito ki jo mukene bal ma ngat meno otimo. Ento gin ango ma mitte ni jo me kacokke meno gunge?

“MYERO IJUKGI I NYIM DANO DUCU”

16. Ma lubbe ki 1 Temceo 5:​20, jo mene ma onongo Paulo tye ka lok i komgi i kare ma owaco ni “dano ducu”?

¹⁶ Kwan 1 Temceo 5:20. Paulo ocoyo lok meno bot laelda lawote Temceo ma lubbe ki kit me konyo “jo ma pud ocung i kom balgi.” Tika onongo Paulo tye ka waco ni omyero kijuk labalo-ni i nyim jo ducu me kacokke? Pe tye kit meno. Me ka meno, en onongo tye ka lok i kom jo manok ma twero bedo ni guniang i kom bal meno. Twero bedo ni guneno ki wanggi, nyo labalo-ni kikome aye ma otittigi gin ma etimo. Luelda gibitito ki jo magi keken ni gityeko neno lok man dok kitiro labalo-ni.

17. Ka jo mapol i kacokke dong gingeyo ni ngat moni otimo bal madit, nyo gibingeyone lacen, lok angeya ango ma omyero kimi bot kacokke, dok pingo?

¹⁷ I kare mukene, twero bedo ni jo mapol i kacokke dong gingeyo ni ngat moni otimo bal madit, nyo gibingeyone lacen. Ka tye kit meno, ci lok pa Paulo ni “dano ducu” nongo kwako utmege ducu me kacokke. Pi meno, laelda acel bimiyo lok angeya bot kacokke ni omego nyo lamego-ni dong kijuko. Pingo? Paulo ogamo ni: “Wek omi jo mukene gubed ki lworo” me timo bal madit.

18. Ka ce omego nyo lamego mo ma mwakane pe o 18 otimo bal madit, gin ango ma luelda myero gutim? (Nen bene cal.)

¹⁸ Gin ango ma myero luelda gutim ka latin ma onongo batija, ma mwakane peya oromo 18, otimo bal madit? Gibiketo yub pi luelda aryo me rwatte ki latin-ni kacel ki lunywalle ma Lucaden.b Luelda gibipenyo lunyodone gin ma dong gutimo me konyo latingi-ni me timo alokaloka ki dong ngut i kom balle. Ka latin meno oye winyo tira pa lunyodone dok tye ka loko tamme kacel ki kite, ci luelda aryo magi gitwero moko tamgi me weko lunyodone medde ki konye. Ki lok ada, Lubanga omiyo ki lunyodo tic me tiro lutinogi i yo me mar. (Nwo. 6:​6, 7; Car. 6:20; 22:6; Ep. 6:​2-4) I nge meno, luelda gibilok ki lunyodo pa latin-ni kare ki kare me niang ka latin man tye ka nongo kony ma mitte. Ento gin ango ma myero luelda gutim ka latin ma onongo batija pud omedde ki timo bal? Ka tye kit meno, ci komitti pa luelda adek gibirwatte ki latin-ni kacel ki lunyodone ma Lukricitayo.

‘JEHOVAH WON KICA DOK TIMO BER BOT DANO’

19. I yo ma nining ma luelda gitute me lubo lanen pa Jehovah ka gitye ka konyo labalo?

¹⁹ Jehovah omiyo tic ki luelda ma gibedo i komitti me konyo labalo me neno ni gigwoko kacokke obedo maleng i yo me cwiny. (1 Kor. 5:7) Ento gitute bene matek me konyo labalo me ngut i kom balle, ka twerre. Dok ka gitye ka konyo ngat meno, luelda gibedo ki gen ni en biloko kwone. Pingo? Pien nongo gimito lubo lanen pa Jehovah ma obedo ‘won kica dok timo ber bot dano.’ (Yak. 5:11) Nen kong kit ma lakwena Jon olubo kwede lanen pa Jehovah. En ocoyo ni: “Litinona, acoyo waraga man botwu wek pe wupot i bal; ento ka ngat mo obalo, watye ki lakony ma cung piwa bot Lubanga Won, en Yecu Kricito ma kite atir.”—1 Jon 2:1.

20. Gin ango ma wabinyamo i pwony me agikki i kin pwony abic ma lubbe aluba-ni?

²⁰ Ki cwercwiny, i kare mogo, Lakricitayo kwero ngut i kom balle woko. Ka tye kit meno, ci omyero kikwanye woko ki i kacokke. Ka gin ma kit meno otimme, omyero luelda gucob lokke nining? Wabinyamo lok meno i pwony me agikki i kin pwony abic ma lubbe aluba-ni.